విజయవాడ నగరపాలక సంస్థ సమావేశంలో వైసీపీ, టీడీపీ మధ్య ఫోటోలపై వివాదం నెలకుంది. మున్సిపల్ కౌన్సిల్‌ హాలులోని చంద్రబాబు, ఎన్టీఆర్ ఫోటోలను తొలగించి, జగన్ ఫోటోలను ఏర్పాటు చేశారు. కొత్త ప్రభుత్వం ఏర్పడటంతో అధికారులు ఇలా చేశారు. దీనిపై విజయవాడ నగర మేయర్ కోనేరు శ్రీధర్ ఆగ్రహం వ్యక్తం చేశారు. ఎవరిని అడిగి జగన్ ఫొటో పెట్టారని అధికారులను ప్రశ్నించారు. కార్పొరేషన్‌లో తాను చెప్పిందే చేయాలంటూ అధికారులకు మేయర్ ఆదేశించారు. వైఎస్ ఫోటో పెట్టడానికి వీల్లేదని, ఎన్టీఆర్ ఫోటో ఏర్పాటు చేయాలని సూచించారు. నన్ను అడగకుండా సీఎం జగన్ ఫొటో ఎందుకు పెట్టారు? అని మండిపడ్డారు. ఎన్టీఆర్ ఫొటోను యథాస్థానంలో ఉంచాలని అన్నారు. కానీ, దివంగతులైన ముఖ్యమంత్రులు ఫోటోలను కౌన్సిల్ హాలులో ఉంచడం సాంప్రదాయమని వైసీపీ వాదిస్తోంది. ఎన్టీఆర్‌తో పాటు వైఎస్ ఫోటో కూడా పెట్టాలని వైసీపీ కౌన్సిలర్లు డిమాండ్ చేస్తున్నారు. ఇద్దరు మాజీ సీఎంలే కాబట్టి వాటిని పెట్టాలని మేయర్‌ పోడియం వద్ద వైఎస్సార్‌సీపీ కార్పొరేటర్లు ఆందోళన చేశారు. కార్పొరేషన్‌ తనదని, తాను చెప్పిందే చేయాలంటూ అధికారులపై మేయర్‌ ఆగ్రహం వ్యక్తం చేశారు. కాగా, మేయర్ కోనేరు శ్రీధర్ వ్యవహారశైలిపై గతంలో సొంత పార్టీ కార్పొరేటర్లే తిరుగుబాటు చేశారు. చంద్రబాబుకు ఆయనపై ఫిర్యాదు చేసిన సందర్భాలు కూడా ఉన్నాయి. అలాగే, గద్దే రామ్మోహన్‌రావు, కోనేరు మధ్య ఆధిపత్య పోరు సాగిందని వార్తలు కూడా హల్‌చల్ చేశాయి. తాజాగా ముఖ్యమంత్రి జగన్‌ ఫోటోను కౌన్సిల్ హాలులో ఉంచడంపై అధికారులకు మేయర్ హుకుం జారీచేయడం చర్చనీయాంశమైంది. దీంతో కౌన్సిల్ సమావేశం రసాభాసగా మారింది.