యువ్ న్యూస్ జనరల్ బ్యూరో:

అమరావతిలో అన్నదాతల ఆర్తనాదాలు వినిపిస్తున్నాయి. అప్పుల బాధతో అన్నదాతలు.. ఏపీ రాజధాని ప్రాంతంలో ప్రాణాలు తీసుకున్నారు. గత రెండేళ్లలో 11మంది ప్రాణాలు తీసుకున్నట్లు సమాచార హక్కు చట్టం ద్వారా తేలింది. ప్రపంచస్థాయి రాజధానిగా చెప్పుకొనే అమరావతిలో ఇలా రైతులు ఆత్మహత్యలు చేసుకోవడం ఆందోళన కలిగిస్తోంది. చనిపోయినవారిలో సీఆర్డీఏ పరిధిలో నివాసముండే.. ముగ్గురు దళిత కౌలు రైతులు ఉన్నారు. ఈ అన్నదాతలు మిర్చి, పత్తి పంటలు వేసి.. అవి సరిగా పండక నష్టపోయారు. మరికొందరు కోర్ కేపిటల్ ప్రాంతంలో వారు ఉన్నారు. వీరు ల్యాండ్ పూలింగ్‌లో భూములు ఇవ్వనివారు. తుళ్లూరు సబ్-డివిజినల్ ఆఫీసర్ ఆర్టీఐ అధికారులకు తెలిపిన సమాచారం ప్రకారం.. అమరావతి మండలంలో ఐదుగురు.. తుళ్లూరు మండలంలో ముగ్గురు, పెదకూరపాడు మండంలో మరో ముగ్గురు ఉన్నారు. ఈ 11మందిలో తొమ్మిదిమంది పురుగుల మందు తాగి ప్రాణాలు తీసుకోగా.. మరో ముగ్గురు ఉరి వేసుకొని ప్రాణాలు తీసుకున్నారు. ఈ ఆత్మహత్యలు 2018, 2019 సమయంలో జరిగాయట. 11మందిలో ఆరుగురు దళితు రైతులుగా గుర్తించారు. కానీ ఇప్పటి వరకు వీరికి ఎలాంటి సాయం అందలేదు. అత్తలూరు గ్రామానికి చెందిన వెంకటేశ్వరరావు అనే రైతు ఆత్మహత్యకు సంబంధించిన ఎఫ్‌ఐఆర్‌లో.. భూములు కౌలుకు తీసుకున్న రైతు నాలుగేళ్లుగా అప్పుల ఊబిలో కూరుకుపోయాడు. తర్వాత ప్రకృతి సహకరించక, పంట నష్టాలతో ఎదురు దెబ్బలు తగిలాయి. అప్పులు తీర్చే మార్గం లేక పురుగుల మందు తాగి ప్రాణాలు తీసుకున్నాడు. దీంతో అతడి భార్యే కుటుంబ బాధ్యతల్ని భుజానికి ఎత్తుకుంది. పది ఎకరాలు కౌలుకు తీసుకొని సాగు చేశామని.. కానీ వరుసగా నష్టాలతో అప్పుల పాలయ్యామని ఆవేదన వ్యక్తం చేశారు. తన భర్త మరణం తర్వాత రూ.7 లక్షల అప్పులు మిగిలాయని.. ఇప్పటి వరకు ప్రభుత్వం స్పందించలేదని.. ఎలాంటి సాయం అందలేదన్నారు. రామాపురంకు చెందిన యలమంద అనే దళిత రైతుది కూడా ఇదే పరిస్థితి. పంట నష్టం రావడంతో.. యలమంద పురుగుల మందు తాగి ప్రాణాలు తీసుకున్నాడు. ప్రభుత్వం నుంచి రూ.2 లక్షల సాయం అందింది.. కానీ ఆమెకు వితంతు పింఛన్ మాత్రం రావడం లేదు. రెండు నెలల తర్వాత యలమంద తండ్రి కూడా ప్రాణాలు విడిచాడు. దీంతో కష్టాలు మరింత పెరిగాయి. రాజధాని ప్రాంతంలో దాదాపు 20మంది ఇలాగే ఆత్మహత్యలు చేసుకున్నారని చెబుతున్నారు రైతు సంఘాల నేతలు. ఈ ఆత్మహత్యలపై మంగళగిరి ఎమ్మెల్యే ఆళ్ల రామకృష్ణారెడ్డి స్పందించారు. తమ ప్రభుత్వం రైతు భరోసా కింద సాయం చేయడంతో పాటూ పగటిపూట 9 గంటల విద్యుత్ సరఫరా.. విత్తనాలను మంజూరు చేస్తుందన్నారు. అలాగే కౌలు రైతులకు గుర్తింపు కార్డులు ఇచ్చే ఆలోచనలో ఉన్నామన్నారు. ప్రభుత్వం ఇప్పటికైనా స్పందించి.. ఆ రైతు కుటుంబాలను ఆదుకోవాలని రైతు సంఘాల నేతలు కోరుతున్నారు.