యువ్ న్యూస్ పొలిటికల్ బ్యూరో:

జనసేన అధినేత పవన్‌ కళ్యాణ్‌తో టీడీపీ నేత వంగవీటి రాధాకృష్ణ సమావేశమయ్యారు. విజయవాడలో సోమవారం ఉదయం వంగవీటి పవన్‌ ఇంటికి వెళ్లి అరగంటపాటూ భేటీ అయ్యారు. తర్వాత అక్కడి నుంచి వెళ్లిపోయారు. వంగవీటి పవన్‌ను కలవడంపై రాజకీయవర్గాల్లో ఆసక్తికర చర్చ మొదలయ్యింది. రాధా త్వరలోనే జనసేన పార్టీలో చేరబోతున్నారనే ప్రచారం జరుగుతోంది. ఆ విషయంపైనే జనసేనానితో చర్చించేందుకు వచ్చారనే ఊహాగానాలు వినిపిస్తున్నాయి. వంగవీటి రాధా ఎన్నికలకు ముందు జగన్‌తో విభేదించి వైసీపీ గుడ్ బై చెప్పారు. చంద్రబాబు సమక్షంలో టీడీపీ కండువా కప్పుకున్నారు. సీటు రాకపోయినా దక్కకపోయినప్పటికీ పార్టీ అధికారంలోకి వస్తే కీలక పదవి వస్తుందని భావించారు. ఎన్నికల్లో స్టార్ క్యాంపెయినర్‌గా మారి రాష్ట్రవ్యాప్తంగా టీడీపీ తరపున ప్రచారం నిర్వహించారు. తర్వాత చంద్రబాబు మళ్లీ ముఖ్యమంత్రి కావాలని మూడు రోజుల పాటు శ్రీయాగం కూడా చేశారు. ఎన్నికల తర్వాత పరిస్థితి మారిపోయింది.. వైసీపీ అధికారంలోకి రావడంతో వంగవీటి రాధా రాజకీయ భవిష్యత్ సందిగ్థంలో పడింది. ఈలోపే టీడీపీ నుంచి బీజేపీలోకి చేరికలు మొదలయ్యాయి. దీంతో వంగవీటి కూడా రాజకీయ భవిష్యత్‌పై ఫోకస్ పెట్టినట్లు కనిపిస్తోంది. అందుకే జనసేనలోకి వెళ్లాలని భావిస్తున్నారనే ప్రచారం మొదలయ్యింది. అందుకే పవన్‌ను కలిసినట్లు తెలుస్తోంది. అయితే వంగవీటి పవన్‌తో భేటీపై ఎలాంటి క్లారిటీ ఇవ్వలేదు.