యువ్ న్యూస్ పొలిటికల్ బ్యూరో:

ప్రజావేదిక కనుమరుగైపోయినా.. ఏపీ రాజకీయాల్లో మాత్రం హీట్ తగ్గడం లేదు. ఈ భవన నిర్మాణానికి టీడీపీ ప్రభుత్వం రూ.9కోట్లు ఖర్చు చేసిందని వైసీపీ అంటుంటే.. రూ.9 కోట్లు కాదు రూ.90లక్షలు అంటోంది టీడీపీ. ఈ వ్యవహారంపై సోషల్ మీడియాలో రెండు పార్టీల కార్యకర్తల మధ్య పెద్ద యుద్ధమే జరుగుతోంది. ఒకరిపై మరొకరు దుమ్మెత్తి పోసుకుంటున్నారు. అయితే తాజాగా ప్రజావేదికకు సంబంధించిన ఓ జీవో కాపీ ఇప్పుడు బాగా వైరల్ అవుతోంది. టీడీపీ నేతలు, కార్యకర్తలు ప్రజావేదికకు సంబంధించిన జీవో పేరుతో ఓ పేపర్‌ను వైరల్ చేస్తున్నారు. ఈ జీవోలో ప్రజావేదిక భవనానికి రూ.90 లక్షలు మాత్రమే ఖర్చు చేసినట్లు ఉందంటున్నారు. 2017 ఏప్రిల్ 4న అప్పటి ప్రభుత్వం ఈ జీవోను విడుదల చేసినట్లు ఉంది. ఈ జీవో కాపీని తెలుగు తమ్ముళ్లు తెగ వైరల్ చేస్తున్నారు. వైసీపీ ప్రజావేదికపై తప్పుడు ప్రచారం చేస్తోందంటూ విమర్శిస్తున్నారు. ఇటు వైసీపీ నేతల మాత్రం.. ప్రజా వేదిక నిర్మాణం కోసం మొత్తం రూ. 8.50 కోట్ల ఖర్చు చేశారని చెబుతున్నారు. అప్పటి ప్రభుత్వం విడుదల చేసిన జీవోకి.. తర్వాత ఖర్చు చేసిన నిధులకు తేడా ఉందంటున్నారు. వైసీపీ ఎంపీ విజయసాయిరెడ్డి కూడా ప్రజావేదిక కోసం టీడీపీ ప్రభుత్వం రూ.9 కోట్లు ఖర్చు చేసిందని ట్వీట్ చేశారు. అలాగే మంత్రి పేర్ని నాని కూడా ఇదే విషయాన్ని తన ట్విట్టర్‌లో పేర్కొన్నారు. మరి తెలుగు తమ్ముళ్లు వైరల్ చేస్తున్న ఈ జీవోపై క్లారిటీ రావాల్సి ఉంది.