యువ్ న్యూస్ పొలిటికల్ బ్యూరో:

వైసీపీ కొత్త ప్రభుత్వాన్ని ఏర్పాటు చేసి నెల రోజులు అవుతోంది. పారదర్శక పాలనను అందిస్తామంటూ జగన్ సంచలన నిర్ణయాలతో ముందుకు సాగుతున్నారు. మంత్రులు, ఎమ్మెల్యేల సహా ఎవరు తప్పు చేసినా ఉపేక్షించేది లేదని కుండబద్దలు కొట్టేశారు. శాంతిభద్రతల విషయంలోనూ రాజీ లేదని పోలీసులకు చెప్పేశారు. అయితే వైసీపీ ఎమ్మెల్యే మాత్రం గీత దాటారు.. నరికేస్తానంటూ ఓ జర్నలిస్టును బెదిరించిన ఆడియో రికార్డ్ ఒకటి బయటపడింది. మాజీ మంత్రి నారా లోకేష్ స్వయంగా ఆ ఆడియో క్లిప్‌ను ట్వీట్ చేశారు. లోకేష్ ‘ఈ రాక్షస రాజ్యంలో జర్నలిస్టుల పరిస్థితి ఇదైతే ఇక సామాన్యుడి పరిస్థితి ఎలా ఉండబోతోందో మీరే ఊహించండి..*దయచేసి కుటుంబ సభ్యులతో ఈ అసభ్య పదజాలం వినకండి’అంటూ ఓ ఆడియో క్లిప్‌ను ట్వీట్ చేశారు. ఆడియో క్లిప్‌లో నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి.. ఓ జర్నలిస్టును బెదిరిస్తున్నట్లు ఉంది. నడిరోడ్డుపై నరికేస్తానంటూ అసభ్య పదజాలంతో ఎమ్మెల్యే రెచ్చిపోయారు. మరోవైపు నారా లోకేష్ చేసిన ఈ ట్వీట్ ఇప్పుడు వైరల్‌గా మారగా.. టీడీపీ నేత చేసిన ఆడియోలో ఉన్న గొంతు కోటంరెడ్డి శ్రీధర్ రెడ్డిదా కాదా అన్నది తేలాల్సి ఉంది. ఒకవేళ ఆ గొంతు ఎమ్మెల్యేదని తేలితో.. ప్రభుత్వం ఎలా స్పందిస్తుంది, ఏవైనా చర్యలు తీసుకుంటుందా లేదా అన్నది ఆసక్తిగా మారింది. అంతేకాదు బెదిరింపులకు సంబంధించి ఎమ్మెల్యేపై ఏదైనా ఫిర్యాదు అందిందా లేదా అన్నది క్లారిటీ లేదు.