కర్నూలు: గ్రామానికి సమీపంలో ప్రభుత్వం నిర్వహించ తలపెట్టిన జల విద్యుత్ కేంద్రాన్ని వద్దంటూ కర్నూలు జిల్లా పాములపాడు మండలం వేంపెంట గ్రామస్థులు సుదీర్ఘ ఉద్యమం చేపట్టి విజయం సాధించారు. దాదాపు తొమ్మిదేళ్లు పోరాటంతో ప్రభుత్వం ఎట్టకేలకు దిగివచ్చింది. అనేక ఉద్యమాలకు పుట్టినిల్లుగా నిలిచిన వేంపెంట ప్రజా సమస్యలను సమష్టిగా ఎదుర్కోవడంలో నాటి ఉద్యమకారుల స్ఫూర్తిని కొనసాగించి వార్తల్లో నిలిచింది. వేంపెంట గ్రామం మధ్యలో నుంచి ప్రవహించే నిప్పుల వాగుపై 7.2 మెగావాట్ల జల విద్యుత్తు ఉత్పత్తి కేంద్ర నిర్మాణానికి 2011లో నాటి కాంగ్రెస్ ప్రభుత్వం అనుమతించింది. ర్యాంక్ సంస్థ ఇందుకు ఆ సంస్థ రూ. 47 కోట్లతో నిప్పుల వాగుకు అనుసంధానంగా పక్కన 5.07 నుంచి 8 కిలోమీటర్ల వరకు ప్రాజెక్టు నిర్మాణానికి సిద్ధమైంది. దీనికి సంబంధించిన పనులు మొదలు పెట్టి 25 శాతం పూర్తి చేసింది. అయితే, వీటిని గ్రామస్థులు అడ్డుకోవడంతో పనులు నిలిచిపోయాయి. అధికారుల సాయంతో పనులు మొదలుపెట్టాలని భావించినా గ్రామస్థుల పట్టుదల ముందు అవి బలాదూర్ అన్నాయి. గ్రామం మధ్యలో విద్యుత్తు కేంద్రం నిర్మిస్తే తమ ఊరి ఉనికికే ప్రమాదమని, 2009 వరదలకు తీవ్రంగా నష్టపోయి ఇప్పుడిప్పుడే కోలుకుంటున్నామని గ్రామస్థులు తెలిపారు. తరుచూ వరదలతోపాటు కొత్తగా విద్యుత్తు కేంద్ర నిర్మిస్తే అదనపు నష్టం వాటిళ్లుతుందని ఊరి ప్రజలు పేర్కొన్నారు. ఊరికి దగ్గర్లోనే తెలుగుగంగ, ఎస్సార్బీసీ, కేసీ ఎస్కేప్‌ కాల్వలు సుమారు 80 అడుగుల లోతులో ఉండడం వల్ల బావులు, బోర్లలో నీరు అడుగంటింది. కొత్తగా విద్యుత్తు కేంద్రం నిర్మిస్తే పంట పొలాలు బీడువారి పోతాయని, బ్లాస్టింగ్‌తో ఇళ్లకు బీటలు వచ్చి కూలిపోయే ప్రమాదం ఉందన్నారు. గ్రామానికి సమీపంలోని మూడు కాల్వల నిర్మాణంతో సాగు భూమి విస్తీర్ణం గణనీయంగా తగ్గిపోగా, మిగిలిన అరకొర భూమి విద్యుత్తు కేంద్రం పాలవుతుందని భావించారు. దీని వల్ల కాలుష్యంతోపాటు ప్రమాదాలు తప్పవని గ్రహించి వ్యతిరేకంగా పోరాటం చేశారు. గ్రామాన్ని ఇతర ప్రాంతాలకు తరలించి అన్ని సౌకర్యాలతో కాలనీలు నిర్మించాలని, లేదంటే ప్రాజెక్టును గ్రామానికి సుమారు 8 కి.మీ. దూరంగా నిర్మించాలని చెప్పినా ప్రభుత్వం, కాంట్రాక్ట్ సంస్థ అంగీకరించలేదు. దీంతో 2011 ఆగస్టు 5న జల విద్యుత్తు కేంద్ర నిర్మాణం భూమి పూజను గ్రామస్థులు అడ్డుకుని, 2012లో రాష్ట్ర మానవ హక్కులకు ఆశ్రయించారు. 2013లో నాటి కలెక్టరు సుదర్శన్‌రెడ్డి గ్రామాన్ని సందర్శించి తాత్కాలికంగా పనులు నిలిపి వేయించారు. తిరిగి అప్పటి న్యాయశాఖ మంత్రి ఏరాసు ప్రతాప్‌రెడ్డి ఆధ్వర్యంలో ప్రజాభిప్రాయ సేకరణ నిర్వహించగా దీనిని ప్రజలు తీవ్రంగా వ్యతిరేకించారు. అయితే, 2013-14లో పోలీస్‌ బలగాలతో పనులు ప్రారంభించారు. 2014 జూన్‌ 9న 1000 మంది కలెక్టరేట్‌ ముట్టడించడంతో నిర్మాణం రద్దు చేస్తున్నట్లు హామీ కలెక్టర్ ఇచ్చారు. కానీ ఇంతలోనే కలెక్టరు బదిలీ కావడంతో 2015లో పోలీస్‌ బలగాలతో పనులు మళ్లీ మొదలు పెట్టారు. దీనిని అడ్డుకోడానికి ప్రయత్నించిన ప్రజలను గ్రామంలో నిర్బంధించారు. అదే ఏడాది మార్చి 6న నిర్మాణ పనుల్లో బ్లాస్టింగ్‌తో ఇళ్లు కూలిపోయాయి. గ్రామస్థులు ప్రతిఘటించి పనులు నిలిపివేయించారు. 7వ తేదీన పని చేస్తున్న యంత్రాలను ఊరి బయటకు దాటించారు. తమ పోరాటాలకు ప్రభుత్వం స్పందించక పోవడంతో గాంధీ మార్గంలో శాంతియుతంగా దీక్షలకు దిగారు. 2015 మార్చి 15న రిలే నిరసన దీక్షలకు శ్రీకారం చుట్టి, పోరాటాలు కొనసాగించారు. జాతీయ మానవహక్కుల కమిషన్‌, ఢిల్లీలోని జాతీయ షెడ్యూల్డ్‌ కులాల కమిషన్‌ను కలిశారు. 2015 ఏప్రిల్‌ 8న బానకచెర్ల నీటి సముదాయానికి వచ్చిన నాటి ప్రతిపక్ష నేత, నేటి ముఖ్యమంత్రి జగన్‌మోహన్‌రెడ్డిని కలిసి విద్యుత్తు కేంద్రం రద్దుకు హామీ పొందారు. అంతకు ముందు చంద్రబాబు, రాహుల్ గాంధీ, చిరంజీవిలను కూడా కలిసి తమ గోడు విన్నవించుకున్నారు. అయితే, గతంలో ఇచ్చిన హామీ మేరకు సీఎం జగన్ వేంపెంట విద్యుత్ కేంద్ర నిర్మాణాన్ని రద్దుచేస్తున్నట్టు ఉత్తర్వులు జారీచేశారు. ఈ సుదీర్ఘ దీక్ష పోరాటంలో 11 మంది మహిళలు కీలక పాత్ర పోషించడం గమనార్హం. సామ్రాజ్యమ్మ, అన్నమ్మ, దాసరి మేరమ్మ, రొక్కల సుశీలమ్మ, బోనాల కాశమ్మ, బోనాల చిన్నక్క, లక్షమ్మ, బోనాల భారతీ, దరగ సుశీలమ్మ, దాసరి పుష్పలత, రూతమ్మ. కలెక్టర్ల సదస్సులో ముఖ్యమంత్రి జగన్‌ మోహన్‌రెడ్డి దృష్టికి కర్నూలు జిల్లా కలెక్టర్ వీర పాండ్యన్ తీసుకుని వెళ్లడంతో ఆయన స్పందిస్తూ రద్దు చేయమని సూచించారు. ప్రభుత్వ నిర్ణయాన్ని పద్ధతి ప్రకారం అమలు చేయాలని, అందుకు మార్గదర్శకాలు తీసుకుని అమలు చేస్తామని వీర పాండ్యన్ తెలిపారు. జీవో అంటే ఒక్కరోజులో ఇచ్చేది కాదని, త్వరలో జీవో ఇవ్వడానికి ప్రయత్నాలు చేస్తామన్నారు.