ఈ ఏడాది నైరుతి రుతుపవనాలు ఆలస్యంగా ప్రవేశించడంతో తెలుగు రాష్ట్రాల్లో వర్షాభావ పరిస్థితులు నెలకున్నాయి. నైరుతి ఆలస్యంగా ప్రవేశించినా సాధారణ వర్షపాతం నమోదువుతుందని వాతావరణ శాఖ తెలిపింది. కాగా, ఉత్తర బంగాళాఖాతంలో జులై 2 నాటికి వాయుగుండం ఏర్పడే అవకాశాలున్నట్లు వాతావరణశాఖ అధికారులు వెల్లడించారు. ప్రస్తుత పరిస్థితుల బట్టి జూన్ 30నాటికి అల్పపీడనం ఏర్పడుతుందని, అది వాయుగుండంగా మారుతుందని తెలిపారు. కాగా ఉత్తరాంధ్ర, దక్షిణ ఒడిశా తీరాన్ని ఆనుకుని ఉన్న పశ్చిమమధ్య బంగాళాఖాతంలో సముద్రమట్టానికి 4.5 కిలోమీటర్ల నుంచి 7.6 కిలోమీటర్ల ఎత్తు మధ్య ఉపరితల ఆవర్తనం కొనసాగుతున్నట్టు వివరించారు. వీటి ప్రభావంతో కోస్తాలో జూన్ 30, జులై 1న కొన్నిచోట్ల భారీ వర్షాలకు అవకాశం ఉందని పేర్కొన్నారు. రానున్న నాలుగు రోజుల్లో రాష్ట్రవ్యాప్తంగా కొన్నిచోట్ల తేలికపాటి నుంచి మోస్తరు వర్షాలకు అవకాశం ఉందని వెల్లడించారు. దీని ప్రభావంతో రుతుపవనాలు మరింత చురుకుగా మారి తెలుగు రాష్ట్రాల్లో భారీ వర్షాలు కురుస్తాయని వెల్లడించింది. కోస్తా జిల్లాల్లోని అనేక ప్రాంతాల్లో ఇప్పటికే వర్షాలు కురుస్తున్నాయి. గత రెండు రోజుల్లో తూర్పుగోదావరి జిల్లా అమలాపురంలో రాష్ట్రంలోనే అత్యధికంగా 13 సెం.మీ భారీ వర్షపాతం నమోదైంది. కృష్ణా జిల్లా గుడివాడలో 7 సెం.మీ వర్షం కురిసింది. బంగాళాఖాతంలో ఏర్పడే అల్పపీడనం బలపడి తుఫానుగా మారే అవకాశాలు ఉన్నాయని, జులై మొదటి వారంలో దీని ప్రభావం కనిపిస్తుందని వాతావరణ శాఖ వెల్లడించింది. మరోవైపు, కొంకణ తీరంలో నైరుతి రుతుపవనాలు బలంగా ఉన్నాయి. దీని ప్రభావంతో ముంబైలో గత రెండు రోజుల నుంచి భారీ వర్షాలు కురుస్తున్నాయి. కుండపోత వర్షాలతో రోడ్లపై నీరు మూడు అడుగుల ఎత్తున ప్రవహిస్తోంది. రైల్వే ట్రాక్‌లు నీట మునిగిపోవడంతో లోకల్ రైళ్లను నిలిపివేశారు.