యువ్ న్యూస్ జనరల్ బ్యూరో:

నీట్ కౌన్సెలింగ్ 2019లో భాగంగా ప్రవేశ పరీక్షలో అర్హత సాధించిన అభ్యర్థులకు మొదటి విడత సీట్ల కేటాయింపు వివరాలను మెడికల్ కౌన్సెలింగ్ కమిటీ సోమవారం (జులై 1) వెల్లడించనుంది. సీట్లు పొందినవారు జులై 1 నుంచి 6 వరకు సంబంధిత కళాశాలలో ధ్రువపత్రాల పరిశీలనకు హాజరుకావాల్సి ఉంటుంది. మొదటి విడతలో సీట్లు పొందలేనివారు జులై 9 నుంచి జులై 11 మధ్యలో మరోసారి రిజిస్ట్రేషన్ చేసుకోవాల్సి ఉంటుంది. వాస్తవానికి జూన్ 27న తొలి విడత సీట్ల కేటాయింపు జరగాల్సి ఉన్నప్పటికీ షెడ్యూలులో స్వల్ప మార్పుల కారణంగా జులై 1కి వాయిదా పడింది. ఈ కౌన్సెలింగ్ ద్వారా 15 శాతం ఆలిండియా కోటా/ డీమ్డ్/సెంట్రల్ యూనివర్సిటీలు/ ఈఎస్‌ఐ & ఏఎఫ్‌ఎంఎస్ (ఎంబీబీఎస్/బీడీఎస్) సీట్లను భర్తీ చేయనున్నారు. మారిన షెడ్యూలు ప్రకారం జులై 9 నుంచి రెండో విడత ఆన్‌లైన్ కౌన్సెలింగ్ ప్రారంభం కానుంది. అభ్యర్థుల నుంచి జులై 9 - 11 మధ్య దరఖాస్తులు స్వీకరిస్తారు. జులై 11న మధ్యాహ్నం 12 గంటల్లోగా ప్రాసెసింగ్ ఫీజు చెల్లించడానికి అవకాశం కల్పించారు. అభ్యర్థులు జులై 12న ఛాయిస్ ఫిల్లింగ్/లాకింగ్ చేయాల్సి ఉంటుంది. అనంతరం జులై 13, 15 తేదీల్లో సీట్లు కేటాయించి.. జులై 15న సీట్ల కేటాయింపు వివరాలను ప్రకటించనున్నారు. సీట్లు పొందినవారు జులై 15 - 22 మధ్యలో సంబంధిత కళాశాలలో రిపోర్ట్ చేయాల్సి ఉంటుంది.
చివరి విడత కౌన్సెలింగ్..
అదే విధంగా.. చివరి విడతగా (మాపప్ రౌండ్) సెంట్రల్/ డీమ్డ్/ ఈఎస్‌ఐసీలో ప్రవేశాలకు కౌన్సెలింగ్ చేపట్టనున్నారు. ఆగస్టు 13 నుంచి 15 వరకు దరఖాస్తు చేసుకోవాల్సి ఉంటుంది. ఆగస్టు 16 వరకు ఫీజు చెల్లించాలి. అనంతరం అదేరోజు సాయంత్రం 5 గంటల్లోగా చాయిస్ ఫిల్లింగ్/లాకింగ్ చేయాల్సి ఉంటుంది. ఆగస్టు 17న సీట్లను కేటాయిస్తారు. 18న సీట్ల కేటాయింపు వివరాలను ప్రకటిస్తారు. ఆగస్టు 20 నుంచి 26 మధ్యలో సంబంధిత కళాశాలలో రిపోర్ట్ చేయాల్సి ఉంటుంది.
ధ్రవపత్రాల పరిశీలనకు ఈ డాక్యుమెంట్లు తప్పనిసరి..
* నీట్-2019 ర్యాంక్ కార్డు
* క్వాలిఫైయింగ్ ఎగ్జామినేషన్ (ఇంటర్) మార్క్ షీట్, ఉత్తీర్ణత సర్టిఫికేట్.
* పదోతరగతి మార్కుల జాబితా లేదా పుట్టిన తేదీ ధ్రువీకరణ కోసం ఉత్తీర్ణత సర్టిఫికేట్.
* కుల ధ్రువీకరణ పత్రం
* ఫొటో గుర్తింపుకార్డు, చిరునామా ధ్రువీకరణ పత్రం
* అభ్యర్థులు అన్ని ఒరిజినల్ ధ్రువపత్రాలను వెంట తీసుకెళ్లాల్సి ఉంటుంది. ఒక జత సెల్ప్ అటెస్టెడ్ కాపీలను కూడా వెంట తీసుకెళ్లా్ల్సి ఉంటుంది.
* నిర్ణీత గడువులోగా సంబంధిత కళాశాలలో రిపోర్టింగ్ చేయనివారికి సీటు లభించదు. రెండో విడతలో అవకాశం కల్పిస్తారు.