యువ్ న్యూస్ ఫిల్మ్ బ్యూరో:

అబ్బబ్బా.. ఈ ముసలోళ్లు ఉన్నారే పెద్ద నస. ఎక్కడ లేని చాదస్తం. ఉన్నచోట ఉండరు. ఓ మూల కూర్చోరు. ప్రతి విషయంలోనూ వేలు పెడతారు. ఈ ముసల్ది బకెట్ తన్నేస్తేనే కాని ప్రశాంతత ఉండదు’.. అని చిరాకు పడే కొడుకు, కోడలు, మనవడు, మనవరాలు ప్రతి ఇంటిలోనూ మనకు కనిపిస్తూనే ఉంటారు. పెద్దోళ్లన్నాక తిడతారు.. పడతాం ఏమైంది. ఈ ఇగో ఎందుకు మనకు? అన్నది మనోళ్లేగా.. మనకోసమేగా.. అని రియలైజ్ అవుదాం అనుకునేలోపు నిన్నటి వరకూ నిన్ను తిట్టిన, నువ్ తిట్టినా పడిన ముసల్ది మనకు కనిపించనంత దూరంగా వెళిపోతుంది. వాళ్లు మనకు దూరమైన తరువాత తెలుస్తుంది.. ప్రతి ఇంట్లోను అమ్మో, నాన్నో, తాతయ్యో, నాన్నమ్మో లేకపోతే.. ఇంక ఎవరు అడుగుతారు మనల్ని తిన్నామా ఉన్నామా? అని. అందుకే ప్రతి ఇంటిలోనూ ఇదిగో ‘ఓ బేబీ’ లాంటి ముసల్ది ఉంటుంది? ఆ బేబీ కథ ఏంటో సమీక్షలో తెలుసుకుందాం. ‘చేస్తే మంచి సినిమాలే చేయాలి.. లేదంటే ఇంట్లో కూర్చోవాలి’ అని పెళ్లి తరువాత ఆచితూచి అడుగులేస్తూ ‘రంగస్థలం’, ‘మహానటి’, ‘మజిలీ’, ‘యూ టర్న్’ లాంటి బ్లాక్ బస్టర్ హిట్లు అందుకున్న సమంత.. మరోసారి ‘ఓ బేబీ’ అనే ప్రయోగాత్మక చిత్రంలో శుక్రవారం నాడు ప్రేక్షకుల ముందుకు వచ్చింది. మిస్‌గ్రానీ అనే కొరియన్ మూవీని తెలుగులో ‘ఓ బేబీ’ పేరుతో రీమేక్ చేశారు. ఈ చిత్రానికి ‘అలా మొదలైంది’ ఫేమ్ నందిని రెడ్డి దర్శకత్వం వహించారు. ఇక ‘ఓ బేబీ’ చిత్ర కథలోకి వెళ్తే.. 70 ఏళ్ల వృద్ధురాలైన సావిత్రి అలియాస్ బేబి (లక్ష్మీ) చిన్నతనం నుండి ప్రతి విషయంలోనూ రాజీ పడుతూ ఒంటరిగానే జీవితాన్ని నెట్టుకొస్తుంది. పెళ్లైన ఏడాదిలోనే భర్తను కోల్పోయి.. కొడుకు (రావు రమేష్)ని ప్రయోజకుడ్ని చేస్తుంది. కొడుకు (రావు రమేష్)పై విపరీతమైన ప్రేమ ఉండటంతో పాటు బేబీకి కాస్త చాదస్తం ఎక్కువ. ప్రతి విషయంలోనూ కల్పించుకుని చివరకు చేపలు కూరలో పులుపు వేసే విషయంలోనూ కోడల్ని తిడుతూ ఉంటుంది. దీంతో బేబీ టార్చర్ భరించలేక కోడలు ప్రగతికి గుండెనొప్పి వస్తుంది. బేబీ ఇంట్లో ఉంటే ప్రగతి మామూలు మనిషి కావడం కష్టం అని డాక్టర్లు చెప్పడంతో ఇంట్లో నుండి వెళిపోదాం అని బేబీ డిసైడ్ అయిన సందర్భంలో కథలో కీలక మలుపు ఉంటుంది. దేవుడండే ఇష్టం లేని బేబీ తన మనవడు (తేజ సజ్జీ) మ్యూజిక్ షో చూడడం కోసం వెళ్లి దేవుడి మహిమతో 70 ఏళ్ల వృద్ధురాలు.. 24 ఏళ్ల స్వాతిగా (సమంత) మారుతుంది. ఆమె యువతిగా మారిన తరవాత కథ ఎలాంటి మలుపులు తిరిగింది? బేబీ.. స్వాతిగా మారిన తరువాత ఎలాంటి ఛాలెంజ్‌లను ఎదుర్కొంది? చివరికి బేబీ ఏమైంది అన్నదే మిగతా కథ. 70 ఏళ్ల వృద్ధురాలు 24 ఏళ్ల యువతిగా మారడం అనే వినూత్న కాన్సెప్ట్‌ను చాలా ఈజీగా డీల్ చేసింది సమంత. ఇలాంటి ప్రయోగాత్మక కథను ఎన్నుకోవడమే ఛాలెంజ్ అయితే.. ఇప్పటికే నటిగా తనను తాను నిరూపించుకున్న సమంత ఈ సినిమాతో తనలోకి కొత్త నటిని ‘బేబీ’ పాత్ర ద్వారా పరిచయం చేశారు. ఈ పాత్రలో సమంతను తప్ప వేరే వాళ్లను ఊహించుకోవడం కష్టమే అన్నంతగా రెండు వేరియేషన్స్ ఉన్న పాత్రలో ఒదిగిపోయింది సమంత. తన చాదస్తంతో సినిమాలో నవ్వించింది.. ఏడిపించింది.. కవ్వించింది.. మెరిసింది.. మైమరపించింది సమంత. రూపమేమో 24 ఏళ్ల యువతి.. ఆలోచనలు, చేసే పనులేమో 70 ఏళ్ల వృద్ధురాలుగా నటిస్తూ మెస్మరైజ్ చేసింది. తొలి 15 నిమిషాలు సీనియర్ నటి లక్ష్మి ‘బేబీ’ పాత్రలో జీవించేశారు. ప్రాణంగా చూసుకున్న కొడుకుని వదల్లేక.. కోడలు, మనవడు, మనవాళ్లను దూరం చేసుకోలేక ఆమె పడ్డ మనోవేదన ప్రేక్షకుడి గుండెల్ని బరువెక్కేలా చేసింది. హాస్పటల్ సీన్‌లో తాను ఏడుస్తూ.. ప్రేక్షకుడి కళ్లు చెమర్చేలా తన సీనియారిటీని చూపించేశారు లక్ష్మి. సమంత ఎంట్రీ తరువాత ఫన్ రైడ్ స్టార్ అయ్యి.. థియేటర్‌లో నవ్వుల జల్లు కురిసింది. రాజమండ్రి యాసలో ఆయ్.. ఏంటండీ.. చూడబ్బాయ్ అంటూ చితకేసింది. అదే సందర్భంలో ఎమోషన్స్ సీన్స్‌లో సమంత ఏడిపించేసింది. తనకు మాత్రమే సాధ్యమైన హావభావాలను ప్రేక్షకులకు కొత్త సమంతను చూపించింది. ఇక ఈ చిత్రంలో కనిపించిన ప్రతి పాత్ర వందశాతం న్యాయం చేశారు. ముఖ్యంగా రాజేంద్రప్రసాద్ ఫుల్ లెంగ్త్ రోల్‌తో సమంత క్యారెక్టర్‌తో పాటు జర్నీ చేశారు. సమంతకు చిన్ననాటి స్నేహితుడిగా.. వృద్ధాప్యంలోనూ తోడుగా అద్భుతమైన నటనను ప్రదర్శించారు. రెండు మూడు సీన్లలో ప్రేక్షకుల్ని ఏడిపించేశారు నట కిరీటి. ఇక బేబీ కొడుకుగా రావు రమేష్ నటన సినిమాకి ప్రధాన బలం. ఆయన చెప్పిన డైలాగ్స్ ఫ్యామిలీ ఆడియన్స్‌కి కనెక్ట్ అయిపోతుంది. ‘మనకి తిండిపెడతారు.. చివరికి మనతోనే తిట్లు తింటారు. ముసలోల్లు అంతే.. గొడవపడేది మనతో అది కూడా మనకోసమే. మనం చాదస్తం అనుకుంటాం.. వాళ్లు దాన్ని బాధ్యత అనుకుంటారు. వాళ్లు ఉన్నప్పుడు విలువ తెలియదు. లేనప్పుడే వాళ్లు మనతో ఉన్న ప్రతిక్షణం చాలా విలువైనదే. వాళ్లు పోతే మన బాల్యం కూడా వాళ్లతో తీసుకుపోతారు’ అంటూ ఆయన చెప్పిన డైలాగ్స్ ఆలోచింపచేసేవిగా ఉన్నాయి. సమంతకు జోడీగా నటించిన నాగశౌర్య తన పాత్ర పరిధి మేర ఆకట్టుకున్నారు. బేబీ సింగర్ కావాలనుకున్న కలల్ని సాకారం చేయడానికి తన వంతుగా సాయం చేసే పాత్రలో నాగశౌర్య ఒదిగిపోయారు. ఇక బేబీతో ప్రేమలో పడటం.. వీరి కథ ఎలా సుఖాంతం అయ్యిందన్నది కూడా ఇంట్రస్టింగ్‌గానే ఉంది. చైల్డ్ ఆర్టిస్ట్‌గా సుపరిచితుడైన తేజ ఈ సినిమాలో బేబీకి మనుమడిగా మంచి నటనతో ఆకట్టుకున్నాడు. సమంతకి భర్తగా అతిథి పాత్రలో అడవి శేష్ కనిపించారు. కేవలం రెండు, మూడు సీన్స్‌లో ఇలా వచ్చి అలా మాయమయ్యారు అడవి శేష్. ఫస్టాఫ్ మొత్తం ఫన్ రైడ్‌గా నడిపించిన నందినీ రెడ్డి సెకండాఫ్‌లో కాస్త తడబడ్డారు. కథ ముందే రివీల్ కావడంతో పాటు.. క్లైమాక్స్ ఏమౌతుందోనన్న ఆసక్తి ప్రేక్షకుల్లో కొరవడింది. కామెడీతో పాటు ఎమోషన్స్ సీన్స్‌కి పెద్ద పీట వేసిన నందినిరెడ్డి కథనంపై కాస్త గ్రిప్పింగ్ కోల్పోయారు. ఫస్టాఫ్‌తో పోలిస్తే.. సెకండాఫ్ కాస్త లెంగ్తీగా అనిపిస్తుంది. అయితే సినిమా స్లో అవుతుందనే సందర్భంలో బలమైన ఎమోషన్ సీన్స్‌తో బాలెన్స్ చేసేశారు దర్శకురాలు. ఇక ఈ కథలో మరో ట్విస్ట్ హీరో జగపతి బాబు క్యారెక్టర్. కథ మొత్తం మలుపు తిరిగేది ఆయన పాత్రతోనే. క్లైమాక్స్‌లో సమంత రియల్ హీరో నాగ చైతన్య ఎంట్రీ.. రాజేంద్ర ప్రసాద్ న్యూ జర్నీతో ‘ఓ బేబీ’ కథ మళ్లీ మొదలయ్యేట్టు ఆసక్తికరమైన ట్విస్ట్ ఇచ్చారు. టెక్నికల్ పరంగా.. సురేష్ ప్రొడక్షన్స్, గురు ఫిలిమ్స్, పీపుల్స్ మీడియా ఫ్యాక్టరీ బ్యానర్స్ త్రయం ‘ఓ బేబీ’ చిత్రాన్ని తక్కువ బడ్జెట్‌లోనే చాలా రిచ్‌గా చూపించారు. ‘ఓ బేబీ’ కథ.. ఫాంటసీ కామెడీ డ్రామానే కాకుండా మ్యూజిక్ ప్రదానంగా సాగింది. అయితే కథను ముందుకు నడిపించగలిగే బలమైన పాట ఈ సినిమాలో లేకపోవడం లోటుగా కనిపిస్తుంది. మిక్కి జే మేయర్ పాటల పరంగా పూర్తి న్యాయం చేయలేకపోయారు. నేపథ్య సంగీతంతో ఆకట్టుకన్నారు. సినిమాటోగ్రాఫర్ రిచర్డ్స్ ప్రసాద్.. సమంతను చాలా అందంగా న్యూ లుక్‌లో చూపించారు. ప్రతి ఫ్రేమ్‌ను అందంగా మలిచారు. మ్యూజిక్ కాంపిటేషన్ సీన్స్‌ను రిచ్‌గా చూపించారు. ఎడిటర్ జునైద్ సిద్ధికీ సినిమా రన్ టైంని మరింత తగ్గిస్తే బాగుండేది. సెకండాఫ్‌లో కొన్ని సీన్లకు కత్తెర పడాల్సింది. చివరిగా.. ముసలోళ్లు అంటే నస అన్నా.. చాదస్తం అన్నా ఎలాగూ వాళ్లు మన వయసుకు రాలేదు. మనమే వాళ్లు వయసుకు వెళ్లాలి. సమంత ‘ఓ బేబీ’ సినిమా పెద్దోళ్లకు ఇచ్చే గౌరవం. ఎమోషనల్ అండ్ ఫన్ రైడ్