కర్ణాటకలో ఏర్పడిన రాజకీయ సంక్షోభం రోజుకో కొత్త మలుపు తిరుగుతూ థ్రిల్లర్ సినిమాను తలపిస్తోంది. రెబల్ ఎమ్మెల్యేల రాజీనామాలపై స్పీకర్‌ ఎలాంటి నిర్ణయం తీసుకోకపోవడంతో వారంతా సుప్రీం గడప తొక్కారు. తమ రాజీనామాలను ఆమోదించకుండా స్పీకర్‌ రాజ్యాంగవిరుద్ధంగా వ్యవహరిస్తున్నారని అసమ్మతి ఎమ్మెల్యేలు సుప్రీంకోర్టులో పిటిషన్‌ దాఖలు చేశారు. రాజీనామాలను ఆమోదించకుండా ఉద్దేశపూర్వకంగానే జాప్యం చేస్తున్నారని వారు ఆరోపించారు. ప్రధాన న్యాయమూర్తి జస్టిస్ రంజన్ గొగొయ్ ముందు ఈ పిటిషన్‌పై అత్యవసర విచారణ జరపాలని ఎమ్మెల్యేల తరఫున సీనియర్‌ లాయర్ ముకుల్‌ రోహత్గీ ప్రస్తావించారు. ఈ అభ్యర్థనను మన్నించిన ధర్మాసనం అత్యవసర విచారణకు అంగీకరించింది. ఈ వ్యాజ్యంపై గురువారం విచారణ చేపట్టనుంది. అసమ్మతి ఎమ్మెల్యేల రాజీనామాల్లో కొన్ని సరిగా లేవంటూ స్పీకర్‌ రమేశ్ కుమార్‌ మంగళవారం పేర్కొన్న విషయం తెలిసిందే. తనను స్వయంగా కలిసి సహేతుకమైన వివరణ ఇవ్వాలని స్పీకర్‌ స్పష్టం చేశారు. దీంతో వారి పరిస్థితి డోలాయమానంలో పడింది. మరోవైపు అసమ్మతులను బుజ్జగించేందుకు కాంగ్రెస్‌ ట్రబుల్‌ షూటర్‌ డీకే శివకుమార్‌ బుధవారం ముంబయి వెళ్లారు. అయితే ఎమ్మెల్యేలను కలవకుండా ఆయనను పోలీసులు అడ్డుకున్నారు. ముంబయిలోని హోటల్‌లో ఉన్న రెబల్స్‌ను కలిసేందుకు మంత్రి శివకుమార్‌, జేడీఎస్‌ ఎమ్మెల్యే శివలింగ గౌడ వెళ్లారు. వీరిద్దరూ అక్కడికి చేరుకున్న నేపథ్యంలో రెబల్ ఎమ్మెల్యేలు బసచేసి హోటల్‌ వద్ద భారీ బందోబస్తు ఏర్పాటు చేశారు. అయితే భద్రతా పరమైన చర్యల దృష్ట్యా శివకుమార్‌ను అనుమంతించబోమని పోలీసులు స్పష్టం చేశారు. హోటల్‌లో బస చేసేందుకు గది బుక్‌ చేసుకున్నానని చెప్పినా పోలీసులు ససేమిరా అన్నారు. లోపలున్న ఎమ్మెల్యేలు అంగీకరిస్తేనే శివకుమార్‌ను లోపలికి అనుమతిస్తామని పోలీసులు చెప్పడం విశేషం. వారిని కలవకుండా ఇక్కడ నుంచి వెళ్లే ప్రసక్తేలేదని శివకుమార్ భీష్మించుకు కూర్చున్నారు.దీంతో అక్కడ ఘర్షణ వాతావరణం నెలకుంది. అంతేకాదు జులై 9 నుంచి 12 వరకు పొవాయ్ పోలీస్ స్టేషన్ పరిసరాల్లో 144వ సెక్షన్ విధించారు. శాంతిభద్రతలు, ప్రశాంతతకు ఎలాంటి విఘాతం కలగకుండా ముందు జాగ్రత్త చర్యలు చేపట్టామని పోలీసులు వెల్లడించారు. తాజా పరిణామాల నేపథ్యంలో కర్ణాటక రాజకీయాలు క్షణక్షణం ఉత్కంఠగా మారుతున్నాయి. మరి ఈ సంక్షోభానికి ఎలాంటి ముగింపు వస్తుందో వేచి చూడాల్సిందే.