గురువారం నుంచి ఏపీ అసెంబ్లీ బడ్జెట్ సమావేశాలు ప్రారంభంకానున్నాయి. బుధవారం స్పీకర్ తమ్మినేని అధ్యక్షతన బీఏసీ సమావేశం కూడా నిర్వహించారు. అయితే గత ప్రభుత్వం తీసుకున్న నిర్ణయాలు, పథకాలపై వైసీపీ ప్రభుత్వ శ్వేతపత్రాలను విడుదల చేయాలని నిర్ణయించింది. ఈ నిర్ణయంపై టీడీపీ కూడా సానుకూలంగా స్పందించింది. సర్కార్ శ్వేతపత్రాలు విడుదల చేయడం మంచిదేనని టీడీపీ ఎమ్మెల్యే, మాజీ మంత్రి అచ్చెన్నాయుడు అన్నారు. ప్రభుత్వం విడుదల చేసే శ్వేతపత్రాల్లో వాస్తవాలుంటే స్వాగతిస్తామని.. టీడీపీ ప్రభుత్వాన్ని విమర్శించేలా ఉంటే తామూ పోటీగా శ్వేతపత్రాలు విడుదల చేస్తామన్నారు. తాజాగా ఈ వ్యవహారంపై ప్రతిపక్ష నేత చంద్రబాబు కూడా స్పందించారు. మీడియాతో చిట్‌చాట్‌గా మాట్లాడిన చంద్రబాబు.. శ్వేతపత్రాలు విడుదల చేస్తామన్న నిర్ణయాన్ని స్వాగతిస్తున్నామన్నారు. శ్వేతపత్రాల్లో ఏం చెబుతారో వేచి చూస్తామని.. గతంలో తాము కూడా శ్వేతపత్రాలు విడుదల చేశామని గుర్తుచేశారు. అప్పుడూ.. ఇప్పుడూ సమాచారం ఇచ్చింది ఒకే అధికారులన్నారు. సాగునీరు విషయంలో నిరంతర పర్యవేక్షణ వల్లే టీడీపీ హయాంలో ఎలాంటి ఇబ్బందులు రాలేదన్నారు చంద్రబాబు. తెలిపారు. గోదావరికి వరద ఉధృతి ఉన్నా.. పట్టిసీమ నీళ్లు ఇవ్వడంలో ఇప్పుడు ఆలస్యం జరిగిందన్నారు. పాలకులు-అధికారుల మధ్య సమన్వయం లేకపోతే ఇలాంటి ఇబ్బందులే వస్తాయన్నారు. హంద్రీనీవా ద్వారా నీళ్లు ఇవ్వడంతో ఆ ప్రాంత ప్రజలు ఎంతో సంతోషంగా ఉన్నారన్నారు చంద్రబాబు.