యువ్ న్యూస్ పొలిటికల్ బ్యూరో:

ఆళ్ల రామకృష్ణారెడ్డి.. మంగళగిరి ఎమ్మెల్యేగా, ఆర్కేగా అందరికి పరిచయం ఉన్న పేరు. సామాన్య రైతు కుటుంబం నుంచి వచ్చి.. ఎలాంటి రాజకీయ నేపథ్యం లేకపోయినా వరుసగా రెండుసార్లు ఎమ్మెల్యే అయ్యారు. మంత్రి పదవి ఇస్తామని స్వయంగా జగన్ హామీ కూడా ఇచ్చారు.. కానీ సామాజిక సమీకరణాలతో దక్కలేదు. ఎమ్మెల్యేగా రెండుసార్లు గెలిచినా ఆళ్ల తన మూలాలను మర్చిపోలేదు. ఇప్పటికీ ఓ సాధారణ రైతు బిడ్డగా వ్యవసాయం చేస్తూనే ఉన్నారు. ప్రజా ప్రతినిధిగా తన నియోజకవర్గ బాధ్యతల్ని చూసుకుంటూనే.. తన పొలంలో వ్యవసాయానికి కొంత సమయం కేటాయిస్తున్నారు. పొలాలను దున్నేందుకు ట్రాక్టర్లు అందుబాటులోకి వచ్చేశాయి.. కానీ రామకృష్ణారెడ్డి మాత్రం ఇప్పటికీ ఎద్దులతో దుక్కి దున్నుతున్నారు. కూరగాయలతో పాటూ సీజన్‌ను బట్టి పంటల్ని సాగు చేస్తున్నారు. ఎడ్లబండి సాయంతో తన పొలానికి వెళుతూ.. వ్యవసాయానికి కావాల్సిన అన్నింటిని సమకూర్చుకుంటున్నారు. తనకు ఉన్న పొలంలో పంటల్ని సాగు చేసుకుంటూ ఓ సాధారణ రైతులా మారారు. రామకృష్ణారెడ్డి రోజూ తన ఇంటి ఆవరణలో ఉన్న గేదెల బాగోగులు కూడా ఆయనే స్వయంగా చూసుకుంటున్నారు. ఉదయం నిద్ర లేవగానే.. గేదెల దగ్గర పేడను తీసేసి.. గేదెల షెడ్డును ఆయనే శుభ్రం చేస్తున్నారు. తర్వాత గేదెల్ని నీళ్లతో శుభ్రంగా కడిగి.. మేత వేస్తున్నారు. ఇలా వ్యవసాయం పనుల్ని చక, చకా చేస్తూ ఆదర్శంగా నిలుస్తున్నారు. ఎమ్మెల్యే అన్న గర్వం లేకుండా.. ఓ రైతు బిడ్డగా అన్ని పనుల్ని చక్కబెడుతున్నారు.
ఎమ్మెల్యే ఆర్కే సాధారణ జీవితాన్ని చూసి మంగళగరి ప్రజలతో పాటూ నెటిజన్లు కూడా ఫిదా అవుతున్నారు. ఓ ఎమ్మెల్యే అయ్యుండి వ్యవసాయం చేయడంపై ప్రశంసలు కురిపిస్తున్నారు. వ్యవసాయం చేయడం మాత్రమే కాదు.. రాజన్న రైతు బజార్ పేరుతో తన పొలంలో పండిన కూరగాయల్ని తక్కువ ధరకే ప్రజలకు అందించారు. అలాగే రాజధాని ప్రాంతంలో రైతుల సమస్యలపై ఎప్పటికప్పుడు స్పందిస్తూ స్థానికంగా మంచి పేరు తెచ్చుకున్నారు.