యువ్ న్యూస్ పొలిటికల్ బ్యూరో:

వైఎస్ఆర్సీపీ సర్కారు తొలి పద్దును ప్రవేశపెట్టింది. దాదాపు రూ.2.28 లక్షల కోట్లతో ఆర్థిక మంత్రి బుగ్గన ఈ బడ్జెట్‌ను ప్రవేశపెట్టారు. ఈ బడ్జెట్‌పై జగన్ మార్క్ స్పష్టంగా కనిపించింది. మేనిఫెస్టోలో పేర్కొన్న నవరత్నాల అమలు కోసం సంక్షేమానికి పెద్దపీట వేశారు. మా ప్రభుత్వానికి ఒక విజన్‌ ఉంది. దాన్ని రాబోయే కాలంలో నెరవేర్చి, దేశంలోనే ప్రథమ స్థానంలో నిలుపుతామని బడ్జెట్ సందర్భంగా బుగ్గన వ్యాఖ్యానించారు. సంక్షేమ పథకాల కోసం రూ.90 వేల కోట్లు కేటాయించిన తరుణంలో ప్రభుత్వానికి నిజంగా విజన్ ఎంతో అవసరం. ఎందుకంటే.. పూర్తి బడ్జెట్ రూ.2,27,974 కోట్లు కాగా.. ఆదాయ వనరులేమో రూ.1,78,697 కోట్లు మాత్రమే. పన్నుల ద్వారా రూ.75,437 కోట్లు సమకూరుతాయని జగన్ సర్కారు భావిస్తుండగా.. కేంద్ర పన్నుల్లో వాటా రూపంలో రూ.34,833 కోట్లు, పన్నేతర ఆదాయంగా రూ.7354 కోట్లు, రుణ వసూళ్ల ద్వారా రూ.600 కోట్లు ఖజనాకు చేరతాయని ప్రభుత్వం భావిస్తోంది. రెవెన్యూ లోటు రూ.1778.52 కోట్లు ఉండగా.. ద్రవ్యలోటు సుమారు రూ.35,260.58 కోట్లుగా ఉంది. కేంద్ర సాయంపై రాష్ట్ర సర్కారు భారీ ఆశలు పెట్టుకుంది. కేంద్ర నుంచి ప్రాయోజిత నిధుల రూపంలో రూ.61,071 కోట్లు వస్తాయని ప్రభుత్వం ఆశిస్తోంది. గతంలో చంద్రబాబు కేంద్రం నుంచి రూ.50 వేల కోట్ల సాయాన్ని ఆశిస్తే.. వాస్తవానికి దక్కింది రూ.19 వేల కోట్లే. అంటే అంతరం రూ.30 వేల కోట్లు. వైఎస్ఆర్సీపీ, బీజేపీ మధ్య సఖ్యత ఉన్నప్పటికీ.. ఉదారంగా నిధులిచ్చేంత అవసరమైతే మోదీ సర్కారుకు ఇప్పుడు లేదు.గత బడ్జెట్ కంటే ఈ ఏడాది బడ్జెట్ అంచనా 19.32 శాతం పెరుగుతుందని వైఎస్ఆర్సీపీ ప్రభుత్వ అంచనా. కానీ ఆ అంచనాలు ఎంత మేర నిజమవుతాయో చెప్పలేం. అలా పెరగకపోతే.. జగన్ సర్కారుకు మరిన్ని చిక్కులు తప్పవు. 2018-19 బడ్జెట్లో బాబు సర్కారు అంచనాల కంటే తక్కువగా ఆదాయం సమకూరింది. గత బడ్జెట్(రూ.1.89 లక్షల కోట్ల)కు ఈ వెచ్చించినమొత్తానికి మధ్య రూ.35 వేల కోట్లకుపైగా తేడా ఉంది. ఈ పరిస్థితి ప్రస్తుత బడ్జెట్లో తలెత్తకుండా జాగ్రత్తపడాలి. ఇక రుణాల రూపంలో రూ.46,921 కోట్లు సేకరించాలని రాష్ట్ర ప్రభుత్వం భావిస్తోంది. 2018-19 నాటికి రాష్ట్రానికి రూ.2.58 లక్షల కోట్ల రుణాలు ఉన్నాయని ఆర్థిక మంత్రి  స్పష్టం చేశారు. పెండింగ్‌లో ఉన్న రూ.18 వేల కోట్లు బిల్లులు దీనికి అదనం. ప్రస్తుత ఆర్థిక సంవత్సరంలో వడ్డీలకే దాదాపు రూ.9 వేల కోట్లు కేటాయించారు.  ఆర్థిక సంవత్సరంలో రూ.33,461 కోట్ల మేర అప్పులు తెస్తామని చెప్పిన చంద్రబాబు సర్కారు రూ.38 వేల కోట్ల మేర రుణాలు తెచ్చింది. టీడీపీ ప్రభుత్వం ఎడాపెడా అప్పులు చేస్తోందని ఆరోపించిన వైఎస్ఆర్సీపీ ఇప్పుడు అధికారంలోకి వచ్చాక అంతకంటే ఎక్కువ అప్పులు తేవాల్సిన దుస్థితి. అప్పుల ఊబి నుంచి ఆర్థిక వ్యవస్థను బయటపడేయడం, ఆదాయం పెంచుకోవడం, సంక్షేమానికి ప్రాధాన్యం ఇవ్వడం.. ఇవన్నీ ఇప్పుడు జగన్ సర్కారు ముందున్న సవాళ్లు. వైఎస్ఆర్సీపీ నాయకులు మాత్రం అప్పులు తేవాల్సిన అవసరం లేదనే ధీమాతో ఉన్నారు.