యువ్ న్యూస్ స్పోర్ట్స్ బ్యూరో:

ప్రపంచకప్ లో ఐదు శతకాలు బాదిన రోహిత్ శర్మ.. టోర్నీలోనే టాప్ స్కోరర్ గా నిలిచాడు. మరోవైపు కెప్టెన్ విరాట్ కోహ్లీ ఐదు అర్ధశతకాలు బాదినా.. ఒక్కసారి కూడా శతకం మార్క్ అందుకోలేకపోయాడు. ప్రపంచకప్ నుంచి సెమీస్ లో పేలవ ఓటమితో భారత్ జట్టు నిష్క్రమించడంపై మాజీ క్రికెటర్ల నుంచి విమర్శలపర్వం ఇంకా కొనసాగుతోంది. న్యూజిలాండ్ పై  గత బుధవారం ముగిసిన సెమీ ఫైనల్ మ్యాచ్ ల  ధోనీని బ్యాటింగ్ ఆర్డర్ లో వెనక్కి పంపడమే టీమిండియా ఓటమికి కారణమని ఇప్పటికే మాజీ క్రికెటర్లు అభిప్రాయపడుతుండగా.. టోర్నీలో విరాట్ కోహ్లీ కెప్టెన్సీనే సరిగాలేదంటూ మరికొందరు పెదవి విరుస్తున్నారు. తాజాగా ఈ విమర్శకుల జాబితాలో భారత మాజీ క్రికెటర్ వసీమ్ జాఫర్ కూడా చేరాడు.
వాస్తవానికి ప్రపంచకప్ జట్టుని ప్రకటించినప్పటి నుంచి సెమీస్ లో  ఓడే వరకూ టీమిండియా మేనేజ్ మెంట్  నిర్ణయాలపై వరుసగా విమర్శలు వస్తూనే ఉన్నాయి. తొలుత సీనియర్ బ్యాట్స్ మెన్ అంబటి రాయుడిని  పక్కన పెట్టడం, టీమ్ లో ముగ్గురు వికెట్ కీపర్లకి చోటివ్వడం, తుది జట్టులో వరుస మార్పులు.. కొన్ని మ్యాచ్ లో షమీపై వేటు ఆఖరిగా సెమీస్ లో ధోనీని ఆలస్యంగా ఏడో స్థానంలో బ్యాటింగ్ కు పంపడం. ఇలా చాలా అంశాల్లో మాజీ క్రికెటర్లు, అభిమానుల నుంచి కెప్టెన్ విరాట్ కోహ్లి విమర్శలు ఎదుర్కొన్నాడు.
‘భారత వన్డే, టీ20 జట్టు పగ్గాలని విరాట్ కోహ్లీ నుంచి అందుకునేందుకు రోహిత్ శర్మకి ఇదే తగిన సమయం. 2023 ప్రపంచకప్ లో టీమిండియాని రోహిత్ శర్మ కెప్టెన్ గా  నడిపించడాన్ని నేను చూడాలనుకుంటున్నా’ అని వసీమ్ జాఫర్ చెప్పుకొచ్చాడు. కోహ్లీకి సెలక్టర్లకి విశ్రాంతినిచ్చిన సమయాల్లో కెప్టెన్ గా  టీమిండియాని రోహిత్ శర్మ నడిపించిన విషయం తెలిసిందే. ప్రపంచకన్ లోనూ వైస్ కెప్టెన్ గా రోహిత్ బాధ్యతలు నిర్వర్తించాడు.