యువ్ న్యూస్ జనరల్ బ్యూరో:

పోలీసులు ఎన్ని చర్యలు తీసుకున్నా దేశంలో వ్యభిచారానికి మాత్రం అడ్డుకట్ట పడటం లేదు. రోజుకో కొత్తపుంత తొక్కుతూ వ్యభిచార ముఠాలు తమ దందాను సాగిస్తున్నాయి. గతంలో గుట్టుగా సాగే ఈ దందా ఇప్పుడు ఆన్‌లైన్ బాట పట్టింది. సోషల్‌మీడియా ద్వారా విటులను సంప్రదించడం, లాడ్జిలు, లగ్జరీ హోటళ్లకు అమ్మాయిలను సరఫరా చేస్తూ ఎన్నో ముఠాలు పోలీసులకు పట్టుబడుతున్నాయి. అయినప్పటికీ రూటు మార్చుకుని కొత్తపంథాలో దందా కొనసాగిస్తున్నారు. అయితే ముంబయి‌లోని ఓ వ్యక్తి కొత్త తరహాలో వ్యభిచారం చేస్తూ పోలీసులకే షాకిచ్చాడు. ఈ-కామర్స్ సైట్ల తరహాలో ఇంటి వద్దకే వ్యభిచారిణులను సరఫరా చేస్తూ సరికొత్త దందాకు తెరలేపాడు. దేశ ఆర్థిక రాజధాని ముంబయిలో రజ్నేష్ సింగ్ అనే వ్యక్తి రజ్నేష్ వెల్‌నెస్ లిమిటెడ్ పేరుతో స్పా సెంటర్ ఓపెన్ చేశాడు. ఐదుగురు అమ్మాయిలను చేర్చుకుని ఇంటి వద్దకే వచ్చి స్పా సేవలు అందిస్తామంటూ ఆన్‌లైన్‌లో ప్రకటలు గుప్పించాడు. అవి చూసిన చాలామంది ఫోన్లు చేయగా అసలు విషయం చెప్పి విటుల అభిరుచికి తగినట్లుగా వారు కోరిన చోటికి అమ్మాయిలను సరఫరా చేస్తుండేవాడు. వ్యభిచారిణులను విటుల ఇంటికే పంపిస్తే పోలీసులతో సమస్య ఉండదని, భద్రత కూడా ఉంటుందని భావించే రజ్నేష్ ఈ మార్గం ఎన్నుకున్నాడు. కస్టమర్లతో ఫోన్లో మాట్లాడుతూ.. మీకు లోకల్ స్పా కావాలా?, ఇంటర్నేషనల్ స్పా కావాలా? అని అడిగి అమ్మాయిలను పంపేవాడు. ఈ విధంగా కొన్నాళ్లుగా గుట్టుచప్పుడు కాకుండా వ్యభిచార దందా నిర్వహిస్తున్న రజ్నేష్‌పై పోలీసులకు అనుమానం వచ్చింది. ఆన్‌లైన్ ప్రకటనల్లో అతడిచ్చిన ఫోన్ నంబర్‌కు బుధవారం ఫోన్ చేసి కస్టమర్‌గా పరిచయం చేసుకున్న ఓ పోలీసు అంథేరీలోని ఓ హోటల్‌కు ముగ్గురు అమ్మాయిలను పంపాలని కోరాడు. మంచి బేరం దొరికిందని సంబరపడ్డ రజ్నేష్ ఫోన్లో వ్యక్తి చెప్పిన అడ్రస్‌కు ముగ్గురు అమ్మాయిలను పంపించాడు. వారు హోటల్‌ రూమ్‌కి చేరుకోగానే అప్పటికే అక్కడ మాటువేసిన పోలీసులు అదుపులోకి తీసుకున్నారు. ముగ్గురు అమ్మాయిలు ఇచ్చిన సమాచారం ఆధారంగా మరో ఇద్దరు వ్యభిచారిణులతో పాటు నిర్వాహకులు రజ్నేష్‌ను పోలీసులు అరెస్ట్ చేశారు. వీరి నుంచి రూ.4.70లక్షల నగదు స్వాధీనం చేసుకున్నారు. ఆరుగురిపై కేసు నమోదు చేసిన పోలీసులు నిందితులను కోర్టులో హాజరుపరిచారు. దీంతో న్యాయమూర్తి వారికి శనివారం వరకు పోలీస్ కస్టడీ విధించారు.