యువ్ న్యూస్ పొలిటికల్ బ్యూరో:

కర్ణాటక అసెంబ్లీలో నాటకీయ పరిణామాలు కొనసాగుతున్నాయి. గవర్నర్ విధించిన గడువు పూర్తయినా విశ్వాస పరీక్ష జరగలేదు. ఉత్కంఠ వీడలేదు. చర్చ పూర్తయిన తర్వాతే బలపరీక్ష జరుగుతుందని కాంగ్రెస్ సీనియర్ నేత, మాజీ ముఖ్యమంత్రి సిద్ధరామయ్య స్పష్టం చేశారు. ఇంకా మాట్లాడాల్సిన సభ్యులు 20 మంది ఉన్నారని తెలిపారు. ఇది ఇవాళ పూర్తవుతుందని తాను భావించట్లేదని.. సోమవారం మధ్యాహ్నం వరకు చర్చ కొనసాగవచ్చని వ్యాఖ్యానించారు. మరోవైపు విప్ అంశంపై కర్ణాటక కాంగ్రెస్.. సుప్రీంకోర్టును ఆశ్రయించింది. విప్ అంశంపై స్పష్టత ఇవ్వాలని శుక్రవారం (జులై 19) ఉదయం పిటిషన్ దాఖలు చేసింది. సుప్రీంకోర్టు తీర్పుతో తాము విప్ ఇచ్చే అధికారాన్ని కోల్పోయామని ఆ పార్టీ నేతలు వాపోయారు. బీజేపీ తనకు రూ.5 కోట్లు ఆఫర్ చేసిందని కోలార్ ఎమ్మెల్యే, జేడీఎస్ నేత శ్రీనివాస గౌడ ఆరోపించారు. ఈ అంశంపై అసెంబ్లీలో రభస జరిగింది. ఈ ఆరోపణలపై కోర్టుకు వెళతామని బీజేపీ రాష్ట్ర అధ్యక్షుడు యడ్యూర్ప తెలిపారు. ఆధారాలుంటే చూపాలని.. నిరాధార ఆరోపణలు చేసిన శ్రీనివాస గౌడపై పరువు నష్టం దావా వేస్తామని వెల్లడించారు. ‘కావాలంటే సీఎం సీటు తీసుకోండి.. మీకు సంఖ్యాబలం ఉంటే ప్రభుత్వాన్ని ఏర్పాటు చేసుకోండి. కానీ, దానికి తొందరెందుకు.. ముందు చర్చ జరపండి’ అని సీఎం కుమారస్వామి అన్నారు. తమ ఎమ్మెల్యేలకు బీజేపీ డబ్బు ఆశ చూపిందంటూ ఆరోపించారు. కుమారస్వామి మూడు జిల్లాలకే సీఎం అనే ఆరోపణలపైనా చర్చ జరగాల్సిందేనని అన్నారు. బీజేపీ ఎమ్మెల్యేలకు సంబంధించిన నియోజకవర్గాలకు నిధులు ఇవ్వట్లేదా అని ప్రశ్నించారు. గవర్నర్ విధించిన గడువును కూడా ఎలా ధిక్కరిస్తారంటూ బీజేపీ అధ్యక్షుడు యడ్యూరప్ప ప్రశ్నించారు. వెంటనే విశ్వాస పరీక్ష నిర్వహించాలని పట్టుబట్టారు. ఈ అంశంపై బీజేపీ సభ్యులు గవర్నర్‌ వాజుభాయ్ వాలాను మరోసారి కలిశారు. దీంతో ఆయన మరో గడువు విధించారు. శుక్రవారం సాయంత్రం 6 గంటల లోగా బలపరీక్ష నిర్వహించాలని స్పీకర్ రమేశ్ కుమార్‌కు లేఖ రాశారు.గవర్నర్ ఆదేశాలను స్పీకర్ పాటించాల్సిందేనా, లేదా అనే విషయంపై న్యాయపరమైన అంశాలు పరిశీలిస్తున్నారు. రాష్ట్రపతి పాలన విధించే అవకాశాలనూ కొట్టిపారేయలేం. ఏదేమైనా.. కర్ణాటకలో నాటకీయాలకు ఇప్పుడప్పుడే ముగింపు పడే అవకాశాలు కన్పించడం లేదు.