యువ్ న్యూస్ జనరల్ బ్యూరో: 

ఆభరణాలను లాకర్‌లో దాచుకుంటారనే సంగతి తెలిసిందే. కానీ, ఆమె ఏకంగా కడుపులోనే దాచుకుంది. అయితే, అది ఆమె కావాలని చేసిన పని కాదు. ఇంట్లో ఒక్కొక్క ఆభరణం మిస్సవుతుంటే కుటుంబికులకు అనుమానం కలిగింది. అయితే, ఆమే మింగేస్తునే సంగతి వారికి తెలీదు. ఇటీవల ఆహారం తిన్న వెంటనే వాంతులు చేసుకోవడంతో అసలు విషయం బయపడింది. పశ్చిమ బెంగాల్‌లోని రాంపూర్‌హాత్ ప్రభుత్వ ఆసుపత్రిలో చేరిన 26 ఏళ్ల యువతిని పరీక్షించిన వైద్యులు కడుపులో ఏవో వస్తువులు ఉన్నట్లు గుర్తించారు. దీంతో సర్జరీ నిర్వహించగా ఆమె కడుపులో ఆభరణాలు, నాణాలు కనిపించాయి. ఆమెకు సర్జరీ నిర్వహించిన డాక్టర్ సిద్ధార్థ బిశ్వాస్ మాట్లాడుతూ చైనులు, ముక్కు పుడకలు, చెవి పోగులు, గాజులు, బ్రాస్లెట్ తదితర ఆభరణాలతోపాటు రూ.5, రూ.10 నాణేలను వెలికితీశామని, వాటి బరువు సుమారు రూ.1.5 కిలో ఉన్నాయన్నారు. ప్రస్తుతం ఆమె కోలుకుంటోందని తెలిపారు. బాధితురాలి తల్లి మాట్లాడుతూ.. ‘‘నా కూతురికి మతిస్థిమితం లేదు. ఎప్పుడూ ఆమెను ఇంట్లో ఎవరో ఒకరు కనిపెట్టుకునే ఉంటాం. ఒంటరిగా ఉన్నప్పుడు ఆమె ఆభరణాలను తినేసి ఉంటుంది. ఇంట్లో ఆభరణాలు మిస్సవుతుంటే మాకు అర్థం కాలేదు. ఎవరైనా దొంగిలిస్తున్నారని అనుమానం కలిగింది. ఆమెను అడిగితే ఏడ్చేదే తప్ప ఏమీ చెప్పేది కాదు. భోజనం చేసినప్పుడల్లా వాంతులు చేసుకునేది. వైద్యుల వద్దకు తీసుకెళ్తే ఈ విషయం తెలిసింది’’ అని తెలిపింది.