యువ్ న్యూస్ స్పోర్ట్స్ బ్యూరో:

భారత్ జట్టుకి కొత్త బ్యాటింగ్ కోచ్‌గా ప్రవీణ్ ఆమ్రే ఎంపికయ్యే సూచనలు కనిపిస్తున్నాయి. ఇటీవల ఇంగ్లాండ్ వేదికగా ముగిసిన వన్డే ప్రపంచకప్‌లో భారత్ జట్టు పేలవ బ్యాటింగ్ ప్రదర్శనతో విమర్శలు ఎదుర్కొన్న విషయం తెలిసిందే. ముఖ్యంగా మిడిలార్డర్ వైఫల్యం, నెం.4లో నిలకడైన బ్యాట్స్‌మెన్‌ లేకపోవడం, ధోనీ బ్యాటింగ్ ఆర్డర్‌లో మార్పులు.. భారత్ జట్టు సెమీస్‌లో ఓడి ఇంటిబాట పట్టడానికి కారణమయ్యాయి. దీంతో.. బ్యాటింగ్ కోచ్ సంజయ్ భంగర్‌పై బీసీసీఐ గుర్రుగా ఉంది. భారత హెడ్ కోచ్‌తో పాటు బ్యాటింగ్, బౌలింగ్, ఫీల్డింగ్ కోచ్‌ల భర్తీ కోసం తాజాగా బీసీసీఐ నోటిఫికేషన్ విడుదల చేయగా.. బ్యాటింగ్ కోచ్ పదవిని ఆశిస్తూ మాజీ క్రికెటర్ ప్రవీణ్ ఆమ్రే దరఖాస్తు చేసుకున్నాడు. హెడ్ కోచ్ పదవి కోసం ఇప్పటికే రవిశాస్త్రితో పాటు టామ్ మూడీ, మహేల జయవర్దనె, రాబిన్ సింగ్ తదితరులు అప్లై చేయగా.. బ్యాటింగ్ కోచ్‌‌ పోస్ట్ కోసం ఫస్ట్ దరఖాస్తు చేసుకుంది ప్రవీణ్ ఆమ్రేనే కావడం విశేషం. దీంతో.. భంగర్‌ స్థానంలో ఆమ్రేని బ్యాటింగ్ కోచ్‌గా ఎంపిక చేసే అవకాశం ఉంది. 2014లో భారత్ జట్టు బ్యాటింగ్ కోచ్‌గా బాధ్యతలు చేపట్టిన సంజయ్ భంగర్ సుదీర్ఘకాలంగా టీమ్‌తోనే ఉన్నాడు. మధ్యలో అనిల్ కుంబ్లే, రవిశాస్త్రి రూపంలో కోచ్‌లు మారినా.. అతని స్థానం మాత్రం మారలేదు. కానీ.. తాజాగా భారత్ జట్టు బ్యాటింగ్‌లో వైఫల్యాల నేపథ్యంలో.. భంగర్‌ ఇక టీమ్‌ని వీడే సూచనలు కనిపిస్తున్నాయి. అండర్-19 టీమ్‌తో పాటు ఐపీఎల్‌లో కొన్ని జట్లకి కోచ్‌గా పనిచేసిన ప్రవీణ్ ఆమ్రే.. అజింక్య రహానె, సురేశ్ రైనా, శ్రేయాస్ అయ్యర్, దినేశ్ కార్తీక్, రాబిన్ ఉతప్ప తదితరులకి వ్యక్తిగత బ్యాటింగ్ కోచ్‌గా కూడా పనిచేశాడు.