యువ్ న్యూస్ జనరల్ బ్యూరో:

దేశీ దిగ్గజ బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) తన కస్టమర్లకు వివిధ రకాల సేవలు అందిస్తోంది. ఇందులో గోల్డ్ ఫిక్స్‌డ్ డిపాజిట్ స్కీమ్ కూడా ఒక భాగం. దీని పేరు పునర్నిర్మిత గోల్డ్ డిపాజిట్ స్కీమ్ (ఆర్-జీడీఎస్).
గోల్డ్ డిపాజిట స్కీమ్‌‌లో బంగారాన్ని డిపాజిట్ చేయడం వల్ల రక్షణతోపాటు రాబడి కూడా పొందొచ్చు. బ్యాంక్ డిపాజిట్ చేసిన బంగారానికి వడ్డీ చెల్లిస్తుంది. ఎవరి వద్దనైనా బంగారం నిరుపయోగంగా ఉంటే దాన్ని ఈ స్కీమ్‌లో పెట్టి రాబడి పొందొచ్చు.
కస్టమర్లు తమ వద్ద ఉన్న బంగారం కడ్డీలు, బంగారు నాణేలు, బంగారు నగలు వంటి వాటిని ఈ స్కీమ్‌లో డిపాజిట్ చేయవచ్చు. బంగారం ఆభరణాల్లోని రాళ్లను, ఇతర లోహాలను లెక్కలోకి తీసుకోరు. అప్లికేషన్ ఫామ్, ఐడెంటిఫికేషన్ ప్రూఫ్, అడ్రస్ ప్రూఫ్, ఇన్వెంటరీ ఫామ్ వంటి వాటిని సమ్పరించి గోల్డ్ డిపాజిట్ స్కీమ్‌లో చేరొచ్చు.
ఎస్‌బీఐ మూడు రకాల గోల్డ్ డిపాజిట్ స్కీమ్స్‌ను అందిస్తోంది. షార్ట్ టర్మ్ బ్యాంక్ డిపాజిట్ (ఎస్‌టీబీడీ), మీడియం టర్మ్ గవర్నమెంట్ డిపాజిట్ (ఎంటీజీడీ), లాంగ్ టర్మ్ గవర్నమెంట్ డిపాజిట్ (ఎల్‌టీజీడీ) అనేవి మూడు రకాల స్కీమ్స్.
షార్ట్ టర్మ్ బ్యాంక్ డిపాజిట్ కాలపరిమితి ఏడాది నుంచి 3 ఏళ్ల వరకు ఉంటుంది. మీడియా టర్మ్ గవర్నమెంట్ డిపాజిట్ స్కీమ్ టెన్యూర్ 5 నుంచి 7 ఏళ్లు. కేంద్ర ప్రభుత్వం తరుపున బ్యాంక్ ఈ డిపాజిట్లను స్వీకరిస్తుంది. లాంగ్ టర్మ్ గవర్నమెంట్ డిపాజిట్ స్కీమ్ కాలపరిమితి 12 నుంచి 15 ఏళ్లు ఉంటుంది. ఈ డిపాజిట్లను కూడా బ్యాంక్ కేంద్ర ప్రభుత్వం తరుపున స్వీకరిస్తుంది.
వ్యక్తిగత ఇన్వెస్టర్లు, పౌరులు, భాగస్వామ్య సంస్థలు, ఏకవ్యక్తి యాజమాన్య సంస్థలు, హిందూ అవిభాజ్య కుటుంబ ట్రస్ట్‌లు ఏవైనా ఇందులో డిపాజిట్‌ చేయవచ్చు. కనీసం 30 గ్రాముల బంగారాన్ని డిపాజిట్ చేసే సౌకర్యం ఉంది. బంగారానికి పరిమితి అంటూ ఏమీ లేదు ఎంతైనా డిపాజిట్ చేయవచ్చు. దీనిపై 0.5 శాతం నుంచి 2.5 శాతం వరకు వడ్డీ పొందొచ్చు.