యువ్ న్యూస్ జనరల్ బ్యూరో:

కామంతో కళ్లు మూసుకుపోయిన ఓ వ్యక్తి మద్యం మత్తులో కన్న కూతురిపైనే అఘాయిత్యానికి ప్రయత్నించాడు. బాలికను బెదిరించి తన కోరిక తీర్చుకోవాలనుకున్నాడు. బాలిక కేకలు విన్న పక్కింటి మహిళ అక్కడికి చేరుకుని తలుపు కొట్టడంతో నిందితుడు పరారయ్యాడు. ఈ ఘటన నెల్లూరు జిల్లాలో చోటుచేసుకుంది.
నెల్లూరు నగరంలోని సంతంపేటలో నివాసముండే దంపతులకు ఇద్దకు కుమార్తెలు, ఓ కుమారుడు ఉన్నారు. భార్య ఉపాధి నిమిత్తం దుబాయికి వెళ్లింది. వారి పెద్దకుమార్తెకు వివాహం కాగా.. కొడుకు వేరే ప్రాంతంలో మెకానిక్ షాపులో పనిచేస్తున్నాడు. చిన్న కూతురు(13) తండ్రి వద్దే ఉంటోంది. రోజూ పక్కింటి మహిళ వద్ద నిద్రించి ఉదయాన్నే ఇంటికి వస్తోంది. ఈ క్రమంలో సోమవారం రాత్రి తండ్రి బాలికను పక్కింటికి వెళ్లొద్దని, తన వద్దే పడుకోవాలని చెప్పి బయటకు వెళ్లాడు.
తండ్రి మాటలు నమ్మిన బాలిక సరేనంటూ ఇంట్లోనే పడుకుంది. కొద్దిసేపటి తర్వాత మద్యం మత్తులో ఇంటికి వచ్చిన ఆ కామాంధుడు కన్నకూతురిపైనే అత్యాచారం చేయబోయాడు. బాలిక కేకలు విన్న పక్కింటి మహిళ వెంటనే అక్కడికి వచ్చి తలుపులు కొట్టింది. పెద్ద పెద్ద శబ్దాలు రావడంతో స్థానికులు నిద్రలేచి అక్కడికి చేరుకున్నారు. వారికి దొరికితే తనకు దేహశుద్ధి ఖాయమని అనుకున్న ఆ కామాంధుడు అక్కడి నుంచి పారిపోయాడు. స్థానికులు బాలికను రక్షించి పోలీసులకు ఫిర్యాదు చేశారు. సంతపేట సీఐ రాములు నాయక్ కేసు నమోదు చేసుకుని మంగళవారం నిందితుడిని అరెస్ట్ చేశారు. కన్నకూతురిపైనే అఘాయిత్యానికి పాల్పడిన నిందితుడిపై స్థానికులు ఆగ్రహం వ్యక్తం చేస్తున్నారు.