యువ్ న్యూస్ జనరల్ బ్యూరో:

రాజమండ్రి కేంద్ర కారాగారంలో 27 మంది ఎయిడ్స్ బాధితులు ఉన్నట్టు జైళ్ల శాఖ వెల్లడించింది. రాజమండ్రి సెంట్రల్ జైల్లో శిక్ష అనుభవిస్తోన్న ఓ ఖైదీ తనకు ఎయిడ్స్ ఉందని, చికిత్స కోసం రెండు నెలలు బెయిల్ మంజూరు చేయాలని హైకోర్టులో పిటిషన్ దాఖలు చేశారు. ఈ పిటిషన్‌పై విచారణ చేపట్టిన హైకోర్టు జైళ్లశాఖను వివరణ కోరింది. విచారణ సందర్భంగా హైకోర్టు పలు ప్రశ్నలను సంధించింది. రాజమండ్రి జైల్లో 27 మంది ఏయిడ్స్ బాదితులు ఉన్నారని జైళ్లశాఖ చెప్పగా, వారికి జైల్లోకి వచ్చాక ఎయిడ్స్ వచ్చిందా? అంతకు ముందే ఉందా అని హైకోర్టు ప్రశ్నించింది. వీరిలో 19 మంది జైలుకు రాక ముందే ఎయిడ్స్ బాధితులని, ఇక్కడకు వచ్చిన తర్వాత మరో ఎనిమిది మంది దీని బారినపడ్డారని జైళ్ల శాఖ తరఫు న్యాయవాది తెలిపారు. కేంద్ర రాగారంలో ఎంతమంది ఖైదీలు ఉంటారని న్యాయస్థానం ప్రశ్నించగా, మొత్తం 1500 మంది ఖైదీలు ఉంటారని ఆయన వివరించారు. గుంటూరు జిల్లాకు చెందిన ఖైదీ దాఖలు చేసిన పిటిషన్ పై గురువారం హైకోర్టులో విచారణ జరిగింది. ఇది చాలా సీరియస్ వ్యవహారమని పూర్తి వివరాలతో కోర్టుకి హాజరు కావాలని జైలు సూపరిండెంట్‌ను హైకోర్టు ఆదేశించింది. ప్రస్తుతం ఏయిడ్స్ బాధిత ఖైదీలకి ఎలాంటి చికిత్స అందజేస్తోన్నారో వివరాలు తెలియజేయాలని హైకోర్టు పేర్కొంది. దేశంలోని టాప్-5 జైళ్లలో రాజమండ్రి సెంట్రల్ జైలు నాలుగో స్థానంలో నిలిచింది. దీనికి శతాబ్దాల ఘన చరిత్ర ఉంది. 19వ శతాబ్దంలో రాజమండ్రి కొంత కాలం డచ్ వారి పరిపాలనలొ ఉంది. డచ్ వారు అక్కడ ఓ కోటను దీనిని నిర్మించారు. తరువాత ఆంగ్లేయుల పరిపాలనలో ఈ కోట కారాగారంగా మార్చబడింది. 1870లో దీనికి సెంట్రల్ జైల్ హోదా కల్పించారు. ఆంధ్రప్రదేశ్‌లోనే అతి పురాతనమైన, అన్ని రకాల సురక్షిత వ్యవస్థలు కలిగిన జైలు ఇది. గోదావరి నది నుంచి ప్రవాహించే ఒక నది పాయ ఈ జైలులో ప్రవహించేది, కానీ, దాని మార్గం ఇప్పుడు మారిపోయింది