సరిహద్దుల్లో దాయాది పాక్ మరోసారి దుస్సాహసానికి ఒడిగట్టింది. జమ్మూ కశ్మీర్‌లోని వాస్తవాధీన రేఖ వెంబడి కాల్పుల ఉల్లంఘనకు పాల్పడింది. నౌషేరా, రాజౌరీ సెక్టార్లలో భారత ఆర్మీ పోస్టులే లక్ష్యంగా పాక్ రేంజర్లు కాల్పులకు తెగబడ్డారు. పాక్ సైన్యం విచక్షణారహితంగా జరిపిన కాల్పుల్లో భారత సైన్యానికి చెందిన లాన్స్ నాయక్ సందీప్ థాపా (35) అమరుడయ్యారు. దీంతో అప్రమత్తమైన భారత సైన్యం దీటుగా స్పందించింది. ఈ ఘటనపై ఆర్మీకి చెందిన ఓ ఉన్నతాధికారి మాట్లాడుతూ.. శనివారం ఉదయం 6.30 గంటలకు పాక్ సైన్యం కాల్పుల ఉల్లంఘనకు పాల్పడిందని తెలిపారు. తేలికపాటి ఆయుధాలు, షెల్స్‌ను పాక్ ప్రయోగిస్తోందని వెల్లడించారు. పాక్ దాడిని భారత బలగాలు దీటుగా తిప్పికొడుతున్నాయని ఆయన పేర్కొన్నారు. సందీప్ థాపా స్వస్థలం ఉత్తరాఖండ్‌లోని డెహ్రాడూన్. పాక్ సైన్యం కాల్పుల్లో తీవ్రంగా గాయపడిన థాపాను చికిత్స కోసం హాస్పిటల్‌కు తరలించామని, అప్పటికే అతడు ప్రాణాలు కోల్పోయారని ఆ అధికారి వివరించారు. రెండు రోజుల కిందట భారత సైన్యం జరిపిన ఎదురు కాల్పుల్లో నలుగురు పాక్ రేంజర్లు హతమయ్యారు. ఆ దాడికి ప్రతీకారంగానే పాక్ దుశ్చర్యకు దిగినట్లు తెలుస్తోంది. ఉరి, రాజౌరీ సెక్టార్లలోని భారత పోస్టులే లక్ష్యంగా గురువారం పాకిస్థాన్ సైన్యం కాల్పులకు దిగింది. పాక్ చర్యలను సమర్ధవంతంగా తిప్పికొట్టి, ఎదురుదాడి చేసింది. ఈ కాల్పుల్లో నలుగురు పాక్ రేంజర్లు హతమవ్వడంతో ప్రతీకార దాడులకు పాల్పడుతోంది. ఓ వైపు కశ్మీర్ విషయంలో భారత్ ఇచ్చిన ఝలక్‌తో పాకిస్థాన్‌కు గొంతులో పచ్చి వెలక్కాయ పడినట్టయ్యింది. భారత్‌పై తన ఆక్రోశాన్ని వెల్లగక్కుతూ రెచ్చగొట్టే ప్రయత్నం చేస్తోంది. వాస్తవాధీన రేఖ వెంబడి కవ్వింపు చర్యలకు పాల్పడుతూ ఉగ్రవాదుల చొరబాట్లకు సహకరించే ప్రయత్నం చేస్తోంది. గత మూడు రోజులుగా ఎల్ఓసీ సమీపంలోని ఉగ్రవాద శిబిరాల నుంచి 12సార్లు ఇలాంటి ప్రయత్నాలు చేసినట్టు రక్షణ శాఖ అధికారులు వెల్లడించారు. ముఖ్యంగా ఉరి, నౌగామ్ సెక్టార్లలో పాక్ ఆర్మీ ఇలాంటి కవ్వింపు చర్యలకు పాల్పడుతున్నట్టు తెలిపారు. జమ్మూ కశ్మీర్‌లో ఉగ్రవాదులు దాడులకు ఆస్కారముందున్న నిఘా వర్గాల సమాచారంతో సైన్యం మరింత అప్రమత్తమయ్యింది. సరిహద్దుల వెంబడి భద్రతను మరింత కట్టుదిట్టం చేసింది. పాకిస్థాన్ సాయంతో దేశంలోకి చొరబడేందుకు ఉగ్రవాదులు చేస్తున్న ప్రయత్నాలను భగ్నం చేస్తున్నామని, ఉగ్రవాద వ్యతిరేక ఆపరేషన్ మరింత పకడ్బంధీగా చేపట్టామని నార్తర్న్ ఆర్మీ కమాండర్ లెఫ్టినెట్ జనరల్ రణ్‌బీర్ సింగ్ తెలిపారు. సైన్యం పూర్తిస్థాయిలో సన్నద్ధతతో ఉందని, పాక్ వైపు నుంచి ఎలాంటి దాడులనైనా తిప్పికొట్టి, దీటుగా బదులిస్తామని ఆయన వ్యాఖ్యానించారు. గతంలో పాక్‌కు ఎలాంటి పరాభవం జరిగిందో గుర్తుచేసుకోవాలని ఆయన హెచ్చరించారు