కశ్మీర్‌కు స్వయంప్రతిపత్తి కల్పించే ఆర్టికల్ 370, 35ఏలను కేంద్ర ప్రభుత్వం రద్దుచేయడాన్ని పాకిస్థాన్ తీవ్రంగా వ్యతిరేకిస్తోన్న విషయం తెలిసిందే. ఈ అంశాన్ని అంతర్జాతీయ వేదికలపై చర్చించి, భారత్‌ను దోషిగా నిలబెట్టేందుకు దాయాది చేస్తున్న ప్రయత్నాలు ఇన్నీ అన్నీ కావు. మొన్నటికి మొన్న ఐక్యరాజ్యసమితి భద్రతా మండలిలో చైనా సాయంతో సన్నాయి నొక్కులు నొక్కింది. అయితే, వీటిని భారత్ సమర్ధంగా తిప్పికొట్టి, వీటో అధికారం కలిగిన అగ్రరాజ్యాలు సైతం పాక్‌కు తలంటేలా చేసింది. కశ్మీర్ అంశంతో లబ్ది పొందాలని భావించిన పాకిస్థాన్‌కు ఈ విషయంలో రిక్తహస్తమే మిగిలింది. కశ్మీర్ విషయంలో భారత్‌తో కూర్చుని మాట్లాడుకోవాలని, ఇతరులు జోక్యం చేసుకోరని పాక్ ప్రధాని ఇమ్రాన్‌తో డొనాల్డ్ ట్రంప్ సైతం చెప్పేయడంతో అది ఒంటరిగా మిగిలిపోయింది.  పాక్ తీరుపై సోషల్ మీడియాలో తీవ్రంగా విరుచుకుపడుతున్నారు. ఇమ్రాన్‌కు సంబంధించిన కొన్ని ఫొటోలు సామాజిక మాధ్యమాల్లో హల్‌చల్ చేస్తున్నాయి. గూగుల్‌లో ‘బికారి’ అని కొట్టి, ఇమేజ్ సెర్చ్ చేస్తే అందులో పాక్ ప్రధాని ఇమ్రాన్‌ఖాన్ ఫొటోలు దర్శనమిస్తున్నాయి. దీంతో పాక్ ప్రధాని ఫొటోలను నెటిజన్లు ట్రోల్ చేస్తూ తమ ఆగ్రహాన్ని వ్యక్తం చేస్తున్నారు. అలా ఎందుకు చూపిస్తుందో గూగుల్‌కే తెలియాలి అని కొందరు అంటుంటే.. తమ వంతుగా డేటా రీఛార్జి చేయిస్తామని మరికొందరు వ్యంగ్యాస్త్రాలు సంధిస్తున్నారు. అయితే, గూగుల్‌లో సాంకేతిక లోపం తలెత్తడం వల్ల గతంలో అమెరికా అధ్యక్షుడు ట్రంప్‌ విషయంలోనూ ఇలాగే జరిగింది. ‘ఇడియట్’ అని టైప్ చేస్తే ట్రంప్ ఫోటో వచ్చింది. దీనిపై అమెరికా కాంగ్రెస్ విచారణకు సైతం ఆదేశించింది. ఈ సందర్భంగా గూగుల్ సీఈఓ సుందర్ పిచాయ్‌ను డెమొక్రాటిక్ సభ్యురాలు జో లోఫెగ్రెన్ ప్రశ్నించారు. మరోవైపు, జమ్మూ కశ్మీర్‌ను రెండుగా విడగొట్టి, కేంద్రపాలిత ప్రాంతాలుగా చేయడాన్ని పాక్ తీవ్ర అభ్యంతరం తెలుపుతోంది. అంతేకాదు, భారత్‌తో ద్వైపాక్షిక వాణిజ్యాన్ని రద్దుచేసుకున్నట్టు ప్రకటించింది.