యువ్ న్యూస్ పొలిటికల్ బ్యూరో:

అవినీతి ఆరోపణల కేసులో కాంగ్రెస్ ట్రబుల్ షూటర్ డీకే శివకుమార్‌ను ఎన్‌ఫోర్స్‌మెంట్ డైరెక్టరేట్ సెప్టెంబరు 3న అదుపులోకి తీసుకున్న విషయం తెలిసిందే. ఇవి బీజేపీ కక్ష సాధింపు రాజకీయాల్లో భాగమేనంటూ ప్రతిపక్ష కాంగ్రెస్ విమర్శలు గుప్పిస్తోంది. అయితే, శివకుమార్‌కు కర్ణాటక ముఖ్యమంత్రి బీఎస్ యడియూరప్ప పరోక్షంగా మద్దతు తెలపడం ఆసక్తికరంగా మారింది. శివకుమార్ అరెస్టు తనకు సంతోషం కలిగించలేదని, ఆయన నిర్దోషిగా బయటకు రావాలని భగవంతుని ప్రార్థిస్తున్నానని యడ్డీ వ్యాఖ్యానించారు. అంతేకాదు, కక్షసాధింపు రాజకీయాలకు తాను అతీతమని, చట్టం తన పనిని తాను చేసుకుపోతుందని అన్నారు. ఒకవేళ ఆయన బయటకు వస్తే తాను సంతోషిస్తానని అన్నారు. డిప్యూటీ సీఎం గోవింద్ కర్జోల్‌తో కలిసి బుధవారం మీడియాతో మాట్లాడిన యడ్డీ.. శివకుమార్ నిర్దోషిగా బయటకు రావాలని కోరుకుంటున్నాని పేర్కొన్నారు.యడియూరప్ప క్యాబినెట్‌లోని సీనియర్ మంత్రులు జగదీశ్ శెట్టర్, ఆర్ అశోక, బసవరాజ్ బొమ్మాయి, వి సోమన్న, బి శ్రీరాములు, లక్ష్మణ్ సావాడిలపై అవినీతి ఆరోపణలున్నా వారిపై చట్టపరంగా చర్యలు ఎందుకు తీసుకోవడం లేదని కాంగ్రెస్ దుమ్మెత్తిపోస్తోంది. కాగా, శివకుమార్ విషయంలో సీఎం యడియూరప్ప సానుకూలంగా ఉండటానికి బలమైన కారణాలే ఉన్నాయని పార్టీ వర్గాలు అంటున్నాయి. శివకుమార్‌కు వ్యతిరేకంగా వ్యాఖ్యలు చేస్తే తమ పార్టీకి అండగా నిలిచిన ఒక్కలిగ సామాజిక వర్గం ఓటు బ్యాంకుపై తీవ్ర ప్రభావం చూపుతుందని సీఎం భావిస్తున్నట్టు తెలిపాయి.దక్షిణ కర్ణాటకలోని బలమైన ఒక్కలిగ సామాజిక వర్గం తొలిసారి బీజేపీకి ఈ సార్వత్రిక ఎన్నికల్లో మద్దతుగా నిలిచింది. దీంతో కర్ణాటకలోని 28 పార్లమెంటు స్థానాలకు గానూ 25 బీజేపీ ఖాతాలో చేరాయి. ఇక, మాండ్యలో అధిక సంఖ్యలో ఉన్న ఒక్కలిగలు జేడీ(ఎస్)ను కాదని బీజేపీ మద్దతు ప్రకటించిన స్వతంత్ర అభ్యర్థి సుమలతకు ఓట్లేశారు. లింగాయత్‌ల ఆధిపత్యం చెలాయించే బీజేపీ.. ఒక్కలిగ వర్గం ప్రభావం అధికంగా ఉన్న కాంగ్రెస్-జేడీ(ఎస్) సంకీర్ణ ప్రభుత్వాన్ని రెండు నెలల కింద కూలదోసి అధికారం చేపట్టింది. దీంతో ఆ వర్గం ఆగ్రహానికి గురికాకుండా యడ్డీ జాగ్రత్తవహిస్తున్నారని పార్టీ వర్గాలు పేర్కొంటున్నాయి.కాంగ్రెస్-జేడీఎస్ సంకీర్ణంలో ఒక్కలిగ సామాజిక వర్గానికి చెందిన హెచ్‌డీ కుమారస్వామి ముఖ్యమంత్రిగా పనిచేశారు. ఈ సమయంలో ప్రతిపక్ష నేతల ఫోన్ల ట్యాపింగ్‌కు పాల్పడినట్టు ఆరోపణలు రావడంతో ఈ కేసు దర్యాప్తును సీఎం యడియూరప్ప సీబీఐకి అప్పగించారు. ఫోన్ ట్యాపింగ్ విషయంలో తమ వర్గం నేత కుమారస్వామిపై సీఎం చేసిన వ్యాఖ్యలతో ఒక్కలిగలు కోపంతో రగలిపోతున్నారు. దీన్ని గ్రహించిన సీఎం.. తన క్యాబినెట్‌లోని దూకుడుగా ఉన్న యువనేతలకు పలు సూచనలు చేశారని, కుమారస్వామిపై బహిరంగా ఎలాంటి వ్యాఖ్యలు చేయరాదని ఆదేశించినట్టు ఓ మంత్రి తెలిపారు. డిప్యూటీ సీఎం అశ్వత్థ నారాయణ మాత్రమే శివకుమార్‌పై విమర్శలు గుప్పించారు. ఎందుకంటే ఈయన కూడా అదే సామాజిక వర్గానికి చెందిన వ్యక్తి కావడంతో మినహాయింపు లభించింది.కాగా, శివకుమార్ అరెస్ట్‌పై ఆగ్రహంతో రగలిపోతున్న ఒక్కలిగ నేతలు.. అరెస్ట్‌కు వ్యతిరేకంగా వచ్చే వారం భారీ ర్యాలీ నిర్వహించాలని నిర్ణయించారు. దీనిపై గురువారం బెంగళూరులో జరిగిన భేటీకి వివిధ ఒక్కలిగ సంస్థలకు చెందిన ప్రతినిధులు హాజరయ్యారు. కర్ణాటక రక్షణ వేదిక అధ్యక్షుడు నారాయణ గౌడ, ఒక్కలిగర్ సంఘ్ హితారక్షణ వేదిక ప్రెసిడెంట్ పుట్టస్వామి గౌడ తదితర నేతలు ఈ సమావేశంలో పాల్గొన్నారు