నాన్న ఒత్తడిలోనే ఆత్మహత్య చేసుకున్నారు : కూతురు విజయలక్ష్మీ
హైద్రాబాద్, సెప్టెంబర్ 16 
టీడీపీ సీనియర్ నేత కోడెల శివప్రసాద రావు మృతిపై పలు అనుమానాలు నెలకొన్న వేళ.. ఆయన కుమార్తె విజయలక్ష్మి పోలీసులకు కీలక వివరాలు తెలిపారు. తమ తండ్రి మృతిపై ఎలాంటి అనుమానాలు లేవని ఆమె చెప్పారు. ఆయన తీవ్ర ఒత్తిడిలో ఉన్నారని చెప్పారు. సోమవారం ఉదయం అల్పాహారం చేసిన తర్వాత 11 గంటల సమయంలో ఫస్ట్ ‌ఫ్లోర్‌లోని తన గదిలోకి వెళ్లారని.. ఎంతసేపటికీ బయటకి రాకపోయేసరికి అనుమానంతో అక్కడికి వెళ్లి చూడగా ఉరేసుకొని కనిపించారని ఆమె తెలిపారు.గన్‌మ్యాన్, డ్రైవర్ సాయంతో తన తండ్రిని బసవతారకం ఆస్పత్రికి తరలించినట్లు కోడెల కుమార్తె తెలిపారు. గదిలో ఎలాంటి సూసైడ్ నోట్ లేదని వెల్లడించారు. గత రాత్రి ఇంట్లో ఎలాంటి గొడవా జరగలేదని ఆమె తెలిపారు. తెలంగాణ పోలీసులు ఆమె స్టేట్‌‌మెంట్‌ను రికార్డు చేశారు. తనకు, తన కుటుంబసభ్యులకు జరుగుతున్న అనుమానాల పట్ల కోడెల కొద్ది రోజులుగా తీవ్ర మనస్తాపానికి గురైనట్లు ఆయన కుమార్తె చెప్పినట్లు తెలుస్తోంది.ఉరేసుకున్నారని కుటుంబ సభ్యులు చెప్పారు: డీసీపీ
టీడీపీ సీనియర్ నేత, ఏపీ మాజీ స్పీకర్ కోడెల శివప్రసాద రావు కోడెలది ఆత్మహత్యా? కాదా? అనేది పోస్టుమార్టం తర్వాత నిర్ధారిస్తామని డీసీపీ శ్రీనివాస్‌ వెల్లడించారు. కోడెల ఉరి వేసుకున్నారని, ఆస్పత్రికి తీసుకొచ్చేటప్పటికే మరణించారని ఆయన కుటుంబ సభ్యులు తెలిపినట్లు డీసీపీ తెలిపారు.కోడెల ఉదయం 11 గంటలకు తన పడక గదిలో పడి ఉన్నారని, భార్య, కుమార్తె ఆయణ్ని ఆస్పత్రికి తీసుకొచ్చారని చెప్పారు. అప్పటికే కోడెల చనిపోయినట్లు వైద్యులు నిర్ధరించారని డీసీపీ వెల్లడించారు. పోస్టుమార్టం తర్వాత కోడెల భౌతికకాయాన్ని ఎన్టీఆర్ ట్రస్టు భవన్‌కు తరలించారు.