సెక్స్ స్కాండిల్ లో స్టూడెంట్స్, జర్నలిస్టులు
భోపాల్, 
మధ్యప్రదేశ్‌లో బయటకు వచ్చిన సెక్స్ కుంభకోణం కేసు రాజకీయ ప్రకంపనలు సృష్టిస్తోంది. ఎప్పుడు ఎవరి పేరు బయటకు వస్తోందనని రాజకీయ నాయకులు, ఐఏఎస్ అధికారులు హడలిపోతున్నారు. ఈ కేసులో ఇప్పటికే మాజీ సీఎం, మాజీ గవర్నర్, 8 మంది మాజీ మంత్రులు, 13 మంది బ్యూరోక్రాట్లు చిక్కుల్లో పడ్డారు. ఈ వ్యవహారం కేవలం మధ్యప్రదేశ్‌కే పరిమితం కాలేదు. మహారాష్ట్ర, చత్తీస్‌గఢ్, తెలుగు రాష్ట్రాలకు కూడా విస్తరించినట్టు పోలీసులు పేర్కొంటున్నారు. దేశంలోనే ఇదే అతిపెద్ద సెక్స్‌ కుంభకోణమని, రాజకీయ నాయకులు, అధికారులతోపాటు జర్నలిస్టులకూ ఇందులో పాత్ర ఉందని అంటున్నారు.దిగువ మధ్యతరగతికి చెందిన కనీసం 24 మంది కాలేజీ అమ్మాయిలకు ఖరీదైన బహుమతులను ఆశగా చూపి వారి ఆకర్షించి, అధికారులు, రాజకీయ నాయకులకు వలపు వల విసిరినట్టు సిట్ గుర్తించింది. ఈ కేసులో ప్రధాన నిందితురాలు శ్వేతను అదుపులోకి తీసుకున్న పోలీసులు విచారణలో ఆమె నుంచి కీలక విషయాలను రాబట్టారు. యువతలతో అధికారులు, రాజకీయ నేతలకు వలపుల బాణం వేయించి, వారు ఏకంతంగా ఉన్నప్పుడు వీడియోలు తీసినట్టు గుర్తించారు. వీటి సాయంతో వందలాది కోట్ల రూపాయల కాంట్రాక్టులను పొందినట్టు తెలిసింది. కాలేజీ అమ్మాయిల్ని వారి తండ్రి వయసున్న అధికారుల వద్దకు పంపి, సెక్స్‌లో పాల్గొన్నప్పుడు వీడియోలు తీసినట్టు విచారణలో వెల్లడించింది.ఇండోర్‌ మున్సిపల్ కార్పొరేషన్‌ ఇంజనీర్‌ హర్బజన్‌ సింగ్‌ ఫిర్యాదుతో ఈ వ్యవహారం బయటకు వచ్చింది. నిందితురాలు ఆర్తి దయాల్‌, హర్బజన్‌ సింగ్‌ స్నేహితులు. మోనికా యాదవ్‌కు ఉద్యోగం కావాలంటూ హర్బజన్‌కు పరిచయం చేసిన ఆర్తి.. ఆ తర్వాత ఇద్దరినీ ఓ హోటల్‌కు పంపింది. ఇద్దరూ సన్నిహితంగా ఉన్నప్పుడు వీడియో తీసింది. దానిని అడ్డం పెట్టుకుని రూ.3 కోట్లు ఇవ్వాలంటూ ఆర్తి దయాల్‌ బ్లాక్‌ మెయిల్‌ చేసింది. ఆ తరువాత మోనికా కూడా తనకు డబ్బులివ్వాలని డిమాండ్‌ చేసింది. వారి వేధింపులకు విసిగిపోయిన హర్బజన్‌ సింగ్‌ ఇండోర్‌ పోలీసులకు ఫిర్యాదు చేశాడు.తొలుత రూ.50 లక్షలు ఇస్తానని, ఇండోర్‌కు రావాలని ఆర్తి దయాల్‌కు హర్బజన్ ఒప్పందానికి వచ్చాడు. ఇంతలో పోలీసులకు ఫిర్యాదు చేయడంతో ఇండోర్‌కు వస్తుండగానే ఆర్తి, మోనికా యాదవ్‌ను పోలీసులు అరెస్టు చేశారు. ప్రాథమిక విచారణలో తీగలాగితే డొంక కదిలినట్టు రాష్ట్రవ్యాప్తంగా వీరి బాధితులు ఉన్నట్లు గుర్తించారు.శ్వేతా స్వప్నిల్‌ జైన్‌ బీజేపీ ఎమ్మెల్యే ఇంట్లో ఉంటూనే ఈ సెక్స్ రాకెట్ నిర్వహిస్తోంది. మహారాష్ట్రలోని మరాఠ్వాడా ప్రాంతానికి చెందిన ప్రముఖ రాజకీయ నేత సహ బడా బాబులందరితోనూ ఆమెకు సన్నిహిత సంబంధాలు ఉన్నాయని పోలీసు వర్గాలు తెలిపాయి. ఈ స్కాంలో నిందితురాలు ఆర్తీ దయాల్‌ ఎనిమిది నెలల కిందట భర్తపై వరకట్నం కేసు పెట్టింది. ఈ ముఠాలోని మరో మహిళ బర్ఖా సోనీ కాంగ్రెస్‌ ఐటీ సెల్‌ మాజీ అధికారి అమిత్‌ సోనీ భార్య కావడం విశేషం. రాసలీలలకు సంబంధించి ఆర్తి దయాల్‌ గ్యాంగ్‌ వేధింపులు తట్టుకోలేక ఓ మాజీ ఎంపీ ఆత్మహత్యాయత్నం చేశారు. దాంతో, వలపు వలలో ఆయన చిక్కుకున్నట్లు బయటకు వచ్చింది. అనంతరం, కాంగ్రెస్‌ ఆయనను పార్టీ నుంచి సస్పెండ్‌ చేసింది.