కేరళలో మగ సెక్స్ వర్కర్లు
తిరువనంతపురం, 
ఆర్థిక పరిస్థితుల కారణంగా ఏటేటా సెక్స్ వర్కర్ల సంఖ్య పెరుగుతోంది. అయితే.. సాధారణంగా మహిళలు ఈ వృత్తిలోకి ఎక్కువగా వస్తుంటారు. కానీ, మారుతున్న సామాజిక పరిస్థితుల నేపథ్యంలో మేల్ సెక్స్ వర్కర్ల సంఖ్య కూడా పెరుగుతోంది. కేరళ రాష్ట్రంలో ఇటీవల వెల్లడైన ఓ సర్వే నివేదిక ఈ విషయాన్ని స్పష్టం చేస్తోంది.కేరళకు చెందిన ఎయిడ్స్ కంట్రోల్ సొసైటీ ఆ రాష్ట్రంలో సెక్స్ వర్కర్లపై ఓ సర్వే చేసింది. ఆ వివరాల ప్రకారం.. ప్రస్తుతం కేరళలో 17,000 మంది మహిళా సెక్స్ వర్కర్లు ఉండగా.. 13,331 మంది మగవారు ఉన్నారు. రాష్ట్రానికి వలస వెళుతున్న సెక్స్ వర్కర్ల సంఖ్య కూడా పెరుగుతున్నట్లు సర్వేలో వెల్లడైంది. ఇక కేరళలో మగ సెక్స్ వర్కర్లు ఎక్కువగా కోజికోడ్ జిల్లా నుంచి వస్తున్నట్లు సర్వేలో తేలింది.మగ సెక్స్ వర్కర్లలో 36 నుంచి 46 ఏళ్ల మధ్య వయసు వారే ఎక్కువగా ఉన్నట్లు తేలింది. నగరాల్లోని హోటళ్లు, ఫ్లాట్లలో ఉంటూ ఈ వృత్తి కొనసాగిస్తున్నట్లు సర్వేలో పేర్కొన్నారు. కేరళలో గ్రామాల నుంచి పట్టణాలకు వచ్చిన వారు ఈ అసాంఘిక కార్యకలాపాల వైపు ఎక్కువగా మొగ్గు చూపుతున్నట్లు సర్వేలో వెల్లడైంది.కేరళకు ఇతర రాష్ట్రాల నుంచి కూడా సెక్స్ వర్కర్లు ఎక్కువగా వలస వస్తుండటం గమనార్హం. బెంగాల్, బీహార్, ఒడిశా నుంచి మహిళా సెక్స్ వర్కర్లు ఎక్కువగా వలస వస్తున్నారు. ముఖ్యంగా బెంగాల్ నుంచి చాలా మంది సెక్స్ వర్కర్లు ఏజెంట్ల ద్వారా కేరళకు వస్తున్నారని సర్వేలో పేర్కొన్నారు. బీహార్ నుంచి వలస వస్తున్న పురుషుల్లో ఎక్కువ మంది ఈ వృత్తిలోకి వస్తున్నారు. ఈ వృత్తిలోకి వస్తున్న వారు క్రమంగా వారి బంధువులను కూడా తీసుకొస్తున్నట్లు సర్వే వెల్లడించింది.మధ్య వయసు వారు సెక్స్ వృత్తిలో కొనసాగుతుండగా.. వయసు మీద పడ్డ వారు ఏజెంట్లుగా మారుతున్నట్లు సర్వే ద్వారా వెల్లడైంది. ఈ సెక్స్ వర్కర్లలో 10,000 మందికి పైగా డ్రగ్స్‌కు అలవాటు పడ్డారని.. వీరిలో పలువురికి హెచ్‌ఐవీ కూడా ఉందని సర్వేలో తేలింది..నేటి యువత అసాంఘిక కార్యకలాపాల వైపు మొగ్గు చూపుతున్న తీరును ఈ సర్వే వెల్లడిస్తోంది. ఒక కేరళ రాష్ట్రంలోనే కాదు, దేశంలోని అన్ని ప్రధాన నగరాల్లోనూ సెక్స్ వర్కర్ల సంఖ్య పెరుగుతోంది. వ్యభిచారం సాగించడం కోసం వీరు అన్ని రకాల వ్యసనాలకు అలవాటు పడుతున్నారు. వ్యభిచార దందాలో స్త్రీలతో పురుషులు కూడా పోటీ పడుతుండటం శోచనీయం. పడుపు వృత్తి చేయడం ఏమాత్రం తప్పు కాదని ఫీలవుతుండటం ఆందోళన కలిగించే అంశం. ఇది తీవ్రమైన పరిణామాలకు దారితీయొచ్చు!