మహారాష్ట్రలో కొనసాగుతున్న ప్రతిష్టంభన
ముంబై, నవంబర్ 4,
మహారాష్ట్రలో ప్రభుత్వ ఏర్పాటుపై ప్రతిష్టంభన కొనసాగుతోంది. అటు బీజేపీ, ఇటు శివసేన ఎవ్వరూ తమ పంతం వీడటం లేదు. ఫలితాలు వెలువడి 10 రోజులు గడిచిపోయినా ఎవరు ప్రభుత్వాన్ని ఏర్పాటు చేస్తారనే అంశంపై సందిగ్దత నెలకుంది. ఫిఫ్టీ-ఫిఫ్టీ ఫార్ములాపై శివసేన భీష్మించుకు కూర్చుంది. బీజేపీ నుంచి ఎలాంటి స్పందన లేకపోవడంతో శివసేన ప్రత్యామ్నాయాలని పరిశీలిస్తామని సంకేతాలు పంపుతోంది. శివసేన వైఖరి చూస్తే ఎన్సీపీతో కలిసి ప్రభుత్వ ఏర్పాటుకు ప్రయత్నిస్తున్నట్టు కనబడుతోంది.తమకు 170 మంది ఎమ్మెల్యేల మద్దతు ఉందని, శివసేన నుంచే ముఖ్యమంత్రిగా ప్రమాణస్వీకారం చేస్తారని ఆ పార్టీ ఎంపీ, సామ్నా ఎడిటర్ సంజయ్ రౌత్ వ్యాఖ్యానించారు. అంతేకాదు, కర్ణాటకలో ఎమ్మెల్యేలను కొనుగోలుచేసి ప్రభుత్వాన్ని ఏర్పాటుచేసిన ఫార్ములా మహారాష్ట్రలో పనిచేయదని బీజేపీకి చురకలంటించారు. బీజేపీతో చర్చలంటూ జరిగితే ముఖ్యమంత్రి పీఠం గురించేనని సంజయ్ రౌత్ కుండబద్దలు కొట్టారు.అధికారాన్ని చెరో రెండున్నరేళ్లు పంచుకోడానికి బీజేపీ ఒప్పుకోకపోతే తాము ప్రత్యామ్నాయాలను వెదుక్కుంటామని శివసేన పేర్కొంది. మరో అడుగు ముందుకేసి.. బీజేపీ అహంకారపూరితంగా వ్యవహరిస్తోందని సామ్నా సంపాదకీయంలో దుయ్యబట్టింది. శివసేన అధికారం చేపడుతుందా? లేదా? అనేది భవిష్యత్తులో ప్రజలకే తెలుస్తుందని ఆ పార్టీ అధినేత ఉద్ధవ్ ఠాక్రే వ్యాఖ్యానించారు. ఠాక్రే వ్యాఖ్యలతో మహారాజకీయాలు మరింత వేడెక్కాయి. అలాగే, శివసేన తమకు 170 మంది ఎమ్మెల్యేల మద్దతు ఉందని చేసిన ప్రకటనపై భిన్న చర్చలు మొదలయ్యాయి.ఎన్నికల్లో బీజేపీ-శివసేన కూటమి 161 స్థానాల్లో విజయం సాధించిందని, మరి 170 మంది మద్దతు ఉందని చెప్పడంపై పలు ప్రచారాలు సాగుతున్నాయి. సంఖ్యా బలం ఉందని శివసేన చెప్పడం వెనుక ఆంతర్యం ఏంటి? కాంగ్రెస్-ఎన్‌సీపీ ఇండిపెండెట్లతో కలిసి ప్రభుత్వాన్ని ఏర్పాటు చేస్తుందా? అని రాజకీయ వర్గాలు గుసగుసలాడుకుంటున్నాయి. గవర్నర్‌ను కలిసి ప్రభుత్వ ఏర్పాటుకు తమకు అవకాశం ఇవ్వాలని శివసేన కోరుతుందనే ఊహాగానాలు మొదలయ్యాయి.ఇదిలా ఉండగా, బీజేపీ జాతీయ అధ్యక్షుడు అమిత్ షాతో మహారాష్ట్ర ముఖ్యమంత్రి దేవేందర్ ఫడ్నవీస్ సోమవారం భేటీ అయ్యారు. రాష్ట్రంలోని రాజకీయ పరిణామాలు, శివసేన డిమాండ్లపై షాతో ఫడ్నవీస్ చర్చించినట్టు తెలుస్తోంది. అనంతరం ఫడ్నవీస్‌ మీడియాతో మాట్లాడుతూ.. కొత్త ప్రభుత్వంపై ఎవరెవరో చెబుతున్న మాటలపై తాను స్పందించబోనని వ్యాఖ్యానించారు. త్వరలోనే తమ ప్రభుత్వం కొలువుదీరుతుందని ఆయన ధీమా వ్యక్తంచేశారు. అలాగే ఇటీవల కురిసిన భారీ నష్టాలకు పంటలు కోల్పోయిన రైతులకు పంట నష్టపరిహారంపై హోంమంత్రితో చర్చించినట్టు చెప్పారు.