చక్ర బంధంలో కేసీఆర్
హైద్రాబాద్,
తెలంగాణ ఆర్టీసీ సమ్మె వ్యవహారం పీటముడిలా మారింది. ఆర్టీసీని ప్రభుత్వంలో విలీనం చేసేది లేదని కేసీఆర్ సర్కారు తేల్చి చెబుతుండగా.. కార్మికులు కూడా సమ్మెను విరమించడానికి సిద్ధపడటం లేదు. సమ్మెకు దిగిన 48 వేల మంది కార్మికులు సెల్ఫ్ డిస్మిస్ అయ్యారని కేసీఆర్ చేసిన సంచలన ప్రకటన.. కార్మికుల్లో ఆగ్రహాన్ని మరింత పెంచింది. వెనక్కి తగ్గొద్దనే కసిని పెంచింది. దీంతో అక్టోబర్ 5న ప్రారంభమైన సమ్మె ఇప్పటికీ కొనసాగుతూనే ఉంది. రోజురోజుకూ సమ్మెను తీవ్రతరం చేయడానికే కార్మికులు సిద్ధపడుతున్నారు. మిలియన్ మార్చ్ దిశగా అడుగులేస్తున్నారు. మేం పులిస్వారీ చేస్తున్నాం.. దిగితే చంపేస్తుందంటూ.. ఆర్టీసీ జేఏసీ నేత అశ్వత్థామరెడ్డి చేసిన వ్యాఖ్యలను బట్టే చెప్పొచ్చు.. ఆర్టీసీ కార్మికులు సమ్మె విషయంలో ఎంత పట్టుదలతో ఉన్నారోనని. ప్రభుత్వం కూడా ప్రయివేట్ బస్సులు, తాత్కాలిక సిబ్బందితో ప్రజలు ఇబ్బంది పడకుండా చూసే ప్రయత్నం చేస్తోంది.
ఆర్టీసీ సమ్మె వ్యవహరం త్వరలోనే తేలిపోతుందని సామాన్య ప్రజలు భావించారు. కేసీఆర్ కరుణిస్తాడని.. ఆర్టీసీ విలీనానికి గ్రీన్ సిగ్నల్ ఇస్తాడని ప్రజలు అనుకున్నారు. కానీ కేసీఆర్ పంతంతో సమ్మె వ్యవహారం చిక్కుముడిలా మారింది. ఆర్టీసీ సమ్మెపై తొలుత దూకుడుగా ముందుకెళ్లిన కేసీఆర్‌.. ఇప్పుడు ఏం చేయాలో తెలియని స్థితిలోకి వెళ్లిపోయారని ప్రతిపక్ష నేతలు ఎద్దేవా చేస్తున్నారుఇప్పటి వరకూ ఎన్నడూ లేని రీతిలో కేసీఆర్ తీవ్ర ఒత్తిడిలో ఉన్నారనే వ్యాఖ్యలు వినిపిస్తున్నాయి. 14 సమీక్షలు.. 44 గంటల సమయం.. కేసీఆర్ జీవితంలో ఓ సమస్య విషయమై ఇంతలా మథనపడటం బహుశా ఇదే తొలిసారి కావొచ్చంటున్నారు. కేసీఆర్ ఇప్పటికైనా మెట్టు దిగి నిపుణుల సలహాలు తీసుకోవాలని రాజకీయ నేతలు సూచిస్తున్నారు.అటు క్షేత్ర స్థాయిలో ఆర్టీసీ కార్మికుల సమ్మెకు పెరుగుతున్న మద్దతు, ఇటు హైకోర్టు ఆదేశాలు.. కేసీఆర్ సర్కారును ఉక్కిరిబిక్కిరి చేస్తున్నాయి అనిపిస్తోంది. ఆర్టీసీ వ్యవహారంలో ప్రభుత్వ తీరుపై హైకోర్టు తీవ్రంగా మండిపడుతోంది. ఆర్టీసీ అంటే 48 వేల మంది ఉద్యోగులే కాదు.. 3 కోట్ల మంది ప్రజల ఇబ్బందులు కూడా అని ప్రభుత్వానికి గుర్తు చేసింది.ఆర్టీసీ సమ్మె వ్యవహారంలో బంతిని కేంద్రం కోర్టులో వేద్దామని కేసీఆర్ భావించారు. ఆర్టీసీలో కేంద్రానికి 31 శాతా వాటా ఉంది. కాబట్టి నష్టాల్లోనూ కేంద్రం వాటాను భరిస్తుందా? అని ఆయన ప్రశ్నించారు. కానీ ఇక్కడే ఆయన అనూహ్యంగా కేంద్రం చేతికి ఆయుధాన్ని ఇచ్చారు.ఆర్టీసీలో మాకు 31 శాతం వాటా ఉన్న మాట నిజమే. కానీ వాటా ఉంది ఏపీఎస్ఆర్టీసీలో. మా అనుమతి లేకుండా ఏకపక్షంగా ఆర్టీసీని రెండుగా ఎలా విభజించారని మోదీ సర్కారు కేసీఆర్ ప్రభుత్వాన్ని ప్రశ్నించింది. అసలు టీఎస్ఆర్టీసీ చట్టబద్ధతనే తాము గుర్తించనప్పుడు.. ఇక టీఎస్ఆర్టీసీ ఉద్యోగులు ఉద్యోగాలు పోవడం, సంస్థను ప్రయివేట్ పరం చేయడం, రూట్లను ప్రయివేట్ బస్సులకు అప్పగించడం లాంటి వాదనలు కుదరవని కేంద్రం పరోక్షంగా వ్యాఖ్యానించింది.ఏపీఎస్ఆర్టీసీని ప్రభుత్వంలో విలీనం చేయాలని తన సన్నిహితుడు జగన్ తీసుకున్న నిర్ణయం తనను ఇంతలా ఇబ్బంది పెడుతుందని బహుశా కేసీఆర్ ఊహించి ఉండరు. ఆర్టీసీ సమ్మె విషయంలో.. కార్మికులను బెదిరించే ధోరణిలో బదులు కాస్త బుజ్జగింపు ధోరణిలో మాట్లాడి ఉంటే ఫలితం దక్కేదేమో. మొత్తానికి అటు కేంద్రం.. ఇటు హైకోర్టు.. క్షేత్రస్థాయిలో కార్మికులు.. పక్కనే రాజ్‌భవన్‌లో చాప కింద నీరులా పని చేసుకుపోతున్న గవర్నర్.. ఇలా నలుదిశలా కేసీఆర్‌పై ఒత్తిడి నానాటికీ పెరుగుతోంది. ఇకనైనా త్వరపడి సరైన నిర్ణయం తీసుకోకపోతే.. కేసీఆర్ సర్కారుపై ఒత్తిడి మరింత పెరిగిపోయే ఛాన్స్ ఉంది.