సీఎం పదవిపై క్లారిటీ ఇస్తేనే చర్చలు
ముంబై,
ఎన్నికల ఫలితాలు విడుదలై రెండు వారాలు దాటిపోయినా మహారాష్ట్రలో ప్రభుత్వం ఏర్పాటుపై అనిశ్చిత ఇంకా కొనసాగుతోంది. అధికారాన్ని చెరిసగం పంచుకోవాలన్న డిమాండ్‌పై శివసేన ఏమాత్రం వెనక్కుతగ్గకుపోవడం, బీజేపీ మొట్టు దిగకపోవడంతో పరిస్థితిల్లో ఎలాంటి మార్పు రాలేదు. ఈ నేపథ్యంలో మిత్రపక్షాల మధ్య మాటల యుద్ధం తారాస్థాయికి చేరింది. సామ్నా ఎడిటర్, శివసేన ముఖ్య సంజయ్‌ రౌత్‌ శుక్రవారం మరోసారి సంచలన వ్యాఖ్యలు చేశారు. మహారాష్ట్రలో రాష్ట్రపతి పాలన విధించాలనుకోవడం ప్రజలను కించపరచడమేనని రౌత్ అభిప్రాయపడ్డారు. అంతేకాదు, తమకు సీఎం పదవి ఇచ్చేందుకు ఒప్పుంకుంటేనే సంప్రదింపులకు రావాలని బీజేపీ తేల్చి చెప్పారు.అపద్ధర్మ ప్రభుత్వం పేరుతో బీజేపీ అధికార దుర్వినియోగానికి పాల్పడవద్దని రౌత్ హితవు పలికారు. ఫడ్నవీస్ పదవీకాలం ముగియనుందని, సీఎం పదవికి ఆయన తక్షణమే రాజీనామా చేయాలని సంజయ్ రౌత్ డిమాండ్‌ చేశారు. ప్రభుత్వాన్ని ఏర్పాటుచేయాల్సిన బాధ్యత అతిపెద్ద పార్టీగా నిలిచిన బీజేపీపైనే ఉందని ఆయన ఉద్ఘాటించారు. ముందు ప్రభుత్వాన్ని ఏర్పాటు చేసి కావాలంటే బలనిరూపణకు నెలరోజుల సమయం తీసుకోవాలని ఆయన వ్యాఖ్యానించారు. ‘సమస్యల్ని చూసి భయపడి పారిపోవడం కాదు, వాటికి ఎదురుగా నిలిచి పోరాడాలి’ అని అర్థం వచ్చే వాజ్‌పేయి కవిత, భవద్గీత శ్లోకాన్ని ట్విటర్‌‌లో పోస్ట్ చేశారు.మరోవైపు, తన అధికారిక పత్రిక సామ్నాలోనూ ప్రస్తుతం నెలకున్న పరిస్థితులను ఉటంకిస్తూ బీజేపీపై విమర్శనాస్త్రాలు ఎక్కుపెట్టింది. రాష్ట్రంలో నెలకొన్న అస్థిరతకు బీజేపీయే కారణమని.. గవర్నర్‌ని కలిసినా ప్రభుత్వ ఏర్పాటుపై ఎలాంటి ప్రకటన చేయలేదంటే సంక్షోభానికి ఆ పార్టీయే కారణమన్న విషయం ప్రజలకు అర్థమవుతోందని మండిపడింది.ఇదిలా ఉండగా.. కేంద్ర మంత్రి నితిన్‌ గడ్కరీ రంగంలోకి దిగారు. శివసేన అధినేత ఉద్ధవ్‌ ఠాక్రేతో భేటీ అయ్యే అవకాశం ఉందనే ఊహాగానాలు వినిపిస్తున్నాయి. మహారాష్ట్రలో బీజేపీ, శివసేన మధ్య నెలకున్న రాజకీయ అనిశ్చితికి గడ్కరీయే పరిష్కారం చూపగలరన్న వాదనలు వినిపిస్తున్న విషయం తెలిసిందే. ఈ నేపథ్యంలో ఆయన రాకపై ఆసక్తి నెలకొంది. దీనిపై సంజయ్‌ రౌత్ స్పందిస్తూ.. సీఎం పదవి హామీపై ఆయన ఏదైనా రాయబారం తెస్తేనే తమ పార్టీ ఆలోచిస్తుందని.. లేదంటే ఆయన రాకను సాధారణ పర్యటనగానే భావిస్తామని వ్యాఖ్యానించారు.శివసేన తన ఎమ్మెల్యేలను గురువారమే రిసార్ట్స్‌కు తరలించింది. మరోవైపు కాంగ్రెస్‌ తన ఎమ్మెల్యేలను జైపూర్‌కు తరలించినట్లు ప్రచారం సాగుతోంది. తమ ఎమ్మెల్యేలను కొనుగోలు చేయడానికి బీజేపీ ప్రయత్నాలు చేస్తుందనే సమాచారంతో వారిని శిబిరాలకు తరలిస్తున్నారని పార్టీ వర్గాల్లో నడుస్తోంది. అయితే తమ ఎమ్మెల్యేలకు బీజేపీ గాలమేసే అవకాశమే లేదని కాంగ్రెస్ ఎంపీ హుస్సేన్‌ దళ్వాయి ధీమా వ్యక్తం చేశారు. మహారాష్ట్ర ఎన్నికల ముందు పార్టీ ఫిరాయించిన కొందరు నేతలు తిరిగి రావాలని భావిస్తున్నారని తెలిపారు.అంతేకాదు, ఎలాంటి నిర్ణయమైనా ఎన్‌సీపీతో కలిసే తీసుకుంటామని ఆయన స్పష్టం చేశారు. అటు, శుక్రవారం మధ్యాహ్నం ఎన్‌సీపీ ఎమ్మెల్యేలతో ఆ పార్టీ అధినేత శరద్‌ పవార్‌ భేటీ అయ్యే అవకాశం ఉందని సమాచారం. ఉద్ధవ్‌ ఠాక్రే సైతం శివసేన పార్టీ జిల్లా అధ్యక్షులతో సమావేశం కానున్నారు. శుక్రవారం అర్ధరాత్రితో మహారాష్ట్ర శాసనసభా కాలం ముగియనుండగా.. ప్రభుత్వ ఏర్పాటుపై ఉత్కంఠ నెలకొంది. క్యాంపు రాజకీయాలతో మరింత వేడెక్కింది.