స్పీకర్ నిర్ణయం కరెక్టే కానీ...ఎన్నికల్లో పోటీ చేయవచ్చు
న్యూఢిల్లీ, నవంబర్ 13, 
కర్ణాకటకు చెందిన 17మంది ఎమ్మెల్యేలపై ఆ రాష్ట్ర మాజీ స్పీకర్‌ కేఆర్‌ రమేశ్‌కుమార్‌ విధించిన అనర్హత వేటును సమర్థిస్తూ సుప్రీంకోర్టు బుధవారం సంచలన తీర్పు వెలువరించింది. కాంగ్రెస్‌-జేడీఎస్‌కు చెందిన 17 మంది ఎమ్మెల్యేలపై అనర్హత వేటును సుప్రీంకోర్టు సమర్థించినప్పటికీ.. వారిపై స్పీకర్‌ విధించిన అనర్హతకాలాన్ని కొట్టివేసింది. ప్రస్తుత అసెంబ్లీ  కాలం 2023 సంవత్సరం ముగిసేవరకు అనర్హత ఎమ్మెల్యేలు పోటీ చేయరాదని స్పీకర్‌ నిబంధన విధించగా.. ఈ నిబంధనను సుప్రీంకోర్టు తోసిపుచ్చింది. దీంతో అనర్హతకు గురైన 17మంది ఎమ్మెల్యేలు రానున్న ఉప ఎన్నికల్లో పోటీ చేయవచ్చు.‘ఆర్టికల్‌ 193ని చర్చించిన అనంతరం అనర్హత అంశంలో మేం ఎలాంటి వ్యాఖ్యలు చేయడం లేదు. అనర్హత అనేది.. చర్య జరిగిన కాలానికి మాత్రమే వర్తిస్తుంది. ఒక వ్యక్తి కొంతకాలంపాటు ఎన్నికల్లో పోటీ చేయకూడదంటూ ఆదేశాలు ఇచ్చే అధికారం స్పీకర్‌కు లేదు’ అని న్యాయస్థానం అభిప్రాయపడింది. స్పీకర్‌ విధించిన అనర్హత వేటును మేం సమర్థిస్తున్నాం. అయితే, అనర్హత కాలాన్ని మాత్రం కొట్టివేస్తున్నాం’ అని ముగ్గురు న్యాయమూర్తుల ధర్మాసనం తన తీర్పులో పేర్కొంది. ఈ వ్యవహారంలో స్పీకర్‌ ‘క్వాసీ జ్యుడీషియల్‌ ఆథారిటీగా వ్యవహరించారని, అయితే ఎమ్మెల్యేలు స్వచ్ఛందంగా రాజీనామా చేశారా, లేదా? అన్నది మాత్రమే స్పీకర్‌ పరిధిలోకి వస్తుందని, ఈ విషయంలో స్పీకర్‌ అధికార పరిధి పరిమితమని ధర్మాసనం అభిప్రాయపడింది.గత జూలై నెలలో అప్పటి కుమారస్వామి ప్రభుత్వం బలపరీక్ష సందర్భంగా కాంగ్రెస్‌, జేడీఎస్‌ రెబల్‌ ఎమ్మెల్యేలతోపాటు ఇద్దరు స్వతంత్ర ఎమ్మెల్యేలు రాజీనామా చేసి.. కాంగ్రెస్‌-జేడీఎస్‌ సంకీర్ణ ప్రభుత్వాన్ని కూల్చిన సంగతి తెలిసిందే. దీంతో మొత్తం 17మంది ఎమ్మెల్యేలపై అప్పటి స్పీకర్‌ అనర్హత వేటు వేశారు. దీనిపై సదరు ఎమ్మెల్యేలు సుప్రీంకోర్టులో సవాలు చేయగా.. జస్టిస్‌ ఎన్వీ రమణ, జస్టిస్‌ సంజీవ్‌ఖన్నా, జస్టిస్‌ కృష్ణమురారీతో కూడిన ధర్మాసనం ఈ పిటిషన్‌పై విచారణ జరిపి.. అక్టోబర్‌ 25న తీర్పును రిజర్వులో ఉంచిన సంగతి తెలిసిం‍దే. ఇవాళ బీజేపీ గూటికి ఎమ్మెల్యేలు కర్ణాటకలో అనర్హత వేటు పడిన 17 మంది రెబల్ ఎమ్మెల్యేలు  బీజేపీలో చేరనున్నారు. అనర్హత వేటు పడిన 17 మంది ఎమ్మెల్యేలు రేపు సీఎం యడియూరప్ప సమక్షంలో బీజేపీలో చేరనున్నట్లు ఆ రాష్ట్ర ఉప ముఖ్యమంత్రి అశ్వంత్ నారాయణ సీఎన్ తెలిపారు. బీజేపీలో చేరేందుకు వారు తమ సంసిద్ధతను వ్యక్తం చేస్తూ పార్టీ సీనియర్ నాయకులను కలిశారన్నారు. సీఎం యడియూరప్ప, రాష్ట్ర బీజేపీ అధ్యక్షులు నలిన్ కుమార్ కతిల్ సమక్షంలో ఉదయం 10.30 గంటలను పార్టీలో చేరనున్నట్లు చెప్పారు. ఈ రెబల్ ఎమ్మెల్యేలు ఉపఎన్నికలో పోటీ చేసేందుకు సుప్రీంకోర్టు గ్రీన్ సిగ్నల్ ఇచ్చిన విషయం తెలిసిందే. తీర్పు వెలువడిన అనంతరం వీరిలో పలువురు ఎమ్మెల్యేలు అశ్వంత్ నారాయణతో కలిసి బీజేపీ నేషనల్ జనరల్ సెక్రటరీ బీఎల్ సంతోష్‌ను ఢిల్లీలో కలిశారు. ’ఆ 17 కమలానివే కర్ణాటకలో 17 మంది రెబల్‌ ఎమ్మెల్యేలు ఉప ఎన్నికల్లో పోటీ చేసేందుకు సుప్రీంకోర్టు అనుమతించడాన్ని ఆ రాష్ట్ర సీఎం యెడియూరప్ప స్వాగతించారు. ఈ 17 స్థానాల్లో భారతీయ జనతా పార్టీ 101 శాతం తప్పకుండా గెలుస్తుందని ఆయన ధీమా వ్యక్తం చేశారు. ఉప ఎన్నికలు జరిగే అసెంబ్లీ నియోజకవర్గాల్లో పర్యటిస్తామని తెలిపారు. నామినేషన్లు దాఖలు చేసేందుకు చివరి తేదీ సెప్టెంబర్‌ 18. డిసెంబర్‌ 5వ తేదీన ఎన్నికలు జరగనున్నాయి