రికార్డ్ బద్దలు చేసిన ఆర్టీసీ సమ్మె
హైద్రాబాద్, నవంబర్ 16 )
తెలంగాణలో ఆర్టీసీ కార్మిక సంఘాలు చేపట్టిన సమ్మె శనివారం నాటికి 43 రోజుకు చేరింది. దీంతో ఉమ్మడి రాష్ట్రంలో సకల జనుల సమ్మె రికార్డును బ్రేక్ చేసింది. ఆర్టీసీ చరిత్రలో సుదీర్ఘ కాల సమ్మెగా ఇది గుర్తింపు పొందింది. ప్రత్యేక రాష్ట్రం కోసం 2011లో సెప్టెంబరు 13న ప్రారంభమైన సకల జనుల సమ్మె అక్టోబరు 24 వరకు.. అంటే 42 రోజుల పాటు కొనసాగింది. ప్రస్తుతం 26 డిమాండ్ల పరిష్కారం కోరుతూ ఆర్టీసీ కార్మికులు అక్టోబరు 5న సమ్మె ప్రారంభించారు. ఆర్టీసీ చరిత్రలోనూ ఇదే పెద్ద సమ్మెగా నిలిచింది. గతంలో 2001లో ఆర్టీసీ కార్మికులు 24 రోజుల పాటు సమ్మె చేశారు. సమ్మెలో భాగంగా ఆదివారం ఆర్టీసీ జేఏసీ బస్‌రోకోకు పిలుపునిచ్చింది.అయితే, ఈ బస్‌ రోకోకు ఎలాంటి అనుమతులు లేవని హైదరాబాద్ నగర పోలీస్ కమిషనర్ అంజినీ కుమార్ స్పష్టం చేశారు. బస్‌భవన్ సహా ప్రతి బస్ డిపో వద్ద 500 మీటర్ల వరకు 144 సెక్షన్ అమలులో ఉంటుందని తెలిపారు. గ్రూపులుగా ఏర్పడి ఆందోళన చేస్తే కఠిన చర్యలు తీసుకుంటామని ఆయన హెచ్చరించారు. హైదరాబాద్‌లో ఇలాంటి చర్యలు వల్ల విద్యా, వ్యాపార కార్యకలాపాలకు ఇబ్బంది కలుగుతుందని పేర్కొన్నారు. ఎవరైనా నిబంధనలు ఉల్లంగిస్తే అరెస్ట్ చేస్తామని ప్రకటించారు.మరోవైపు, ఆర్టీసీ జేఏసీ నేతలను ముందుస్తుగానే అదుపులోకి తీసుకుంటున్నారు. శనివారం ఉదయం నుంచే ఆర్టీసీ జేఏసీ నేతలు అశ్వత్థామరెడ్డి, రాజిరెడ్డిలను హౌస్ అరెస్టు చేసినట్టు తెలుస్తోంది. ఇక, శుక్రవారం రాష్ట్రవ్యాప్తంగా ఆర్టీసీ కార్మికులు ఆందోళన కార్యక్రమాలు నిర్వహించారు. కరీంనగర్‌ శివారులోని తీగలగుట్టపల్లిలో కేసీఆర్‌ ఇంటిని ముట్టడించేందుకు కార్మికులు యత్నించారు. వారిని పోలీసులు అడ్డుకోవడంతో గేటువద్ద కూర్చుని ధర్నా చేశారు. కార్మిక నేతలను పోలీసులు అదుపులోకి తీసుకున్నారు.ఉమ్మడి వరంగల్‌ జిల్లాలోనూ ఆందోళనలు నిర్వహించిన ఆర్టీసీ కార్మికులు.. సమ్మెపై స్పందించాలని కోరుతూ ముఖ్యమంత్రికి పోస్టు కార్డులు రాశారు. ఖమ్మం జిల్లా కేంద్రంలో రవాణా మంత్రి పువ్వాడ అజయ్‌ కుమార్ క్యాంపు కార్యాలయాన్ని ముట్టడించేందుకు కార్మికులు ప్రయత్నించగా వారిని పోలీసులు అడ్డుకున్నారు. ఆర్టీసీ జేఏసీ ఆందోళనల కార్యాచరణలో భాగంగా శనివారం నిరాహార దీక్షలు చేపట్టనుండగా... శుక్రవారం సాయంత్రం ‘బస్‌రోకో’ కార్యక్రమాన్ని ప్రకటించారు. దీనిపై హుటాహుటిన సమీక్షలు జరిపిన పోలీసు ఉన్నతాధికారులు ఎక్కడికక్కడ 144 సెక్షన్‌ విధించాలని ఆదేశాలు జారీ చేశారు.