ఏపీలో భారీగా తగ్గిన బార్లు
విజయవాడ, నవంబర్ 23  
జగన్ సర్కార్ బార్ షాపు యజమానులకు షాకిచ్చింది. బార్ల లైసెన్సులు రద్దు చేస్తూ అనూహ్య నిర్ణయం తీసుకుంది. కొత్త బార్ల విధానంలో భాగంగా ప్రస్తుతం ఉన్న బార్ల మూసివేతకు ఆదేశాలిచ్చింది. ఈ మేరకు శుక్రవారం ఎక్సైజ్ శాఖ ఉత్తర్వులు జారీ చేసింది. ప్రభుత్వ తాజా ఆదేశాలతో ప్రస్తుతం ఉన్న బార్లు మూతపడనున్నాయి. ప్రభుత్వ అనూహ్య నిర్ణయంతో బార్ షాపు యజమానులు షాక్‌కు గురైనట్లు తెలుస్తోంది.నూతన మద్య విధానంలో భాగంగా ఇప్పటికే మద్యం దుకాణాలను 20 శాతం మేర తగ్గించిన విషయం తెలిసిందే. అంతేకాకుండా ప్రభుత్వమే మద్యం విక్రయాలు నిర్వహిస్తోంది. మద్యం వినియోగాన్ని తగ్గించే దిశగా చర్యలు చేపట్టిన ప్రభుత్వం.. ధరలను కూడా భారీగా పెంచేసింది. కొత్త బార్ల విధానం అమల్లోకి వచ్చాక ధరలు మరింత పెరిగే అవకాశం ఉన్నట్లు తెలుస్తోంది.మద్యం షాపుల వేళలను కూడా తగ్గించింది. ఉదయం 11 గంటల నుంచి రాత్రి 8 గంటల వరకే మద్యం షాపులు పని చేస్తున్నాయి. దీంతో మందుబాబులు బార్ షాపుల బాట పట్టారు. గత కొద్దికాలంగా బార్‌లు కస్టమర్లతో కిటకిటలాడుతున్నాయి. ప్రభుత్వ తాజా నిర్ణయంపై బార్ షాపుల యజమానులు ఆందోళన వ్యక్తం చేస్తున్నారు. బార్ షాపుల లైసెన్సు ముగిసేందుకు ఇంకా గడువు ఉండడంతో లైసెన్సు ఫీజు తిరిగి చెల్లించేందుకు ప్రభుత్వం సిద్ధమైనట్లు తెలుస్తోంది.అలాగే నూతన బార్ పాలసీని ప్రభుత్వం ప్రకటించింది. వచ్చే ఏడాది జనవరి 1 నుంచి నూతన బార్ల విధానం అమల్లోకి రానుంది. బార్‌ లైసెన్స్‌ దరఖాస్తు ఫీజును రూ. 10 లక్షలుగా నిర్ణయించారు. ఆ డిపాజిట్ మళ్లీ తిరిగిరాదు(నాన్‌ రిఫండబుల్‌). 50 వేల లోపు జనాభా ఉన్న ప్రాంతాల్లో బార్‌ ఏర్పాటుకు రూ.25 లక్షలు, 5 లక్షల్లోపు జనాభా ఉన్న పట్టణాల్లో రూ.50 లక్షలు, 5 లక్షల కంటే ఎక్కువ జనాభా ఉన్న నగరాల్లో రూ.75 లక్షలు ఫీజుగా నిర్ణయించారు.బార్ షాపులను లాటరీ పద్ధతిలో కేటాయించనున్నారు. బార్ తెరిచి ఉంచే వేళల్లో కూడా మార్పులు చేశారు. ఉదయం 11 గంటల నుంచి రాత్రి 10 గంటల వరకు వ్యాపార వేళలుగా నిర్ణయించారు. రెండేళ్ల కాలపరిమితితో లైసెన్స్ జారీ చేస్తారు. మద్యం వినియోగాన్ని తగ్గించడమే లక్ష్యంగా చెబుతున్న ప్రభుత్వం.. బార్లలో మద్యం విక్రయాలపై అదనపు పన్నులు వేసేందుకు సిద్ధమవుతున్నట్లు తెలుస్తోంది.