మళ్లీ సొంతగూటికి వరుపుల రాజా 
కాకినాడ, నవంబర్ 23
రెండు నెలలు క్రితం టీడీపీకి రాజీనామా చేసిన వరుపుల రాజా మళ్లీ సొంతగూటికి చేరారు. అధిష్టానం, పార్టీ సీనియర్ నేతల బుజ్జగింపులతో మెత్తబడ్డారు. మళ్లీ పెద్దల సమక్షంలో పసుపు కండువా కప్పుకున్నారు. శుక్రవారం పార్టీ సీనియర్ నేతల సమక్షంలో పార్టీలో చేరారు. నేతలు ఇంటికెళ్లి మరీ తిరిగి పార్టీలోకి రావాలని ఆహ్వానించడంతో నిర్ణయం మార్చుకున్నారు.. తూర్పుగోదావరి జిల్లా ప్రత్తిపాడు నియోజకవర్గ ఇంఛార్జ్‌గా బాధ్యతల్ని స్వీకరించారు.ప్రత్తిపాడులో నిర్వహించిన సభలో పార్టీ సీనియర్ నేతలు యనమల రామకృష్ణుడు, నిమ్మకాయల చినరాజప్ప, జ్యోతుల నెహ్రూ, రెడ్డి సుబ్రహ్మణ్యంతో పాటూ జిల్లా నేతలు పాల్గొన్నారు. రాజా సమర్ధుడైన నాయకుడని.. కష్టపడి పని చేస్తారని.. ప్రజలకు సేవ చేయాలనే తపన ఉందన్నారు నేతలు. కొన్ని కారణాలతో పార్టీకి రాజీనామా చేశఆరని.. కానీ ఆయనమనసంతా టీడీపతోనే ఉందన్నారు. రాజా అలక తండ్రిపై కొడుకు అలకలాంటిదని.. అందుకే రాజా పునరాగమనాన్ని పార్టీ స్వాగతిస్తున్నామన్నారు నేతలు. రాష్ట్రంలో టీడీపీని అణచివేసే శక్తి ఎవరికీ లేదని.. టీడీపీపై వైఎస్సార్‌సీపీ కుట్రలు చేస్తుందని మండిపడ్డారు.ఆగస్టులో వరుపుల రాజాతో పాటూ కొందరు నేతలు పార్టీకి మూకుమ్మడిగా రాజీనామా చేశారు. టీడీపీలో కాపులకు అన్యాయం జరుగుతోందని.. ఒకే సామాజిక వర్గానికి పదవులు, కాంట్రాక్టులు కట్టబెట్టారని అప్పుడు రాజా ఆరోపించారు. ఏపీలో టీడీపీకి భవిష్యత్ లేదు.. మునిగిపోయే నావలాంటిదని.. త్వరలోనే భవిష్యత్ కార్యాచరణ ప్రకటిస్తానన్నారు. తాను పార్టీ అభివృద్ధి కోసం ఎంతో కష్టపడ్డానని.. ఎన్నికల సమయంలో చివరి‌ వరకు సీటు ఇవ్వలేదన్నారు. చివరి నిమిషంలో సీటు ఇవ్వడంతోనే తక్కువ ఓట్లతో ఓడిపోయానన్నారు. పార్టీలో అవమానాలను తట్టుకోలేక రాజీనామా చేశానని అన్నారు. అంతేకాదు జగన్ పాలనపై ప్రశంసలు కురిపించారు.. దీంతో వైఎస్సార్‌సీపీలోకి వెళతారని ప్రచారం జరిగింది.వరుపుల రాజా తూర్పుగోదావరి జిల్లా ప్రత్తిపాడు నుంచి 2019 ఎన్నికల్లో టీడీపీ అభ్యర్థిగా పోటీ చేశారు. వైఎస్సార్‌సీపీ అభ్యర్థి పర్వత పూర్ణచంద్ర ప్రసాద్ చేతిలో ఓడిపోయారు. ఎన్నికల ఫలితాల తర్వాత కూడా పార్టీ కార్యక్రమాల్లో పాల్గొన్న రాజా.. ఉన్నట్టుండి ఇలా పార్టీకి రాజీనామా చేసి షాక్ ఇచ్చారు. ఇప్పుడు మళ్లీ సొంత పార్టీలోనే చేరారు.