లోకేశ్ కు షాక్
గుంటూరు, నవంబర్ 23,
టీడీపీ జాతీయ ప్రధాన కార్యదర్శి నారా లోకేష్‌కి మంగళగిరి ఎమ్మెల్యే ఆళ్ల రామకృష్ణారెడ్డి మరో షాకిచ్చారు. గత ఎన్నికల్లో మంగళగిరి అసెంబ్లీ స్థానం నుంచి బరిలో దిగిన లోకేష్‌‌పై ఆర్కే రికార్డు విజయం సాధించారు. తాజాగా డీఆర్సీ సమావేశం నుంచి లోకేష్‌ని బహిష్కరించాలని ఆర్కే తీర్మానం ప్రవేశపెట్టారు. ఇంకేముంది.. అధికార పార్టీ నేతల అంగీకారం తెలపడంతో లోకేష్‌‌ బహిష్కరణకు గురయ్యారు. దీంతో ఇకపై డీఆర్సీ సమావేశానికి హాజరయ్యేందుకు లోకేష్‌కు అవకాశం లేకుండా పోయింది.టీడీపీ ఎమ్మెల్సీ నారా లోకేష్‌‌కి జిల్లా వైఎస్సార్సీపీ నేతలు షాకిచ్చారు. సీఎం జగన్‌ ఓ సైకో అంటూ లోకేష్ చేసిన వ్యాఖ్యలపై తీవ్రస్థాయిలో మండిపడ్డారు. ఆయన వ్యాఖ్యలను తీవ్రంగా ఖండించారు. ఈ రోజు గుంటూరు జడ్పీ కార్యాలయంలో జరిగిన జిల్లా సమీక్షా సమావేశంలో ఈ వ్యవహారంపై వాడీవేడి చర్చ జరిగింది. లోకేష్‌ వ్యాఖ్యలను మంత్రులు, అధికార పార్టీ ఎమ్మెల్యేలు తీవ్రంగా తప్పుబట్టారు.అనంతరం డీఆర్సీ సభ్యుడిగా ఉన్న లోకేష్‌ను సమావేశాలకు రాకుండా బహిష్కరించాలని మంగళగిరి ఎమ్మెల్యే ఆళ్ల రామకృష్ణారెడ్డి తీర్మానం ప్రవేశపెట్టారు. డీఆర్సీ నుంచి బహిష్కరించేందుకు మెజార్టీ సభ్యులు అంగీకారం తెలపడంతో లోకేష్‌పై బహిష్కరణ వేటుపడినట్టైంది. ఇన్‌చార్జి మంత్రి రంగనాథ్‌రాజు, మంత్రులు సుచరిత, మోపిదేవి వెంకటరమణ, ఎమ్మెల్యేలు, ఎమ్మెల్సీలు పాల్గొన్న ఈ సమావేశంలో లోకేష్‌పై వేటు వేయడం గమనార్హం.