బయోడైవర్శటీ ఫ్లై ఓవర్ డిజైన్ లో లోపం
హైద్రాబాద్, నవంబర్ 25
హైదరాబాద్ బయోడైవర్సిటీ ఫ్లైఓవర్ కారు ప్రమాదం దేశవ్యాప్తంగా సంచలనమైన సంగతి తెలిసిందే. దాదాపు 105 కి.మీ. వేగంతో దూసుకెళ్లిన కారు.. 19 మీటర్ల ఎత్తు నుంచి అమాంతం కింద పడిపోయింది. కారు మీద పడిపోవడంతో.. ఓ మహిళ అక్కడికక్కడే ప్రాణాలు వదిలింది. కూతురు ఎదురుగానే ఆమె ప్రాణాలు కోల్పోయింది. ఈ ఘటనలో మరో నలుగురికి గాయాలయ్యాయి. కారు నడుపుతున్న వ్యక్తి సీటు బెల్టు పెట్టుకోవడంతోపాటు ఎయిర్ బెలూన్లు తెరుచుకోవడంతో ప్రాణాలతో బతికి బయటపడ్డాడు.vకారును డ్రైవింగ్ చేసిన కల్వకుంట్ల కృష్ణ మిలాన్ రావు పేరిట ఆ కారు ఉంది. ఆయన ఎంపవర్ ల్యాబ్స్ ప్రయివేట్ లిమిటెడ్ పేరిట సొంత సంస్థను నడుపుతున్నారు. ప్రమాదానికి కారణం కారును ఓవర్ స్పీడ్‌తో నడపడమేనని ఇంజనీరింగ్ నిపుణులు తేల్చారు. వేగంగా కారు నడిపినందుకు గానూ ఈ కారుపై పోలీసులు వెయ్యి రూపాయల జరిమానా విధించారు. మిలాన్ రావు మీద కేసు కూడా నమోదు చేశారు.ఈ ప్రమాదం పట్ల మంత్రి కేటీఆర్ విచారం వ్యక్తం చేశారు. బయో డైవర్సిటీ ఫ్లైఓవర్‌పై వేగ నియంత్రణ, రక్షణ చర్యలు తీసుకుంటామన్నారు. ఇంజనీర్ల సూచన మేరకు ఫ్లైఓవర్‌‌ను తాత్కాలికంగా మూసివేస్తున్నామని తెలిపారు. ప్రమాదంలో మృతి చెందిన సత్యవేణి కుటుంబానికి మేయర్ బొంతు రామ్మోహన్ రూ.5 లక్షల ఎక్స్‌గ్రేషియో ప్రకటించారు.ఈ ప్రమాదానికి కారు ఓవర్ స్పీడ్‌తోపాటు ఫ్లైఓవర్ డిజైన్ కూడా కారణమని నెటిజన్లు ఆరోపిస్తున్నారు. ఒక్క బయోడైవర్సిటీ ఫ్లై ఓవర్ మాత్రమే కాదు.. మిగతా వాటి డిజైన్లు కూడా సరిగా లేవని ట్వీట్లు చేస్తున్నారు. ఫ్లై ఓవర్ మీద స్పీడ్ బ్రేకర్లు ఏర్పాటు చేయాలని కొందరు సూచిస్తున్నారు.ప్రమాదానికి కారణమైన వ్యక్తి ఇంటి పేరు కల్వకుంట్ల కావడంతో.. అతడికి, సీఎం ఫ్యామిలీకి సంబంధం ఏంటని కొందరు ఆరాతీయడం ప్రారంభించారు. కొందరు ఇంకో అడుగు ముందుకేసి సీఎంకు బంధువు కావడంతోనే కేటీఆర్ ఇంత వేగంగా స్పందించారని విమర్శలు చేస్తున్నారు. మరికొందరు మాత్రం తెలంగాణ ప్రభుత్వం స్పందించిన తీరు బాగుందని, బాధితురాలి కుటుంబానికి వెంటనే పరిహారం చెల్లిస్తామని ప్రకటించారని గుర్తు చేస్తున్నారు.