40 రూపాయిలకే ఉల్లి
హైద్రాబాద్, నవంబర్ 27  
ఆకాశాన్నంటిన ఉల్లి ధరల నియంత్రణకు రాష్ట్ర ప్రభుత్వం చర్యలు చేపట్టింది. రూ.40కే కిలో ఉల్లిగడ్డ అందించాలని కేసీఆర్ సర్కార్ నిర్ణయించింది. మార్కెటింగ్‌ శాఖ వ్యాపారుల నుంచి ఉల్లిగడ్డను సేకరించి నేరుగా ప్రజలకు విక్రయించనుంది. వ్యవసాయ, మార్కెటింగ్ శాఖ మంత్రి నిరంజన్‌ రెడ్డి ఆదేశాలతో  వ్యాపారులతో వ్యవసాయశాఖ కార్యదర్శి చర్చించారు. రూ.40కి కిలో ఉల్లిని అందించడానికి అధికారులు చర్యలు చేపట్టారు.కిలో ఉల్లిగడ్డ రూ.40కే ప్రభుత్వానికి ఇచ్చేందుకు వ్యాపారులు అంగీకరించారు. హమాలీ, రవాణా ఛార్జీలను మార్కెటింగ్‌ శాఖ భరించనుంది. బుధవారం నుంచి భాగ్యనగరంలోని మోహదీపట్నం, సరూర్‌ నగర్ రైతుబజార్లో కిలో ఉల్లిగడ్డ 40 రూపాయలకు విక్రయించనున్నారు. దశల వారీగా అన్ని రైతుబజార్లలో ఉల్లి విక్రయ కేంద్రాలను ఏర్పాటు చేయడానికి అధికారులు కసరత్తు చేస్తున్నారు. ప్రస్తుతం ఒక వినియోగదారుడికి ఒక కిలో ఉల్లిగడ్డ మాత్రమే విక్రయించాలని అధికారులు నిర్ణయించారు.మంత్రి సింగిరెడ్డి నిరంజన్ రెడ్డి ఆదేశాల మేరకు మలక్‌పేట ఉల్లి వ్యాపారులతో వ్యవసాయ శాఖ ముఖ్య కార్యదర్శి పార్థసారధి, మార్కెటింగ్ డైరెక్టర్ లక్ష్మీబాయి చర్చలు జరిపారు. రోజుకు రెండు టన్నుల ఉల్లి అందుబాటులోకి తీసుకొచ్చేలా ఏర్పాట్లు చేశారు. బుధవారం సాయంత్రం మెహిదీపట్నం, సరూర్ నగర్ రైతుబజార్లలో అధికారులు ఉల్లి విక్రయ కేంద్రాలను ప్రారంభించనున్నారు.
ఏపీలో కిలో రూ.25కు ఉల్లి..
దేశవ్యాప్తంగా ఉల్లి ధరల పెరుగుదలతో సామాన్యులు ఇక్కట్లు పడుతున్న విషయం తెలిసిందే. ఉల్లి వాడకాన్ని గణనీయంగా తగ్గించారు. ఉల్లి ధరలు కన్నీళ్లు పెట్టిస్తున్న నేపథ్యంలో ఏపీలో జగన్ ప్రభుత్వం రూ.25కే కిలో ఉల్లి అందిస్తున్న విషయం తెలిసిందే. రైతు బజార్లలో ఈ ఉల్లి విక్రయాలను ప్రారంభించారు.కేంద్ర ప్రభుత్వం ఇతర దేశాలకు ఉల్లి ఎగుమతులు నిలిపివేసి దిగుమతులు చేసుకుంటోంది. దిగుమతి చేసుకున్న ఉల్లిగడ్డలో తెలంగాణకు కూడా కొంత కేటాయించేలా కేంద్రానికి లేఖ రాయాలని అధికారులను మంత్రి నిరంజన్ రెడ్డి ఆదేశించారు.