కమలం కుదేలవుతోంది...
న్యూఢిల్లీ,
మహారాష్ట్ర పీఠం తమదేన్న ధీమాతో ఉన్న కమలనాథులకు శివసేన షాక్ ఇస్తూ అధికారాన్ని చెరో రెండున్నరేళ్లు పంచుకుందామని పట్టుబట్టింది. అయితే, దీనికి బీజేపీ ససేమిరా అనడంతో 30 ఏళ్ల మైత్రికి శివసేన టాటా చెప్పేసింది. కాంగ్రెస్-ఎన్‌సీపీలతో కలిసి ప్రభుత్వాన్ని ఏర్పాటుచేయడానికి శివసేన ప్రయత్నిస్తుండగా అజిత్ పవార్‌ను తనవైపు తిప్పుకుని బీజేపీ షాక్ ఇచ్చింది. అయితే, బీజేపీ ఆనందం ఎంతో కాలం నిలవలేదు. అజిత్ మద్దతుతో ప్రభుత్వాన్ని ఏర్పాటుచేసిన బీజేపీ ముచ్చట మూణ్ణాలకే ముగిసింది. అనూహ్యంగా శరద్ పవార్ పావులు కదిపి అజిత్‌ను వెనక్కు రప్పించడంతో బీజేపీ ప్రభుత్వం దిగిపోవాల్సి వచ్చింది. దీంతో మరో పెద్ద రాష్ట్రం బీజేపీ చేజారినట్టయ్యింది. 2014 ఎన్నికల తర్వాత దేశవ్యాప్తంగా పలు రాష్ట్రాలకు జరిగిన శాసనసభ ఎన్నికల్లో బీజేపీ విజయం సాధించి ప్రభుత్వాలను ఏర్పాటుచేసింది.కాంగ్రెస్ ముక్త్ భారత్ నినాదంతో ప్రచారం చేసిన కాషాయ పార్టీ 2017 నాటికి దేశంలోని 71 శాతం రాష్ట్రాల్లో ఆ పార్టీ, మిత్రపక్షాల ప్రభుత్వాలు కొనసాగడం విశేషం. అయితే, 2018 చివరలో జరిగిన మధ్యప్రదేశ్, రాజస్థాన్, చత్తీస్‌గఢ్ శాసనసభ ఎన్నికల్లో కమలనాథులకు ఊహించని షాక్ తగిలింది. ఈ రాష్ట్రాల్లో కాంగ్రెస్ పార్టీ విజయం సాధించి ప్రభుత్వాలను ఏర్పాటుచేసింది. పెద్ద రాష్ట్రాలైన మధ్యప్రదేశ్, రాజస్థాన్‌లను బీజేపీ చేజార్చుకుంది. ప్రస్తుతం 40 శాతం రాష్ట్రాలకు బీజేపీ పరిమితమైంది. పంజాబ్, రాజస్థాన్, మధ్యప్రదేశ్, చత్తీస్‌గఢ్‌లో కాంగ్రెస్, ఒడిశాలో బిజూ జనతాదళ్, పశ్చిమ్ బెంగాల్‌లో తృణమూల్, తెలంగాణలో టీఆర్ఎస్, ఏపీలో వైఎస్‌ఆర్‌సీపీ, తమిళనాడులో అన్నాడీఎంకే, కేరళలో లెఫ్ట్ ఫ్రంట్, ఢిల్లీలో అమ్ ఆద్మీ అధికారంలో ఉన్నాయి.ఈశాన్య రాష్ట్రాల్లో బీజేపీ తన ప్రాబల్యాన్ని పెంచుకుంటున్నా మిగతా చోట్ల మాత్రం మెల్లగా అధికారం చేజారుతోంది. దేశంలోనే అతిపెద్ద రాష్ట్రమైన యూపీ 2017 ఎన్నికల్లో అఖండ విజయం సాధించిన బీజేపీ.. బీహార్‌లో జేడీయూతో కలిసి ప్రభుత్వ ఏర్పాటులో భాగస్వామిగా ఉంది. సార్వత్రిక ఎన్నికల తర్వాత జరిగిన మహారాష్ట్ర, హర్యానా ఎన్నికల్లో ప్రజలు విలక్షణ తీర్పు ఇచ్చారు. ఎన్నికల ముందు బీజేపీ-శివసేన పొత్తులతో పోటీచేసి.. ప్రభుత్వ ఏర్పాటుకు అవసరమైన స్థానాలు సాధించాయి. అయితే, శివసేన అడ్డం తిరగడంతో రెండోసారి అధికారం చేపట్టాలన్న బీజేపీ ఆశలకు గండిపడింది.ఇక, హర్యానాలో గెలుపు ఏకపక్షమని భావించిన కాషాయ పార్టీకి అక్కడ పెద్ద గుణపాఠమే చెప్పారు. కాంగ్రెస్ పార్టీ తన సీట్లను పెంచుకోగా, జననాయక్ జనతా పార్టీ (జేజేపీ) కింగ్ మేకర్‌గా ఆవిర్భవించింది. జేజేపీ అండతో హర్యానాలో బీజేపీ సంకీర్ణ ప్రభుత్వం ఏర్పాటుచేసింది. సార్వత్రిక ఎన్నికల్లో అఖండ విజయం సాధించిన బీజేపీ.. ఐదు నెలల తర్వాత జరిగిన మహారాష్ట్ర, హర్యానా అసెంబ్లీ ఎన్నికల్లో ఊహించని ఫలితాలు వచ్చాయి. కర్ణాటకలో కాంగ్రెస్-జేడీఎస్ సంకీర్ణ ప్రభుత్వం కూలిపోయిన తర్వాత బీజేపీ ప్రభుత్వం ఏర్పాటయ్యింది. అయితే, ఇక్కడ ఆ పార్టీకి ఉప-ఎన్నికల రూపంలో ముప్పు పొంచి ఉంది. ప్రభుత్వం నిలబడాలంటే కనీసం 8 చోట్ల ఆ పార్టీ విజయం సాధించాలి. అలా అయితేనే యడ్డీ ప్రభుత్వం నిలుస్తుంది.