.మనస్సును హత్తు కనే కధతో ‘రాజావారు రాణిగారు’
హైద్రాబాద్, నవంబర్ 29 
పల్లెటూరిలో ప్రేమ కథ.. ఈ కాన్సెప్ట్ ఇప్పటిది కాదు, బ్లాక్ అండ్ వైట్ బొమ్మల నుండి ఈ పాయింట్‌ని వాడుకుని అద్భుతమైన విజయం సాధించిన సినిమాలు చాలానే ఉన్నాయి. కలర్ సినిమాల కాలం వచ్చినా ఈ పల్లెటూరి ప్రేమ కథ అనే పాయింట్ మాత్రం వన్నెతగ్గకుండా వెండితెరపై వెలుగులు విరజిమ్ముతుంది. సరైన కథ, కాస్త వినోదాత్మకమయిన కథనం, సహజత్వంతో నటించే నటీనటులు, మనసుకు హత్తుకునే నాలుగైదు మంచి సన్నివేశాలు ఉంటే చాలు ఆ సినిమా వెలుగులకు కాసుల గలగల కూడా తోడవుతుంది. అందుకే ఒక కొత్త టీమ్ మొత్తం కలిసి అలాంటి ఒక ప్రయత్నాన్ని నిజాయితీతో చేసి ‘రాజావారు రాణిగారు’ అనే సినిమా తీసారు.శ్రీరామపురం అనే ఊళ్ళో రాజా అనే అబ్బాయి, రాణి అనే అమ్మాయి ఉంటారు. రాజాకి రాణి అంటే చాలా ప్రేమ. కానీ అది చెప్పాలంటే చాలా భయం. ఈలోగా ఇంటర్మీడియట్ పరీక్షలు పూర్తయిపోతాయి. రాణిని ఇంజనీరింగ్ కోసమని వేరే ఊరు పంపిస్తాడు వాళ్ళ నాన్న. రాణి ఊరు విడిచివెళ్లేటప్పుడు రాజా వైపు చూసి టాటా అన్నట్టు చెయ్యి ఊపడంతో రాణి కూడా తనను ప్రేమిస్తుంది అని ఫీల్ అయ్యి ఆమెని తలచుకుంటూ బ్రతికేస్తుంటాడు. అలా మూడేళ్లయినా రాణి ఊళ్లోకి రాదు. కానీ ఎప్పటికయినా ఆమె వస్తుంది, తన ప్రేమని ఒప్పుకుంటుంది అని ఆశతో ఉంటాడు. ఆ ఎదురుచూపుల వల్ల అతనిలో ఫ్రస్ట్రేషన్ బాగా పెరిగిపోతుంది. దాంతో రాజా స్నేహితులు అయిన నాయుడు, చౌదరి రాణిని ఊరికి రప్పించడానికి ఒక మంచి పథకం వేస్తారు. ఆ ప్లాన్ సక్సెస్ అయ్యి రాణి ఊరికి తిరిగొస్తుంది. అయితే అలా వచ్చిన రాణికి రాజా తన ప్రేమని ఎలా తెలియజేసాడు?, అతని ప్రేమని ఆమె ఒప్పుకుందా?, లేదా? అనేవి సినిమా చూసి తెలుసుకోవాలి.పల్లెటూరిలో జరిగే ప్రతికథలో ఎంత వద్దనుకున్నా కాస్తో కూస్తో పాత వాసనలు ఉండడం అనేవి సర్వసాధారణం. అయినా వాటిని మరిపిస్తూ ప్రేక్షకులను అలరించడంలోనే దర్శకుడి నైపుణ్యం, నటీనటుల ప్రతిభ అనేవి బయటపడతాయి. ఈ విషయంలో మాత్రం ‘రాజావారు రాణిగారు’ సినిమా టీమ్ చాలా కసరత్తు చేసింది. ఈ సినిమాలోని కొంతభాగాన్ని 90లలో నడిపించడం ద్వారా పల్లెటూళ్ళో ఒకప్పటి పరిస్థితులను కళ్ళకు కట్టింది. ఇక ఆ సన్నివేశాల్లో బరువు లేకుండా కామెడీ పూత ఉండేలా చూసుకోవడంతో సినిమా హాయిగా సాగిపోయిన భావన కలుగుతుంది. ఫస్ట్‌హాఫ్‌లో హీరోయిన్ రెండు మూడు సీన్స్‌లోనే కనిపించినప్పటికీ సినిమా బోర్ కొట్టకుండా తెరకెక్కించారు. ఈ ఒక్క పాయింట్‌తో సినిమా టీమ్ కంటెంట్‌పై ఎంత దృష్టి పెట్టారో అర్థం చేసుకోవచ్చు.అయితే ఫస్ట్‌హాఫ్ ఇలా సరదాగా సాగిపోయినా సినిమా సెకండ్ హాఫ్ కూడా అదే పాయింట్ మీద నడుస్తుంది. కానీ ఒక స్టేజ్ దాటేసరికి మాత్రం నడక బాగా స్లో అయ్యింది అన్న ఫీలింగ్ కలుగుతుంది. ఒకే పాయింట్ మీద నడుస్తుండడం, వేరే సబ్ ప్లాట్స్ ఏమీ లేకపోవడం, అలాగే కథలో ఎలాంటి ఊహాతీతమయిన మలుపులు ఉండకపోవడంతో సినిమా రొటీన్ దారిలోకి వచ్చింది అన్న ఫీలింగ్ కలుగుతుంది.ఈ నెమ్మదయిన నడకకి తోడు ఇలాంటి సినిమాలకు ఆయువుపట్టు అయిన లవ్ ఫీల్ అనేది పెద్దగా వర్క్ అవుట్ కాలేదు. హీరోకి 'ఫియర్ ఆఫ్ రిజెక్షన్' అనే చిన్న పాయింట్ పెట్టి, హీరో నోరు నొక్కెయ్యడం, సినిమా చివరికి వచ్చేసరికి రాణి, రాజా పాత్రల మధ్య పండాల్సిన ఫీల్ పూర్తిగా డైల్యూట్ అయిపోవడంతో ఒక మంచి సినిమా చూసాం అన్న అనుభూతిని పొందడంతో పాటు ఏదో చిన్న వెలితి మిగిలిపోయింది అనే భావన కూడా కలుగుతుంది.అయితే ఈ సినిమాలో ముఖ్యంగా చెప్పుకోవాల్సింది మాత్రం చాలా రిఫ్రెషింగ్‌గా అనిపించే విలేజ్ కామెడీ గురించి. సినిమా అంతా ఇంచుమించు ప్రతి ఫ్రేమ్‌లో కనిపించే నాయుడు, చౌదరి పాత్రలు ఆద్యంతం మనల్ని ఎంటర్టైన్ చేస్తుంటాయి. అలాగే వినసొంపయిన మ్యూజిక్, పల్లెటూరి అందాలను అందంగా బంధించిన కెమెరా వర్క్ కూడా చాలా ఆహ్లాదంగా అనిపిస్తాయి. ఇవి ప్రధాన బలాలుగా తెరకెక్కిన రాజావారు రాణిగారు ప్రేమ కథ డీసెంట్ ఎంటెర్‌టైనర్ అనే పేరు అయితే తెచ్చుకుంటుంది.ఈ సినిమా టీమ్‌లో ప్రతి ఒక్క టెక్నీషియన్ కొత్తవాళ్ళే. ముఖ్యంగా ఈ సినిమా కథని నమ్మి, దానిని అందరికి నచ్చేలా తీర్చిదిద్దడానికి కొత్త డైరెక్టర్ రవికిరణ్ కోలా తపించిన తీరు, సినిమాని తీర్చిదిద్దిన విధానానికి మెచ్చుకోవాలి. అక్కడక్కడా డబుల్ మీనింగ్ డైలాగ్స్ లాంటివి ఉన్నా అవి శృతిమించేలా లేకపోవడం ఈ సినిమాకి కలిసొచ్చింది. ఇక మ్యూజిక్ డైరెక్టర్ జై క్రిష్ అందించిన పాటలు మంచి ఫీల్‌తో పాటు సన్నివేశాల్లోని కంటెంట్‌ని ఎలివేట్ చేసేలా సాగాయి. ఇక ఈ సినిమాకి విద్యా సాగర్ చింతా, అమర్ దీప్ గుత్తుల ఛాయాగ్రహణం కూడా పెద్ద ప్లస్ పాయింట్. లిమిటెడ్ బడ్జెట్ ఉన్నా చాలా రిచ్ అవుట్ ఫుట్ తీసుకొచ్చారు. పల్లెటూరి సహజ అందాలను వాళ్ళ కెమెరాలో బంధించిన విధానానికి, వాళ్ళు పెట్టిన ఎఫర్ట్‌కి ఫుల్ మార్క్స్ పడుతున్నాయి.దర్శకుడు ఎంపిక చేసుకున్న నటీనటులంతా తమ పాత్రలకు పూర్తి న్యాయం చేసి సినిమాకు ప్రధాన బలంగా నిలిచారు. ఈ సినిమాలో ప్రధాన పాత్రలు పోషించిన కిరణ్ అబ్బవరం, రహస్య గోరక్ తమ పాత్రలకు పూర్తి న్యాయం చేసారు. దర్శకుడు రాజా, రాణి పాత్రలని ఏం ఊహించి రాసుకున్నాడో దాన్ని నూటికి నూరు శాతం తెరపైకి తీసుకొచ్చారు అనిపిస్తుంది సినిమా చూస్తున్నంత సేపు. అయితే వాళ్ళ పాత్రలని, వాళ్ళ ట్రాక్‌ని డామినేట్ చేసేలా ఉన్నాయి నాయుడు, చౌదరిల పాత్రలు. సింపుల్‌గా ఆ రెండు పాత్రలతో పడి పడి నవ్వుకునే సన్నివేశాలు క్రియేట్ చేసాడు దర్శకుడు. ఇక నాయుడు పాత్రలో నటించిన యజుర్వేద్ గుర్రం, చౌదరి పాత్రలో జీవించిన రాజ్ కుమార్ కసిరెడ్డి ఆ పాత్రలను గుర్తుండిపోయేలా, వాళ్ళకు మంచి గుర్తింపు వచ్చేలా నటించారు. వాళ్ళిద్దరికీ ఇది మొదటి సినిమా అంటే నమ్మడం కష్టమే. ముఖ్యంగా చౌదరి పాత్ర చేసిన రాజ్ కుమార్ కసిరెడ్డి లాంగ్వేజ్, బాడీలాంగ్వేజ్ రెండూ అదిరిపోయాయి అని చెప్పాలి.ఈ సినిమాలో మిగతా పాత్రలకు కూడా నటనలో దిట్ట అనిపేరుతెచ్చుకున్నవాళ్లను కాకుండా వీళ్ళు అయితే ఈ పాత్రలకు న్యాయం చేస్తారు అనిపించిన వాళ్ళను తీసుకున్నాడు డైరెక్టర్. అదే ఈ సినిమాకి పెద్ద ఎస్సెట్ అయ్యింది, ఫ్రెష్ నెస్ నింపింది. అలాగే ఈ సినిమా టీమ్‌ని నమ్మి పాతికేళ్ళ కుర్రాడు ప్రొడ్యూసర్‌గా మారి ఈ సినిమా తియ్యడం అనేది ఇండస్ట్రీ‌లో వస్తున్న మార్పునకు నిదర్శనం. మనోవికాస్.డి చేసిన ఈ ప్రయత్నం అయితే మెచ్చుకోదగ్గ విధంగా ఉంది. ఇక సురేష్ ప్రొడక్షన్స్ చేయూత, వాళ్ళ బ్రాండ్‌మార్క్ అనేది ఈ సినిమాకి మరికాస్త మైలేజ్ పెంచింది.ఓవరాల్‌గా చూస్తే ఈ ‘రాజావారు రాణిగారు’ సినిమా ట్రైలర్‌తో ఏదైతే ఇంప్రెషన్ కలిగించిందో దాన్ని చాలా వరకు నిలబెట్టుకుంది. సినిమాలో ఫీల్ తగ్గడం, అక్కడక్కడా కాస్త స్లో నెరేషన్, కాస్త పాత వాసనలు అనే కంప్లైంట్స్‌ని పక్కనపెట్టి సినిమా చూడగలిగితే మాత్రం ఇది ఒక మంచి రిఫ్రెషింగ్ ఎంటర్‌టైనర్.