పాకిస్తాన్ టూ కర్నూలు లవ్ స్టోరీ
కర్నూలు, డిసెంబర్ 7
తమకు కులం, మతం, భాష, ప్రాంతం అనే బేధాలు ఉండవు. దేశాలు దాటైనా ప్రేమను గెలిపించుకుంటారు ప్రేమికులు. ఇవన్నీ వినడానికి సినిమా డైలాగుల్లా అనిపించొచ్చు.. కానీ అప్పుడప్పుడు నిజ జీవితంలోనూ కొన్ని ఘటనలు ఇలా జరుగుతుంటాయి. కానీ ఇది మాత్రం కాస్త భిన్నమైన ప్రేమకథ.. పెళ్లైన భర్త చనిపోయిన మహిళ కోసం ఓ వ్యక్తి పాకిస్థాన్ నుంచి కర్నూలు వచ్చాడు. ఆమెను పెళ్లి చేసుకొని పదేళ్లుగా ఇక్కడే ఉంటున్నాడు.. సీన్ కట్ చేస్తే కుటంబంతో పాక్ వెళ్లేందుకు ప్రయత్నించి పోలీసులకు దొరికిపోయాడు. అతడ్ని ప్రశించడంతో ఈ వింత ప్రేమకథ తెలిసింది.పాకిస్థాన్‌లోని సియాల్ కోట్ ప్రాంతానికి చెందిన గుల్జార్ ఉపాధి కోసం 12 ఏళ్ల క్రితం సౌదీ అరేబియా వెళ్లాడు. అక్కడే ఏడాది పాటూ పనులు చేసుకుంటూ గడిపాడు.. ఓసారి తనకు తెలిసినవాళ్లకు ఫోన్ చేసే క్రమంలో కర్నూలు జిల్లా గడివేములకు చెందిన దౌలత్‌బీకి ఆ ఫోన్ కాల్ వెళ్లింది. అప్పటి నుంచి ఇద్దరి మధ్య పరిచయం ఏర్పడింది. దౌలత్‌కు భర్త చనిపోగా.. ఓ కుమారుడు ఉన్నాడు. ఇక ఆ పరిచయం కాస్త ప్రేమగా మారడంతో.. తరచూ ఫోన్‌లోనే మాట్లాడుకునేవారు.దౌలత్‌పై మనసు పారేసుకున్న గుల్జార్ సౌదీ నుంచి పాకిస్థాన్ వెళ్లకుండా నేరుగా ఇండియాకు వద్దామనుకున్నాడు. అలా రావాలంటే పాక్ పాస్‌పోర్టు ఉంటే వీసా తప్పనిసరిగా తీసుకోవాలి.. ఆ వీసా ముగిసిన వెంటనే పాక్ వెళ్లిపోవాలి. గుల్జార్ మాత్రం దౌలత్ దగ్గరే ఉండిపోవాలనుకున్నాడు. అందుకు ఓ ప్లాన్ వేశాడు. తనది ఇండియా అని.. పాస్‌పోర్ట్ పోయిందని సౌదీ పోలీసులతో డ్రామాలాడాడు.. వారిని నమ్మించి ఎమర్జెన్సీ సర్టిఫికేట్ (ఈసీ) పొందాడు.ఈసీ సాయంతో నేరుగా కర్నూలు జిల్లా గడివేముల వచ్చేశాడు. దౌలత్‌ను పెళ్లి చేసుకొని.. పదేళ్లుగా ఇక్కడే ఉంటున్నాడు. ఈ జంటకు నలుగురు ఆడపిల్లలు కూడా ఉన్నారు. గుల్జార్ ఇక్కడే ఉంటూ పెయింటింగ్ పనులు చేసుకుంటూ జీవనం సాగిస్తున్నాడు. ఈ క్రమంలో నాలుగైదు నెలల క్రితం పాకిస్థాన్‌లో ఉన్న తన కుటుంబ సభ్యులతో అతడు టచ్‌లోకి వెళ్లాడు. తరచూ వారితో ఫోన్‌లో మాట్లాడుతున్నాడు. తిరిగి పాకిస్థాన్ రావాలని కుటుంబ సభ్యులు కోరడంతో అతడు భార్య, పిల్లలకు పాస్‌పోర్ట్ తీసుకున్నాడు.కుటంబంతో పాక్ వెళ్లేందుకు ప్రయత్నించి పోలీసులకు దొరికిపోయాడు.