ఆమెగా మారిన అతడి కథ.
మదురై, డిసెంబర్ 9
ఇది ఆమెగా మారిన అతడి కథ.. ఇటీవల విడుదలైన రెమో సినిమాలో హీరో అందమైన అమ్మాయి వేషం వేస్తాడు. హీరోయిన్ ప్రేమ కోసం అదే ఆస్పత్రిలో నర్సుగా పనిచేస్తాడు. చివరకు హీరోయిన ఓకే చెప్పగానే వేషం రివీల్ చేస్తాడు. అచ్చు అలానే సినిమా కథను తలదన్నే రీతిలో జరిగిన యదార్థ ఘటన ఇది. అతడే ఆమెగా మారి పనులకు వెళ్తున్న ఘటన తమిళనాడులో వెలుగులోకి వచ్చింది. మహిళ వేషధారణలో ఆరు నెలలుగా ఇళ్లలో పనిచేస్తున్న యువకుడిని ఎట్టకేలకు గుర్తించారు. విచారణలో అతడు చెప్పిన విషయాలు హృదయాలను కలచివేస్తున్నాయి.శివగంగ జిల్లా మానమదురైకి చెందిన రాజా ప్రతిరోజూ తన ఊరి నుంచి బయల్దేరే సమయంలో లుంగీ, టీ షర్ట్‌తో మదురైకి చేరుకుంటాడు. కామరాజర్‌ రోడ్డు తెప్పకుళం ప్రాంతంలోని ముళ్లపొదల చాటుకు వెళ్లి తన లుంగీ, షర్ట్‌ను మార్చి చీర, జాకెట్‌ ధరించి తలకు విగ్‌ పెట్టుకొని బయటకు వస్తాడు. ఆపై ఆ ప్రాంతంలోని మూడు ఇళ్లలో వంట పని, ఇతర పనులు చేసుకుని సాయంత్రం మళ్లీ అదే పొదల చాటుకు వెళ్లి దుస్తులు మార్చుకుని యథావిధిగా స్వగ్రామానికి వెళుతుంటాడు.సుమారు ఆరు నెలలుగా రాజా మహిళ వేషధారణలో ఇళ్లలో పనులకు వెళ్తున్నాడు. రాజా తీరును అనుమానించిన కొందరు ఆ ప్రాంతంలోని సీసీటీవీ ఫుటేజీని పరిశీలించడంతో అసలు విషయం వెలుగుచూసింది. విషయం ఆయా ఇళ్ల యజమానులకు తెలియడంతో తమను మోసం చేశాడంటూ ఫిర్యాదు చేయడంతో తో పోలీసులు కేసు నమోదు చేసి విచారణ చేపట్టారు.విచారణలో రాజా చెప్పిన కఠిన వాస్తవాలు హృదయాలను కలచివేశాయి. సొంతూరిలో ఎలాంటి ఉద్యోగాలు లేక ఇంటికే పరిమితమయ్యాయని.. ఉద్యోగం లేదని స్థానికులు హేళన చేస్తుంటే భరించలేక పోయానని.. వేరే ఊరొచ్చి మహిళ వేషధారణలో పనిచేస్తున్నానని చెప్పాడు. అలా వస్తున్న వేతనంతోనే తల్లిదండ్రులను పోషించుకోగలుగుతున్నానని.. తాను ఎవ్వరినీ ఇబ్బంది పెట్టలేదని, తనను విడిచిపెట్టాలని కోరాడు. తల్లిదండ్రుల కోసం అమ్మాయిగా మారి ఇంటి పనులు చేస్తున్న ఆ యువకుడి కష్టాలకు పోలీసులు సైతం చలించిపోయారు.