నాలుగేళ్ల పాటు ఒలింపిక్స్ నుంచి రష్యానిషేధం
మాస్కొ, డిసెంబర్ 9, 
డోపింగ్ ఉందంతంపై రష్యాపై ప్రపంచ యాంటీ డోపింగ్ ఏజెన్సీ (వాడా) సోమవారం కన్నెర్ర చేసింది. రష్యాను నాలుగేళ్లపాటు నిషేధించింది. దీంతో వచ్చే ఏడాది జరిగే ప్రతిష్టాత్మక ఒలింపిక్స్‌తోపాటు 2022 బీజింగ్ వింటర్ ఒలింపిక్స్‌లో కూడా రష్యా పాల్గొనే అవకాశం లేదు. యాంటీ డోపింగ్ లెబోరేటరీ నుంచి డేటా సేకరణలో అవకతవకలకు పాల్పడినట్లు రష్యాపై ఆరోపణలు ఉన్నాయి. దీనిపై విచారించిన వాడా సోమవారం నిషేధం విధించింది.లాసాన్‌లో సోమవారం సమావేశమైన వాడా ఎగ్జిక్యూటివ్ కమిటీ సమావేశమై దీనిపై విచారించింది. ఈక్రమంలో వచ్చే నాలుగేళ్లపాటు అన్ని అంతర్జాతీయ టోర్నీల్లో పాల్గొనకుండా రష్యాను నిషేధించారు. సమావేశంలో తీసుకున్న ఈ నిర్ణయానికి అన్నివైపుల నుంచి ఏకగ్రీవ మద్దతు లభించిందని తెలిపారు. అయితే రష్యాపై తీసుకున్న ఈ నిర్ణయం సరిపోదని, ఇంతకంటే పెద్ద శిక్ష విధించాలని వాడా వైస్ ప్రెసిడెంట్ లిండా హెల్లలాండ్ తెలిపారు.మరోవైపు నిషేధంపై అప్పీలు చేసుకునేందుకు రష్యాకు వాడా 21 రోజుల గడువునిచ్చింది. అనంతరం దీనిపై కోర్టు ఆఫ్ ఆర్బిట్రేషన్ ఫర్ స్పోర్ట్స్ (కాస్) విచారించనుంది. మరోవైపు రష్యా నిషేధానికి గురికావడం 2015 నుంచి పరిపాటిగా మారింది. గతేడాది ప్యాంగ్చాంగ్‌లో జరిగిన వింటర్ ఒలింపిక్స్‌లో 168 మంది రష్యా అథ్లెట్లు తటస్థ జెండాపై బరిలోకి దిగారు. మరోవైపు నిషేధం ఉన్నప్పటికీ సొంతగడ్డపై జరిగే 2020 యూరో టోర్నీలో రష్యా పాల్గొననుంది. ఇక నిషేధంతో అథ్లెట్లు న్యూట్రల్ ఫ్లాగ్‌తో పాల్గొనే అవకాశముంది. టోక్యో ఒలింపిక్స్‌తోపాటు ఖతార్ ఫుట్‌బాల్ వరల్డ్‌కప్‌లో రష్యాకు చుక్కెదురు కానుంది.