.jpg)
అమెరికాకు షా స్ట్రాంగ్ కౌంటర్
న్యూఢిల్లీ, డిసెంబర్ 10,
పౌరసత్వ సవరణ బిల్లును లోక్‌సభ ఆమోదించడంపై యూఎస్ కమిషన్స్‌ ఫర్‌ ఇంటర్నేషనల్‌ రిలీజియస్‌ ఫ్రీడం (యూఎస్ సీఐఆర్‌ ఎఫ్‌) ఆందోళన వ్యక్తం చేసిన సంగతి తెలిసిందే. ఈ బిల్లు రాజ్యసభలో కూడా ఆమోదం పొందితే హోం మంత్రి అమిత్‌ షా సహా కీలక నేతలపై ఆంక్షలు విధించే దిశగా ఆలోచించాలని ట్రంప్‌ సర్కార్‌ను కోరింది. శరణార్థులకు ఆశ్రయం ఇచ్చే క్రమంలో ముస్లింలను మినహాయించడం పట్ల అభ్యంతరాలు వ్యక్తం చేసింది. ఈ బిల్లు ప్రమాదకరమని, భారత్ తప్పుడు దోవలో వెళ్తోందని ఆందోళన వ్యక్తం చేసింది.యూఎస్ సీఐఆర్ఎఫ్ అభ్యంతరాలపై భారత్ స్పందించింది. పౌరసత్వ సవరణ బిల్లుపై అమెరికా ప్యానెల్ చేసిన ప్రకటన సరైంది కాదని, ఈ విషయంలో దానికి ఎలాంటి అధికారం లేదని ప్రకటించింది. యూఎస్ సీఐఆర్ఎఫ్ గత రికార్డును పరిశీలిస్తే.. పౌరసత్వ బిల్లు విషయంలో అది చేసిన వ్యాఖ్యలు ఆశ్చర్యం కలిగించలేదని విదేశాంగ శాఖ తెలిపింది. ఈ విషయంలో అమెరికా కమిషన్‌కు ఉన్న పరిజ్ఞానం పరిమితమని, ఈ విషయంలో జోక్యం చేసుకునే అధికారం దానికి లేదని స్పష్టం చేసింది. అమెరికా కమిషన్ పక్షపాత ధోరణితో వ్యవహరిస్తోందని ఘాటైన వ్యాఖ్యలు చేసింది.పౌరసత్వ సవరణ బిల్లుకు సోమవారం అర్ధరాత్రి లోక్ సభ ఆమోదం తెలిపింది. బుధవారం ఈ బిల్లు రాజ్యసభలో చర్చకు రానుంది. ఉభయ సభల్లో ఆమోదం పొంది.. రాష్ట్రపతి ఆమోద ముద్ర వేస్తే పాకిస్థాన్, బంగ్లాదేశ్, అప్ఘానిస్థాన్‌ల నుంచి వచ్చే ముస్లిమేతర శరణార్థులు భారత పౌరసత్వం పొందుతారు.