చంద్రబాబుపై జేసీ కామెంట్స్
విజయవాడ, డిసెంబర్ 18,
టీడీపీ అధినేత చంద్రబాబులో మార్పు రావాలంటున్నారు మాజీ ఎంపీ జేసీ దివాకర్‌రెడ్డి. ఎప్పుడూ శాంతి వచనాలు, శాంతి వచనాలు అంటూ మమ్మల్ని చంకనాకించావ్ అంటూ సంచలన వ్యాఖ్యలు చేశారు. 'జగన్ మీ కొడుకా.. మీ తమ్ముడా.. నీ హితుడా' అంటూ ప్రశ్నించిన ఆయన.. చంద్రబాబు సాధు జంతువులా ఉండొద్దని సూచించారు. బుధవారం అనంతపురం జిల్లా టీడీపీ సమీక్ష సమావేశంలో చంద్రబాబు ముందే ఈ వ్యాఖ్యలు చేశారు.టీడీపీ సమావేశంలో జేసీ దివాకర్‌రెడ్డి కొన్ని కీలక వ్యాఖ్యలు చేశారు. ఓ కానిస్టేబుల్ టీడీపీ కార్యకర్తని బెదిరించారని.. 'టీడీపీలో ఏం పనిరా అంటూ పోయి వైసీపీలో చేరకపోతే బొక్కలో తోస్తా'నన్నారని.. కానీ ఎస్పీ మంచి వ్యక్తి కావడంతో ఇబ్బంది లేకుండా పోయిందన్నారు. అనంతపురం జిల్లాలో ఎస్పీ కాకుండా పోలీసులు అందరూ వంగి, వంగి నమస్కారాలు పెడుతున్నారని ఆరోపించారు.రెండున్నరేళ్లలోనే ఎన్నికలు వస్తాయని మరో బాంబ్ పేల్చారు జేసీ. టీడీపీ కార్యకర్తల్ని ఇబ్బంది పెట్టిన వారిని గుర్తు పెట్టుకుంటామన్నారు. అక్కడితో ఆగకుండా బూట్లు నాకే పోలీసుల్ని తెచ్చుకుంటామంటూ ఘాటు వ్యాఖ్యలు చేశారు. టీడీపీ కార్యకర్తల్ని బెదిరించిన వారిపై కేసులు పెట్టిస్తామని.. సారా, గంజాయి కేసులు పెట్టిస్తామంటూ రెచ్చిపోయారు. ఎన్నికలకు ముందు పార్టీలో కొందరు ఎమ్మెల్యేలకు టికెట్లు ఇవ్వొద్దని చెప్పానని.. కానీ చంద్రబాబు తన మాట వినలేదన్నారు. చంద్రబాబును అందరూ మోసం చేస్తున్నారని.. ఆయన తప్పెట్లు, తాళాలకు లొంగొద్దన్నారు