భక్తి ముసుగులో 40 కోట్లు వసూళ్లు
హైద్రాబాద్, డిసెంబర్ 19
భక్తి ముసుగులో మోసాలకు పాల్పడుతున్న దొంగబాబా ఆటకట్టించారు హైదరాబాద్ పోలీసులు. ఆధ్యాత్మిక బోధనల పేరుతో అమ్మాయిలకు దగ్గరవడం.. ఆ తరువాత తన వ్యాపారంలో పెట్టుబడి పెడితే అధిక వడ్డీలు వస్తాయని చెప్పి మాయచేసి డబ్బు వసూళ్లకు పాల్పడుతున్నకేటుగాడిని ఎస్‌ఆర్ నగర్ పోలీసులు అరెస్టు చేశారు. దొంగబాబా మాటలు నమ్మి మోసపోయిన ఓ బాధితురాలు ఇచ్చిన ఫిర్యాదు మేరకు పోలీసులు అతడిని అరెస్టు చేసి పోలీస్ స్టేషన్‌కు తరలించారు.ఏపీలోని నెల్లూరు జిల్లాకు చెందిన గిరీష్ సింగ్ హైదరాబాద్ వచ్చి దొంగబాబా అవతారమెత్తాడు. అద్వైత స్పిరిచువల్ రీఛార్జ్ సెంటర్ ఫర్ ఎక్స్‌లెన్స్‌ పేరుతో ఆధ్యాత్మిక సంస్థను స్థాపించాడు. సంస్థ ద్వారా అమాయకులకు మాయమాటలు చెప్పి వారి ద్వారా పెట్టుబడులు పెట్టించి నిండా ముంచేశాడు. చదివింది డిగ్రీనే అయినా ఆధ్యాత్మిక బోధనల పేరుతో అమ్మాయిలను బురిడీ కొట్టించి అయిన కాడికి దోచుకునేవాడు.మహిళలే టార్గెట్‌గా మోసాలకు తెరలేపాడు. వివిధ రకాల ప్రక్రియలు, స్కీమ్‌ల పేరుతో మహిళలను నేరుగా సంప్రదించి ఆధ్యాత్మిక బోధనల పేరతో దగ్గరయ్యేవాడు. మహిళలు తనను నమ్మారని గ్రహించిన తరువాత తనకు వ్యాపారాలు ఉన్నాయని.. కొంత మొత్తం తన దగ్గర పెట్టుబడి పెడితే మీ కుటుంబంలో సిరి సంపదలు కలుగుతాయని.. అధిక లాభాలు కూడా వస్తాయని ఆశచూపి అందినకాడికి కాజేసేవాడు.ఇలా ఇప్పటికే ఏకంగా రూ.40 కోట్ల వరకు వసూలు చేసినట్లు పోలీసులు చెబుతున్నారు. దొంగబాబా మాటలకు మోసపోయి డబ్బులు ముట్టజెప్పిన ఓ బాధితురాలు పోలీసును ఆశ్రయించడంతో విషయం వెలుగులోకి వచ్చింది. రంగంలోకి దిగిన పోలీసులు దొంగబాబాను అరెస్టు చేసి దర్యాప్తు చేస్తున్నారు. గిరీష్ సింగ్‌పై ఇప్పటికే పలు పోలీస్ స్టేషన్లలో కేసులు నమోదైనట్లు తెలుస్తోంది.