వాట్సప్ నుంచి కొత్త తరహా మోసాలు
హైద్రాబాద్, డిసెంబర్ 27,
మారుతున్న కాలంతో పాటు నేరం కూడా కొత్త రూపం దాల్చడం మొదలైంది. ఒకప్పుడు దొంగతనం చేయాలంటే దొంగలు ప్రత్యక్షంగా మీ దగ్గరకు లేదా మీ ఇంటికి రావాల్సిన అవసరం ఉండేది. కానీ టెక్నాలజీ అందుబాటులోకి వచ్చాక మీకు సంబంధించిన వివరాలు తెలిస్తే చాలు.. ఒక్క లింక్ మీ ఫోన్ కు పంపడం ద్వారా బ్యాంకు ఖాతాలను ఖాళీ చేస్తున్నారు. సైబర్ నేరగాళ్లు. ఒక పద్ధతి గురించి ప్రజలకు తెలియగానే.. మరో పద్ధతిలో దొంగిలించడానికి వీరి వద్ద ప్లాన్ రెడీగా ఉంటుంది. తాజాగా వాట్సాప్ ద్వారా కూడా కొంతమంది డబ్బు పోగొట్టుకున్నామని ఫిర్యాదులు చేయడం షాక్ ఇచ్చింది. ఇది ఎలా జరిగిందని విచారణ జరిపినప్పుడు షాకింగ్ విషయాలు బయట పడ్డాయి. ఇంతకీ ఆ నేరం ఎలా జరిగిందంటే?స్కామ్ లో నేరగాళ్లు ప్రధానంగా ఆన్ లైన్ లో వారి వస్తువులను అమ్మకంగా పెట్టిన వారిని లక్ష్యంగా చేసుకుంటున్నారు. మీ వస్తువు వారికి బాగా నచ్చింది అంటారు. ఎంతయినా పర్లేదు మేం కొనుక్కుంటాం అంటూ మిమ్మల్ని నమ్మిస్తారు. వస్తువులు అమ్మకానికి పెట్టిన వారు సాధారణంగా తాము పెట్టిన వస్తువు త్వరగా అమ్ముడుపోతుందనే ఉత్సాహంలో వారి మాటలను సులభంగా నమ్మేస్తారు.ఆ తర్వాత వారి మోసంలో రెండో దశ మొదలవుతుంది. మీకు డబ్బులు పంపిస్తాం అంటూ మీ బ్యాంకు ఖాతా వివరాలు, మీ వాట్సాప్ నంబర్ అడుగుతారు. మీరు మీ వివరాలు ఇచ్చిన అనంతరం మీకు వారి వద్ద నుంచి ఒక క్యూఆర్ కోడ్ వస్తుంది. ఆ క్యూఆర్ కోడ్ ను స్కాన్ చేసి లావాదేవీ పూర్తి చేస్తే మీ ఖాతాలో నగదు జమ అవుతుందని నమ్మబలుకుతారు.కానీ నిజానికి వారు పంపే క్యూఆర్ కోడ్ మీ వద్ద నుంచి నగదు అభ్యర్థిస్తూ పంపించే కోడ్. మీరు దాని మీద క్లిక్ చేసి లావాదేవీ పూర్తి చేస్తే మీ ఖాతాలో నగదు కట్ అయ్యి వారి ఖాతాలో జమ అవుతుంది. కాబట్టి ఇలాంటి కోడ్ లకు స్పందించే ముందు సెండ్ మనీ, రిక్వెస్ట్ మనీలకు మధ్య ఉండే తేడాను తెలుసుకోవడం ఉత్తమం. సెండ్ మనీ అంటే.. మీ ఖాతాలో నగదు జమ చేస్తున్నట్లు. రిక్వెస్ట్ మనీ అంటే మీ ఖాతా నుంచి నగదు అభ్యర్థిస్తున్నట్లు.. దానికి మీరు స్పందిస్తే.. మీ ఖాతా నుంచి నగదు ఆ రిక్వెస్ట్ పంపిన వారి ఖాతాలో జమ అవుతుంది.క్యూఆర్ కోడ్ కూడా ఒక సాధారణ ఇంటర్నెట్ లో లభించే వెబ్ పేజ్ తరహా లింకే. ఇంటర్నెట్లో మనకు తెలియని లింక్ ల జోలికి వెళ్లకుండా ఎలా జాగ్రత్తగా ఉంటామో.. తెలియని వ్యక్తులు పంపిన క్యూఆర్ కోడ్ ను కూడా స్కాన్ చేయకుండా ఉత్తమం. అప్పుడు మాత్రమే ఇటువంటి నేరాల బారిన పడకుండా మనం జాగ్రత్తగా ఉండగలం. గత నెలలో దీనికి సంబంధించిన కేసులు గురుగ్రామ్ ప్రాంతంలో ఎక్కువగా నమోదయ్యాయి. దీనికి సంబంధించిన సైబరాబాద్ పోలీసులు ప్రజలకు హెచ్చరికలు కూడా జారీ చేశారు. తెలియని వ్యక్తులు పంపే క్యూఆర్ కోడ్ లను స్కాన్ చేయవద్దని సూచించారు.