కళ్ల ముందే టైర్ కింద కూతురు దుర్మరణం
మెదక్, డిసెంబర్ 28
పుట్టిన రోజు నాడే బీటెక్ విద్యార్థినిని ట్రాక్టర్ రూపంలో మృత్యువు వెంటాడింది. తండ్రి కళ్ల ముందే ట్రాక్టర్ కింద నలిగి ప్రాణాలు కోల్పోయింది. సిద్ధిపేట జిల్లాలో జరిగిన ఈ ఘటన తీవ్ర విషాదాన్ని నింపింది. హుస్నాబాద్ మండలం కేబీ కాలనీకి చెందిన లక్ష్మీనారాయణ తన పొలంలో వరి సాగు చేస్తున్నాడు.. నాట్లు వేసేందుకు పొలాన్ని సిద్ధం చేశాడు. అతడి వెంట బీటెక్ చదువుతున్న కుమార్తె నవీన కూడా పొలం వెళ్లింది.నాట్లు కావడంతో నవీన ట్రాక్టర్‌పై నారు వేసుకొని పొలంలో వెళుతోంది. ట్రాక్టర్ గట్టు దగ్గరకు రాగానే అదుపుతప్పింది.. అందరూ చూస్తుండగానే బోల్తా పడింది. ప్రమాదవశాత్తూ నవీన ఆ ట్రాక్టర్ కింద పడిపోయింది. వెంటనే అప్రమత్తమైన తండ్రి లక్ష్మీనారాయణ స్థానికులతో కలిసి ట్రాక్టర్‌ను పైకి లేపేందుకు ప్రయత్నించినా ఫలితం లేకుండా పోయింది. నవీన అక్కడికక్కడే ప్రాణాలు విడిచింది.కొద్దిసేపట తర్వాత జేసీబీ సాయంత ట్రాక్టర్‌ను పైకి లేపి మృతదేహాన్ని బయటకు తీశారు. అప్పటి వరకు తమ కళ్లముందే నవ్వుతూ కనిపించిన నవీన ఇక లేదన్న విషయాన్ని తల్లిదండ్రులు జీర్ణించుకోలేకపోయారు. తన కళ్ల ముందే బిడ్డ చనిపోయిందంటూ ఆమె తండ్రి బోరున విలపించారు. పుట్టినరోజు నాడే నవీన చనిపోవడం స్థానికంగా తీవ్ర విషాదాన్ని నింపింది.