మీ డెబిట్ కార్డులు మార్చుకోవాలి
హైద్రాబాద్, డిసెంబర్ 30, 
బ్యాంక్ కస్టమర్లకు అలర్ట్. స్టేట్ బ్యాంక్ ఆఫ్ ఇండియా (ఎస్‌బీఐ), పంజాబ్ నేషనల్ బ్యాంక్, హెచ్‌డీఎఫ్‌సీ బ్యాంక్, ఐసీఐసీఐ బ్యాంక్ సహా ఇతర బ్యాంకుల కస్టమర్లకు హెచ్చరిక. మీరు పాత డెబిట్ కార్డు ఉపయోగిస్తున్నారా? అయితే మీరు ఒక విషయం తెలుసుకోవాలి. జనవరి 1 నుంచి మీ పాత డెబిట్ కార్డులు పనిచేయవు.అటు ప్రభుత్వ రంగ బ్యాంకులు, ఇటు ప్రైవేట్ రంగ బ్యాంకులు వారి కస్టమర్లను హెచ్చరిస్తున్నాయి. ఈఎంవీ చిప్ లేని డెబిట్ కార్డులను జనవరి 1 నుంచి బ్లాక్ చేస్తున్నామని అన్ని బ్యాంకులు పేర్కొన్నాయి. నాన్ ఈఎంవీ డెబిట్ కార్డులను వెంటనే కొత్త వాటితో మార్చుకోవాలని సూచిస్తున్నాయి. పాత డెబిట్ కార్డుతో ఏటీఎం నుంచి డబ్బులు విత్‌డ్రా చేసుకోవడం కుదరదని పేర్కొన్నాయి.రిజర్వు బ్యాంక్ నిబంధనల ప్రకారం.. మ్యాగ్నటిక్ డెబిట్ కార్డులను కొత్త ఈఎంవీ చిప్ కార్డుతో మార్చుకోవాలి. బ్యాంకులు ఉచితంగానే కొత్త ఈఎంవీ చిప్ డెబిట్ కార్డులను కస్టమర్లకు అందిస్తున్నాయి. అంతర్జాతీయ పేమెంట్ నిబంధనలకు అనుగుణంగా ఆర్‌బీఐ ఈ షరతు విధించింది. అందువల్ల మ్యాగ్నటిక్ డెబిట్ కార్డు ఉన్న వారు తప్పనిసరిగా ఈఎంవీ చిప్ డెబిట్ కార్డును తీసుకోవాలి.మ్యాగ్నటిక్ స్ట్రిప్ కార్డ్స్‌పై ఆన్‌లైన్ మోసాలు, ఏటీఎం మోసాలు పెరిగిపోతున్న నేపథ్యంలో ఆర్‌బీఐ కొత్త ఈఎంవీ చిప్ డెబిట్ కార్డులను తప్పనిసరి చేసింది. ఆర్బీఐ ఆదేశాల ప్రకారం బ్యాంకులు అన్నీ 2019 డిసెంబర్ 31 తర్వాత మ్యాగ్నటిక్ డెబిట్ కార్డులను బ్లాక్ చేయనున్నాయి. అందుకే వెంటనే మీ పాత డెబిట్ కార్డును కొత్తదానితో మార్చుకోండి.కొత్త ఈఎంవీ డెబిట్ కార్డును ఆన్‌లైన్‌లో పొందొచ్చు. దీని కోసం బ్యాంక్ ఇంటర్నెట్ బ్యాంకింగ్ పోర్టల్‌కు వెళ్లాలి. అక్కడ ఇసర్వీసెస్ అనే ఆప్షన్ కింద ఏటీఎం కార్డ్ సర్వీసెస్ అని ఉంటుంది. రిక్వెస్ట్ ఏటీఎం/డెబిట్ కార్డు అనే ఆప్షన్ ఎంచుకోవాలి. మీ అకౌంట్ నెంబర్, కార్డుపై పేరు, కార్డు టైప్ వంటివి ఓకే చేసి సబ్‌మిట్ చేయాలి. ఇలా చేసేటప్పుడు ప్రొఫైల్ పాస్‌వర్డ్ అవసరం అవుతుంది. అంతా ఓకే అయిన తర్వాత మీ ఎస్‌బీఐ డెబిట్ కార్డు మీ రిజిస్టర్డ్ ఇంటి అడ్రస్‌కు వచ్చేస్తుంది.