టీడీపీకీ మరో నేత గుడ్ బై
విజయవాడ, జనవరి 6
2019 అసెంబ్లీ ఎన్నికల్లో ఘోర పరాజయంతో కుదేలైన టీడీపీ వరుస షాక్‌లు తగులుతూనే ఉన్నాయి. తాజాగా టీడీపీ మరో ఎదురుదెబ్బ తగిలింది. తెలుగుదేశం పార్టీ అనుబంధ విభాగాల్లో అత్యంత బలమైన తెలుగునాడు స్టూడెంట్ ఫెడరేషన్  అధ్యక్షుడు నాదెండ్ల బ్రహ్మం చౌదరి పార్టీకి గుడ్‌బై చెప్పారు. వ్యక్తిగత కారణాలతోనే రాజీనామా చేస్తున్నానని అందులో రాజకీయపరమైన అంశాలేవీ లేవని ఆయన స్పష్టం చేశారు.పార్టీకి గుడ్ బై చెప్పిన బ్రహ్మం చౌదరి చంద్రబాబుపై పొగడ్తలు కురిపించడం విశేషం. బయటకు వెళ్తున్న నేతలందరూ విమర్శలు చేస్తోంటే.. ఈయన మాత్రం ప్రశ్నంసించారు. మధ్య తరగతి కుటుంబం నుంచి వచ్చిన తనను చంద్రబాబు వెన్నుతట్టి ప్రోత్సహించారని బ్రహ్మం చౌదరి పేర్కొన్నారు. రాజీనామా తన సొంత నిర్ణయం తప్ప ఇందులో ఎలాంటి రాజకీయ కారణాలు లేవని బ్రహ్మం తెలిపారు. రాజకీయాలకు దూరంగా ఉంటూ సామాజిక సమస్యలపై పోరాడతానని ఆయన స్పష్టం చేశారు.టీడీపీ అనుబంధ విభాగాల్లో తెలుగునాడు స్టూడెంట్ ఫెడరేషన్ కీలకం. విద్యార్థి స్థాయి నుంచే యువతను తెలుగుదేశం పట్ల ఆకర్షితులను చేయడంలో ప్రధాన పాత్ర టీఎన్ఎస్‌ఎఫ్‌దే. అంతటి కీలక పదవి నుంచి బ్రహ్మం చౌదరి వైదొలగడం పార్టీకి దెబ్బగానే చెప్పాలి. తెలుగు యువత రాష్ట్ర అధ్యక్షుడిగా ఉన్న దేవినేని అవినాష్ టీడీపీకి రాజీనామా చేసి వైసీపీలో చేరిన విషయం తెలిసిందే. యువ నేతలు పార్టీని వీడుతుండడం టీడీపీని కలవరపరిచే అంశంగానే చెప్పాలి.
===================