సోషల్ మీడియాలో బన్నీ వర్సెస్ మహేష్
హైద్రాబాద్, జనవరి 14
సంక్రాంతి పండగ కంటే ముందే తెలుగులో సినిమాల పండగ మొదలైపోతుంది. బడా సినిమాలన్నీ ఈ పండగనే టార్గెట్ చేసి ప్రేక్షకుల ముందుకు వస్తాయి. ఈ సారి కూడా ఏకంగా నాలుగు సినిమాలు సంక్రాంతి బరిలో నిలిచాయి. దాంతో సహజంగా ముందు నుండే పోటీ ఏర్పడింది. అయితే రజినీకాంత్ సినిమా ‘దర్బార్’ ముందుగా రిలీజ్ అయ్యి మంచి టాక్ తెచ్చుకుంది. ఇక 11న రిలీజ్ అయిన ‘సరిలేరు నీకెవ్వరు’ కూడా మంచి టాక్ సంపాదించుకుంది. ఒక్క రోజు గ్యాప్‌లో వచ్చిన ‘అల వైకుంఠపురములో’ సైతం మంచి ఫ్యామిలీ ఎంటర్‌టైనర్ అని ముద్ర వేసుకుంది.ఇలా వచ్చిన ప్రతి సినిమా హిట్ అవడం అనేది మంచి విషయమే. కానీ, ఇప్పుడు మాత్రం కలెక్షన్స్ విషయంలో ఈ సినిమాల మధ్య పోటీ ఉన్నట్టు కనిపిస్తుంది. ఎందుకంటే ఏ సినిమా ఎప్పుడు రావాలి అనే విషయంలో తలెత్తిన చిన్న చిన్న చికాకుల వల్ల ఈ పరిస్థితి తలెత్తింది. ముందుగా థియేటర్స్‌లోకి వచ్చిన మహేష్ సినిమా ‘సరిలేరు నీకెవ్వరు’ సూపర్ టాక్‌ని, ఆ టాక్‌కి తగ్గట్టే వసూళ్లను కూడా రాబట్టింది. ఆ సినిమా రిలీజ్ అయిన మధ్యాహ్నానికే బ్లాక్ బస్టర్ కా బాప్ అంటూ పోస్టర్ పడింది. ఇక తొలి రోజు షేర్ ఏకంగా రూ. 46.77 కోట్లు అంటూ పోస్టర్స్ వేశారు.అయితే ఆ తరవాత రోజు థియేటర్స్‌లోకి వచ్చిన బన్నీ సినిమా ‘అల వైకుంఠపురములో’ కూడా సూపర్ హిట్ టాక్ తెచ్చుకుంది. ఫ్యామిలీ ఎంటర్‌టైనర్ అనే ట్యాగ్ కాస్త అడిషనల్ అడ్వాంటేజ్‌గా మారింది. అయితే ఈ సినిమాకి కూడా కలెక్షన్స్ ప్రకటిస్తూ ఒక పోస్టర్ వదిలారు. ఆ పోస్టర్‌లో ఉన్న ఫిగర్ చూసి చాలా మందికి కళ్లు తిరిగాయి. మొదటి రోజు ఏకంగా రూ.85 కోట్లు కొల్లగొట్టింది బన్నీ సినిమా. దీంతో అసలు వీటిలో ఏవి నిజమైన కలక్షన్స్ అనే కొత్త మాట గట్టిగా వినిపిస్తుంది.నిజంగా అలాంటి కలెక్షన్స్ వస్తే ఆ సినిమాలకు, ఇండస్ట్రీకి కూడా మంచిదే. కానీ ఎందుకో వచ్చినవాటికంటే కాస్త నంబర్స్ ఎక్కువగా ఉన్నట్టున్నాయి అని సాధారణ ప్రేక్షకులు కూడా మాట్లాడుకోవడం ఆసక్తికరంగా మారింది. ఎందుకంటే, ప్రస్తుతం సోషల్ మీడియాలో వీటిపైనే చర్చ జరుగుతోంది. మరి వీటిలో నిజమెంత, నిజమయిన కలెక్షన్స్ ఎంత అనేది మాత్రం ఇంకా తేలాల్సివుంది.సూపర్ స్టార్ హోదా ఉన్న మహేష్ బాబుకి ఈ రేంజ్ కలెక్షన్స్ రాబట్టడం సాధ్యమే అంటూ మహేష్ ఫ్యాన్స్ అంటుంటే, బన్నీకి సినిమాలో మాత్రమే కాదు నిజ జీవితంలో కూడా అబద్దం ఆడడం రాదు అని స్టైలిష్ స్టార్ ఫ్యాన్స్ పంచ్ వేస్తున్నారు. మరి ఈ లెక్కల గొడవ, రికార్డుల రగడ ఎక్కడిదాకా వెళుతుందో, ఎలా ఎండ్ అవుతుందో వేచి చూడాలి. అన్నట్టు ‘సరిలేరు నీకెవ్వరు’ రెండు రోజుల్లో ప్రపంచ వ్యాప్తంగా రూ.54 కోట్ల షేర్ వసూలుచేసింది.